قارجى • 25 مامىر، 2022

بۇعاتتالعان شوتتىڭ شەشىمى

502 رەت كورسەتىلدى

سانكتسيا قىسىمىنا ۇشىراپ، سونىڭ سالدارىنان نارىقتاعى قىزمەتىن توقتاتۋعا ءماجبۇر بولىپ جاتقان ءۇش رەسەيلىك ەنشى­لەس بانك كليەنتتەرىنىڭ ءدال قازىر كوڭىلى كۇپتى ەكەنى بەلگىلى. ويت­كەنى جە­كە­لەگەن شەتەلدىك بانكتەر ءۇش بانكتىڭ – «سبەربانك قازاق­ستان»، «الفا-بانك» جانە «ۆتب قازاقستاننىڭ» شەتەل­دىك­ ۆاليۋ­تا­­داعى كوررەسپوندەنتتىك شوتتارىن بۇعاتتاعان. شوت­تار­داعى قوز­­عالىسسىز جاتقان قارجى كولەمى 9،2 ملرد تەڭگە كولەمىندە.

سونىڭ ىشىندە «سبەربانك قازاقستاننىڭ» – 2،7 ملرد، «الفا-بانكتىڭ» – 6،2 ملرد جانە «ۆتب قازاقستاننىڭ» 0،3 ملرد تەڭگەسىنىڭ قوزعالىسىنا تىيىم سالىنعان. سونىمەن قاتار شەتەلدىك قارجى ۇيىمدارى «سبەربانك» اق جەكەلەگەن كليەنت­تەرى بويىنشا 2،9 ملرد تەڭگە كولەمىندەگى شەتەلدىك ۆاليۋ­تاداعى تولەمدەردى بۇعات­قا سالعان. «الفا-بانك» كليەنت­تەرىنىڭ شەتەلدىك ۆاليۋ­تاداعى تولەمدەر مەن اۋدارىمدارىنا قاتىستى 3،9 ملرد تەڭگەسى دە اينالىمعا شىعا المايدى.

قارجى نارىعىن رەتتەۋ جانە دامىتۋ اگەنتتىگىنىڭ باسشىسى ءمادينا ابىلقاسىموۆانىڭ ايتۋىنشا، قازىر «الفانىڭ» جاڭا اكتسيونەرى – «بانك تسەنتركرەديت» بانكتى اقش جانە وزگە دە ەلدەردىڭ سانكتسيالىق تىزىمىنەن شىعارۋعا تىرىسىپ جاتىر.

«ۆتب قازاقستان» كليەنت­تەرى­نە قاتىستى تولەم جانە اۋدارىم اياسىندا قاراجاتتى بۇعاتتاۋ نەمەسە قاتىرىپ قويۋ فاكتىلەرى جوق. 2022 جىلعى 1 مامىرداعى جاعداي بويىنشا «سبەربانك» اق جانە «الفا-بانك» اق شەتەلدىك بانكتەر قايتارعان كليەنت قاراجاتىنىڭ سوماسى تۋرالى اقپارات جوق. ويتكەنى ترانزاكتسيالار جۇرگىزىلگەن بانكتەردىڭ كوررەسپوندەنتتىك شوتتارى بۇعاتتالعان. تىيىم سالىنعان قاراجاتتى قايتارۋدى كليەنتتەر باسقا بانكتەر ارقىلى جۇزەگە اسىرادى»، دەدى م.ابىلقاسىموۆا.

وپەراتسيالاردى بۇعاتتان شەشۋ ءۇشىن بانك كليەنتتەرى OFAC (اقش قارجى مينيستر­لىگى­نىڭ شەتەلدىك اكتيۆتەردى باقىلاۋ باسقارماسى) رەسمي سايتىنا كىرىپ، ينتەرنەت-رەسۋرستاعى ارنايى فورمانى تولتىرسا بولادى. قازىر بانكتەر كليەنتتەرگە كونتراگەنت بانك­تەرمەن كەلىسسوزدەر جۇرگىزۋ جانە ءتيىستى وتىنىشتەردى دايىنداۋ ارقىلى ولاردىڭ قاراجاتىن قايتارۋعا جاردەم كورسەتىپ جاتىر. «بانك تسەنتركرەديت» قازاقستاندىق «الفا-بانكتى» SDN (اقش ازاماتتارىمەن بىرلەسىپ بيزنەس جاساۋعا تى­يىم سالىنعان تۇلعالار ءتىزىمى – رەد) تىزىمىنەن شىعارۋعا ءوتىنىش قىلىپ، OFAC-قا حات جولداعان. OFAC ماقۇلداعان سوڭ بارىپ «الفا-بانك» كليەنتتەرىنىڭ قاراجاتى مەن كوررەسپوندەنتتىك شوتتارى تولىقتاي بۇعاتتان شەشىلەدى.

«شەتەلدىك بانكتەردىڭ كور­رەس­پوندەنتتىك شوتتارىندا ور­نالاسقان «سبەربانك» اق جانە «الفا-بانك» اق قاراجا­تىن بۇعاتتاۋ جانە ولاردىڭ كليەنت­تەرى­نىڭ قاراجاتىن بۇعات­تاۋعا قاتىستى قازىرگى جاعداي قازاق­ستاننىڭ بانك سەكتورى بەتپە-بەت كەلىپ وتىر­عان سىرتقى گەوساياسي احۋالمەن تىكەلەي بايلانىستى. ەگەر وسىعان بايلانىستى كليەنتتەر ەكى بانككە زالالدى وتەۋ تۋرالى ازاماتتىق تالاپ-ارىز تۇسىرسە، سوت ورگاندارىنىڭ شەشىمدەرىنە سايكەس بۇل تالاپتاردى بانكتەر قاناعاتتاندىرۋعا ءتيىس»، دەپ ءتۇسىندىردى اگەنتتىك باسشىسى.

ەسكە سالايىق، وسىعان دەيىن «الفا-بانك» اق-تى قازاق­ستان­دىق «بانك تسەنتركرەديت» تولىق­تاي ساتىپ الىپ، ونى Eco Center Bank دەپ قايتا اتاعان­دارىن جاريالادى. ال «سبەربانك» اق قازاقستاندىق Halyk Bank-كە 330 ملرد تەڭگە كولەمىندەگى نەسيە پورتفەلىن ساتتى. ەكىجاقتى كەلىسىم اياسىندا قازاقستان دامۋ بانكى ارقىلى بەرىلگەن جەڭىلدەتىلگەن اۆتونەسيە كرەديتتەرى، كەپىلسىز كرەديتتەر جانە يپوتەكالىق نەسيە وتكەن. سونداي-اق ەكى قارجى ينس­تيتۋتى اراسىندا شاعىن جانە ورتا بيزنەس سەكتورىنداعى 7 500 كاسىپورىنعا زايم بەرۋ تۋرالى كەلىسىم جاسالدى. سوعان ساي­كەس «سبەربانك قازاقستاننىڭ» 105 ملرد تەڭگە كولەمىندەگى كوم­مەرتسيالىق پورتفەلى جانە «دامۋ» قورىنىڭ مەملەكەتتىك باعدارلاماسى اياسىندا بەرىلگەن 4،9 ملرد تەڭگە كولەمىندەگى نە­سيە­لەرى Halyk Bank-كە اۋىستى.

ازىرگە «سبەربانك قازاق­ستاندى» قاي ينۆەستوردىڭ ساتىپ الارى بەلگىسىز. بۇعان دەيىن «بايتەرەك» حولدينگى ساتىپ الۋى مۇمكىن دەگەن اقپارات تاراعان. الايدا كەيبىر ساراپشىلار مەملەكەتتىڭ بانك سەكتورىنا ارالاسۋى ابىروي اكەلمەيتىن قادام دەگەندى ايتادى. جاقىندا ال­ما­تىدا بريفينگ وتكىزگەن «ەۋ­را­زيا­لىق بانك» باسقارما تور­اعا­سى ۆالەنتين موروزوۆ «الفا-بانكتى» ساتىپ الۋدى ويلاس­تىرعانىن، بىراق كەيىن بۇل شەشىمنەن باس تارتقاندارىن مالىمدەدى.

ء«بىز «الفا-بانكتى» قاراس­تىر­دىق. ناتيجەسىندە، اقشا مەن ەنەرگيانى ودان دا ءبىزدىڭ بانكتى ورگانيكالىق تۇرعىدان دامىتۋعا جۇمسايىق دەپ شەشتىك. ءتىپتى ونىڭ نەسيە پورتفەلىنە قاتىس­تى ديسكونت بولسا دا سولاي شەشىم قابىلدادىق. «ۆتب قازاقستاندى» مۇلدە قاراس­تىرعان جوقپىز. ال «سبەربانك قازاقستاندى» ساتىپ الۋعا اقشامىز جەتپەيدى دەپ ويلايمىن. ونى قالايدا ساتىپ الادى – اكتيۆتەرى جاقسى، وتە جاقسى كومانداسى بار»، دەيدى ۆ.موروزوۆ.

ءوز كەزەگىندە قارجى نارىعىن رەتتەۋ جانە دامىتۋ اگەنتتىگى رە­سەي­دىڭ ەنشىلەس بانكتەرىندە قا­زاق­ستان­دىقتاردىڭ قاراجاتىن بۇعات­تاۋ تۋرالى دايەكسىز اقپارات­تىڭ تاراتىلىپ جاتقانىن حابارلادى.

«اگەنتتىك قارجىلىق رەتتەۋ­شى رەتىندە كليەنتتەردىڭ قاراجا­تىن جانە ەنشىلەس رەسەيلىك بانك­تەردىڭ اكتيۆتەرىن وقشاۋلاۋ بويىنشا ەشقانداي شارالار قابىلداعان جوق جانە قابىلداۋعا قۇقىلى ەمەس. اگەنتتىكتىڭ رەسەي­دىڭ ەنشىلەس بانكتەرىنەن («سبەر­بانك قازاقستان»، «الفا-بانك قازاقستان» جانە «ۆتب قازاقستان») العان اقپاراتى بويىن­شا، شەتەلدىك بانكتەر بانك­تەردىڭ شەتەلدىك كوررەسپون­دەنت-بانكتەردەگى شەتەل ۆاليۋ­تاسىن­داعى كوررەسپوندەنتتىك شوت­تارىنداعى قاراجاتتارىن بۇعات­تاعان. ءوز تاراپىنان اگەنت­تىك بانكتەرمەن بىرلەسىپ، رەسەي­دىڭ ەنشىلەس بانكتەرى كليەنت­تەرىنىڭ بۇعاتتالعان قاراجا­تىن قايتارۋعا بايلانىستى جاع­دايدى قاداعالايتىن بولادى»، دە­لىنگەن سىرتقى كوممۋنيكا­تسيا­لار باسقارماسىنىڭ حابارلاماسىندا.

سوڭعى جاڭالىقتار

دوللار باعامى ءوستى

قارجى • بۇگىن، 16:12

ۇقساس جاڭالىقتار