ايتا كەتەرلىگى, بۇرىن ءماشھۇر ءجۇسىپ وقۋلارى تەك وبلىستىق دەڭگەيدە, ياعني ءبىزدىڭ ايماقتا عانا وتكىزىلىپ كەلگەن بولاتىن. رەسپۋبليكالىق دەڭگەيدە ۇيىمداستىرۋ العاش رەت 2019 جىلى قولعا الىنىپ, پاۆلودار قالاسىندا ەلەۋسىزدەۋ وتكەنى بار. «بۇل ءان بۇرىنعى اننەن وزگەرەك» دەمەكشى, بۇل شارانىڭ اۋقىمى كەڭ, مازمۇنى بولەك. شىعارماشىل جاس ورەندەر دوداسىن قازاقستان رەسپۋبليكاسى ءبىلىم جانە عىلىم مينيسترلىگى جانە «دارىن» رەسپۋبليكالىق عىلىمي-پراكتيكالىق ورتالىعىنىڭ قولداۋىمەن ۇيىمداستىرۋشى – پاۆلودار وبلىسى ءبىلىم بەرۋ باسقارماسىنىڭ «ەرتىس دارىنى» وڭىرلىك قوسىمشا ءبىلىم بەرۋ وقۋ-ادىستەمەلىك ورتالىعى.
سايىسقا 10 وبلىستان, نۇر-سۇلتان, الماتى, شىمكەنت قالالارىنان جانە 2 رەسپۋبليكالىق ءبىلىم بەرۋ ۇيىمىنان 58 ۇمىتكەر قاتىستى. پاۆلودار وبلىسى ءبىلىم بەرۋ باسقارماسى تاراپىنان جۇلدەگەرلەرگە تىگىلگەن جۇلدەلەر دە وسال بولمادى: باس جۇلدە يەگەرلەرىنە – نوۋتبۋك, ءى ورىنعا – ۇيالى تەلەفون, ءىى ورىنعا – سىمسىز قۇلاققاپ, ءىىى ورىنعا – Power Bank قۋاتتاۋ قۇرىلعىسى.
رەسپۋبليكالىق ءماشھۇر ءجۇسىپ وقۋلارىنىڭ ەستاي اتىنداعى بالالار مۋزىكا مەكتەبىندە ءوتۋى, مەكتەپتىڭ ونەرلى بالالارىنىڭ قوناقتاردى كۇمبىرلەگەن كۇيمەن قارسى الۋى, شاراعا باستان-اياق وبلىستىق ءبىلىم باسقارماسى باسشىسىنىڭ مىندەتىن اتقارۋشى ءا.ابەنوۆانىڭ باس-كوز بولۋى, پاۆلودار قالاسىنداعى ء«ماشھۇر ءجۇسىپ» قورى (پرەزيدەنتى – ەرتاي ءجۇسىپوۆ) تاراپىنان ءماشھۇر ءجۇسىپ شىعارمالارى توپتاستىرىلعان «جەتپىس باپ» كىتابىنىڭ مەيماندارعا سىيعا تارتىلۋى عۇلاما بابامىزدىڭ مۇراسىن ناسيحاتتاۋدى ماقسات تۇتقان شارانىڭ ءمان-ماڭىزىن اسىرا تۇسكەندەي.
شىعارماشىل ورەندەردىڭ جۇمىسىن سارالاعان قازىلار القاسىنىڭ قۇرامى تومەندەگىدەي: قارلىعاش سارەكەنوۆا (ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, ف.ع.ك.), اقىن سەرىكزات دۇيسەنعازى (ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, ف.ع.ك.), ماقسات الپىسبەس (ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, ت.ع.د.), ەرتاي ءجۇسىپوۆ (تورايعىروۆ ۋنيۆەرسيتەتى, ف.ع.ك.), ايتمۇحامەت تۇرىشەۆ (تورايعىروۆ ۋنيۆەرسيتەتى, ف. ع.ف.ك., پروفەسسور), باقىتگۇل قاپاسوۆا (تورايعىروۆ ۋنيۆەرسيتەتى, ف.ع.ك.), مايگۇل ورازحانوۆا (پاۆلودار پەداگوگيكالىق ۋنيۆەرسيتەتى, ف.ع.ك.), اقىن ايبەك ورالحان (پاۆلودار قالاسىنىڭ ورتالىقتاندىرىلعان كىتاپحانالار جۇيەسىنىڭ قىزمەتكەرى, قازاقستان رەسپۋبليكاسى جازۋشىلار وداعىنىڭ مۇشەسى), بوتاكوز قۇرالقانوۆا (پاۆلودار پەداگوگيكالىق ۋنيۆەرسيتەتى, ف.ع.ك.), اقىن-جازۋشى سەرىك ەلىكباي (تورايعىروۆ ۋنيۆەرسيتەتى, ف.ع.ك.), بايانگۇل قوجاحمەتوۆا (تورايعىروۆ ۋنيۆەرسيتەتى, گۋمانيتارلىق عىلىمدار ماگيسترى).
– ءمۇشايرادا 15 جاس دارىننىڭ ولەڭدەرىن تىڭدادىق, ولاردىڭ ءبارى قازاق پوەزياسىنىڭ كەلەشەك وكىلدەرى دەپ بىلەمىن. سايىستىڭ ماقساتى – جاس تالانتتاردىڭ تالابىن ۇشتاۋ, جاستاردى تاريحقا, شىعارماشىلىققا, ادەبيەتكە تاربيەلەۋ. تالانتتى بالالار ءوسىپ كەلە جاتقانىنا كوزىمىز جەتتى. الماتىدان كەلگەن دارىن بەكسۇلتان دەگەن ولەڭ جازىپ قانا قويماي, ونى وقۋى دا ەرەكشە ەكەن. قاتىسۋشىلار اراسىندا ۇستاز كورگەن جاس اقىندار بار. ولەڭ دەگەننىڭ ءبارى بىردەي شىعا بەرمەيدى. ورىن الماي قالعان بالادان دا مىقتى اقىن شىعادى. كەي اقىنداردىڭ ولەڭدەرى كاسىبي دەڭگەيگە كوتەرىلگەن. ءبىز ءتىپتى وزدەرىنە ولەڭ جازعىزىپ تا تەكسەرىپ كوردىك, – اقىن سەرىكزات دۇيسەنعازى.
ايتا كەتەرلىگى, ءماشھۇر ءجۇسىپ وقۋلارى اياسىندا قازاق ءتىلى مەن ادەبيەتى ءپانى مۇعالىمدەرى ءۇشىن ء«ماشھۇرتانۋ ماسەلەلەرى جانە وقۋشىلاردى ادەبي وقۋعا دايىنداۋ ادىستەمەسى» تاقىرىبىندا سەمينار ۇيىمداستىرىلىپ, قاتىسۋشىلارعا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وقىتۋشىسى, فيلولوگيا عىلىمدارىنىڭ كانديداتى قارلىعاش سارەكەنوۆا جانە تورايعىروۆ ۋنيۆەرسيتەتىنىڭ گۋمانيتارلىق عىلىمدار ماگيسترى بايانگۇل قوجاحمەتوۆا ادىستەمەلىك ءدارىس وقىدى.
بايقاۋ سوڭىندا قاتىسۋشىلار, جەتەكشىلەر جانە قازىلار القاسىنىڭ مۇشەلەرى ەسكەلىگە ساپار شەگىپ, ءماشھۇر ءجۇسىپ كوپەي ۇلىنىڭ رۋحىنا ءتاۋ ەتتى.
پاۆلودار وبلىسى,
ەكىباستۇز قالاسى
