كەزدەسۋگە ادەبي جۋرنال رەداكتسياسىنىڭ ۇجىمى, پاۆلودار پەداگوگيكالىق ۋنيۆەرسيتەتىنىڭ جانىنان قۇرىلعان «قۇسقانات-عۇمىر» ادەبي بىرلەستىگىنىڭ مۇشەلەرى, وڭىرگە بەلگىلى اقىندار جانە ساربازدار قاتىستى.
جاس ساربازداردىڭ جاۋىنگەرلەرلىك رۋحىن كوتەرۋ ماقساتىندا وتكەن جيىننىڭ ءبىرىنشى بولىمىندە ءبولىم ساربازدارى اراسىندا سپورتتىق جارىس ۇيىمداستىرىلدى. جاۋىنگەرلەر ەڭ اۋەلى كەرمەدە تارتىلۋدان سىنعا ءتۇستى. جۋرنال رەداكتورى اسىل ءابىش ساربازدارعا ساتتىلىك تىلەپ, كەرمەگە ءبىرىنشى بولىپ ءوزى تارتىلدى. «وزدەرىڭدەي بىلەكتى دە, جۇرەكتى جاۋىنگەرلەرمەن جارىسقا ءتۇسىپ, باسەكەلەسەيىن دەگەن ويىمىز جوق. دەگەنمەن سەندەردىڭ شابىتتارىڭدى وياتىپ, جولدارىڭدى اشىپ بەرۋگە نيەتتىمىز», دەگەن اسىل ءالىمجان ۇلى 10 رەت تارتىلىپ, كوپشىلىكتىڭ قۇرمەتىنە بولەندى. كەزەك ساربازدارعا جەتتى. ءبولىمنىڭ ءۇش روتاسىنىڭ ساربازدارىنان قۇرالعان كوماندالىق سىندا «جاۋىنگەرلىك قامتاماسىز ەتۋ» روتاسىنىڭ ساربازدارى جەڭىمپاز اتاندى. ەكىنشى ورىندى ء«بىرىنشى جەدەل ماقساتتاعى» روتا يەلەندى. ال «ەكىنشى جەدەل ماقساتتاعى» روتا ساربازدارى ءۇشىنشى ورىنعا تۇراقتادى.
بۇدان سوڭ ساربازدار جاۋىنگەرلىك ەستافەتادان باق سىناستى. بۇل باسەكەدە «ەكىنشى جەدەل ماقساتتاعى» ورتانىڭ باعى جانىپ, كوش باستادى. ء«بىرىنشى جەدەل ماقساتتاعى» روتا ەكىنشى ناتيجە كورسەتسە, «جاۋىنگەردى قامتاماسىز ەتۋ» روتاسى ءۇشىنشى ورىن يەلەندى.
«اسكەري بولىمدەگى ادەبي كۇن» كەزدەسۋى رەداكتسيا ۇجىمى مەن ءبولىم ساربازدارىنىڭ ءان-جىر شاشۋىنا ۇلاستى. ادەبي كەشتى جۋرنالدىڭ جاۋاپتى حاتشىسى, ۇلتتىق ۇلان ساربازى, قاتارداعى جاۋىنگەر ەلامان قابدىلاشىم جۇرگىزدى. كەش شىمىلدىعىن جۋرنالدىڭ باس رەداكتورى اسىل ءابىش انا جايلى انمەن ءتۇردى. جىر كەشىن جۋرنالدىڭ ادەبي قىزمەتكەرلەرى التىن ايتقاليەۆا مەن ايگەرىم سولتان وتان تۋرالى, انا تۋرالى ولەڭدەرمەن جالعادى.
كەزدەسۋدىڭ قوناعى, ايتىسكەر اقىن, ۇلتتىق ۇلان ساربازى, قاراعاندى قالاسىنداعى 6505 اسكەري بولىمىندە مەرزىمدى اسكەري قىزمەتىن وتەگەن قاتارداعى جاۋىنگەر قۋاندىق باشوي ساربازدارعا ارناۋ جىرىن جولدادى.
ال «قۇسقانات-عۇمىر» ادەبي بىرلەستىگىنىڭ مۇشەلەرى ءابىلحان مارات ءابىلحان, ەسەنكەلدى جانىبەك, ايگەرىم م ۇلىكقىزى, كەربەز قابىتاەۆا, دانا سابىرباي جاۋىنگەرلەرگە ليريكالىق جىرلارىن تارتۋ ەتتى.
كەزەك ءبولىم ساربازدارىنا جەتكەندە, ولار دا ايانىپ قالمادى. سايدىڭ سەركە تاسىنداي قاتار ءتىزىلىپ, ساپتا تۇرعان سايىپقىرانداردىڭ ساپىندا ونەردى سەرىك ەتكەندەر از ەمەس ەكەن. كەزەك-كەزەك ساحناعا كوتەرىلىپ, ءبىرى دومبىرامەن, ءبىرى گيتارامەن ءان سالدى, ءبىرى جىر وقىدى. كەزدەسۋگە بەلسەندى ارالاسقان جاۋىنگەرلەر الماز نۇرمۇحانبەت, ارنا ريزابەك, الىشەر كەرىمقۇل, ەربول سەيىتقازى, ەرلان ساتىپالدى قارۋلاس قاتارلاستارىنىڭ قۇرمەتىنە بولەندى.
كەش جۇسىپبەك ايماۋىتوۆتىڭ «الاش اسكەرىنىڭ مارشى» ولەڭىمەن تۇيىندەلدى. «اسكەري بولىمدەگى ادەبي كۇن» كەزدەۋىنە اتسالىسقان ازاماتتارعا Ertis Media جشس-ءنىڭ ديرەكتورى ايدا حامزينانىڭ اتىنان العىس حاتتار تابىستالدى.
– قازاقستان رەسپۋبليكاسى ۇلتتىق ۇلانى 5512 اسكەري ءبولىمىنىڭ كومانديرى ايان اسكەربەك ۇلىنا, كەزدەسۋدى ۇيىمداستىرۋعا قولۇشىن سوزعان ءبولىم قىزمەتكەرى, اسكەري كلۋبتىڭ باسشىسى, اعا لەيتەنانت ەلدوس قابدراشيتوۆقا, سپورتتىق سايىستاردى وتكىزۋگە اتسالىسقان, اعا لەيتەنانت ءمادي نيگماتۋللينگە جانە ءىس-شارادا مۋزىكالىق اپپاراتۋرامەن قامتاماسىز ەتكەن, Shanyraq وبلىستىق حالىق شىعارماشىلىعى جانە مادەني-ساۋىق قىزمەتى ورتالىعىنىڭ باسشىسى جارقىنبەك امانتاي ۇلىنا العىس بىلدىرەمىز! جاس ۇرپاقتى اسكەري ومىرگە بەيىمدەپ, ەلىنىڭ ناعىز پاتريوتى بولۋعا تاربيەلەۋ جولىندا ءار ازامات ەڭبەك ەتۋى قاجەت. بۇل ماقساتتا ءسىز بەن ءبىزدىڭ ارقالار جۇگىمىز اۋىر, اتقارار ءىسىمىز وراسان. وسىناۋ مىندەتتى ورىنداۋ بارىسىندا ورناعان ىنتىماقتاستىق ءوز جەمىسىن بەرەدى دەگەن سەنىمدەمىن, – دەدى جۋرنالدىڭ باس رەداكتورى اسىل ءابىش.
ادەبي-پاتريوتتىق شارا اسكەري ءبولىمنىڭ مۋزەيىنە, كىتاپحاناسىنا جانە ساربازداردىڭ ءۇي-جايىنا ساياحات جاساۋمەن اياقتالدى.
پاۆلودار وبلىسى
