بايقاۋ وسى جولى ۇلتۇستازى احمەت بايتۇرسىن ۇلىنىڭ 150 جىلدىق مەرەيتويى جانە الماتى وبلىسىنىڭ 90 جىلدىعىنا وراي جاريالان-دى. ال بايقاۋدىڭ ماقساتى ۇلت ۇستازى احمەت بايتۇرسىن ۇلىنىڭ ەڭبەكتەرى مەن شىعارماشىلىعىن, الماتى وبلىسىنىڭ 90 جىلدىعىن كەڭىنەن ناسيحاتتاۋ, ۇلتتىق قۇندىلىقتاردى دارىپتەيتىن قازىرگى ادەبيەتتى دامىتۋ جانە وعان قولداۋ كورسەتۋ ەدى. بايقاۋ قاتىسۋشى اقىندارعا احمەت بايتۇرسىن ۇلىنىڭ 150 جىلدىق مەرەيتويىنا وراي «ەل بۇگىنشىل, مەنىكى ەرتەڭ ءۇشىن» تاقىرىبىنا ولەڭ ارناۋ ۇسىنىلسا, پروزا بايگەسى الماتى وبلىسىنىڭ 90 جىلدىعىنا ارنالدى. بايگەگە 18-35 جاس ارالىعىنداعى قالامگەرلەر, اقىندار, جۋرناليستەر, اۋداندىق, قالالىق ىرىكتەۋ كەزەڭىنەن وتكەن بايقاۋدىڭ جەڭىمپازدارى ءوز شىعارمالارىن جولداعان ەكەن.
– الماتى وبلىسىندا اقىن-جازۋشىلارعا, جاس قالامگەرلەرگە دەگەن قامقورلىق ەرەكشە. سونىڭ ءبىرى وسى – «اق قاۋىرسىن» ادەبي سىيلىعى. بايقاۋ بيىل بەسىنشى مارتە قالام ۇستاعان جاستاردىڭ شابىتىن اشىپ, ءارى قاراي شىعارماشىلىعىن شىڭداۋىنا وڭ سەرپىن بەرىپ وتىر. جالپى, بۇل بايقاۋ جەتىسۋ ولكەسىندەگى ادەبيەتشى قاۋىمنىڭ اسىعا كۇتەتىن مەرەيلى سالتاناتىنا, رۋحاني-ادەبي تانىمدىق شاراسىنىڭ كوش باسىندا تۇر, – دەيدى وبلىستىق تىلدەردى دامىتۋ باسقارماسىنىڭ باسشىسى راحمەت ەسداۋلەتوۆ.
وسىلايشا, قازىلار القاسىنىڭ شەشىمىمەن پوەزيا جانرى بويىنشا 1-ورىندى «جەتىسۋ» راديوسىنىڭ رەداكتورى ارشىن ايدىنبەك ۇلى يەلەندى. 2-ورىن «جەتىسۋ» گازەتىنىڭ ءتىلشىسى ماۋلەن انەربايعا بۇيىردى. سارقاندىق جاس اقىن سامال شەڭگەلباەۆا جۇلدەلى 3-ورىننان كورىندى. سونداي-اق الاكول اۋدانىنداعى مەكتەپ مۇعالىمى ماقسات دەڭگەلباي مەن ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ 2-كۋرس بىلىمگەرى ءادىل قۇتتىباەۆ ىنتالاندىرۋ سىيلىعىنا يە بولدى. ال پروزا جانرى بويىنشا 1-ورىندى جاس جازۋشى گۇلدەن جىلكەلديەۆا قانجىعاسىنا بايلاسا, ەكىنشى جۇلدەنى تالدىقورعاندىق ايگەرىم يەبەكوۆا ەنشىلەدى. جانە تالاپكەر قالامگەر ولجاس ناۋرىزباەۆقا ءۇشىنشى ورىن بۇيىردى.
الماتى وبلىسى
