سپورت • 22 مامىر، 2022

ءالىمحان ۇلىنىڭ اپپەركوتى

اقش-تىڭ لاس-ۆەگاس قالاسىنداعى كاسىپقوي بوكس كەشىنىڭ باستى جەكپە-جەگى «Qazaq style» دەگەن بۇركەنشىك ەسىممەن تانىلعان جانىبەك ءالىمحان ۇلى مەن ۇلىبريتانيالىق دەنني ديگنۋم اراسىندا ءوتتى.

عالىم سۇلەيمەن

بۇل جەكپە-جەكتە WBO نۇسقاسى بويىنشا ورتا سالماقتاعى «ۋاقىتشا» الەم چەمپيونى اتاعى ساراپقا سالىندى. لاس-ۆەگاستا قارسىلاس اتانعان بوكسشىلار ءبىر-ءبىرىن بۇرىننان جاقسى تانيتىن بولىپ شىقتى. وسىدان توعىز جىل بۇرىن، ياعني 2013 جىلى قازاق ەلىنە ۇلىبريتانيا بوكسشىلارى كەلىپ، ءبىزدىڭ جىگىتتەرمەن بىرلەسكەن وقۋ-جاتتىعۋ جيىنىن وتكىزدى.

سول كەزدە ولار سپاررينگكە شىققان ەكەن. باق وكىلدەرىنە بەرگەن سۇحباتىندا دەنني: ء«يا، سول كەزدە جانىبەكپەن جولىم تۇيىسكەنى راس. بىراق بۇل جاتتىعۋ جيىنى بولعاندىقتان، قۇمارىمىز قانعانشا ايقاسا المادىق. تەك ءبىر-ەكى راۋند قانا قولعاپ تۇيىستىرۋمەن شەكتەلدىك. ودان بەرى تالاي جىلدىڭ ءجۇزى بولدى. ۋاقىت وزا ەكەۋىمىزدىڭ دە شەبەرلىك دەڭگەيىمىزدىڭ ارتقانى انىق. ال مەنىڭ قانشالىقتى وسكەنىمدى الداعى جەكپە-جەكتە انىق بايقايتىن بولاسىزدار»، دەپ اقتارىلا سويلەگەن ەدى.

بارشا قازاقستاندىق جانكۇيەر تاعاتسىزدانا كۇتكەن بۇل جەكپە-جەك ۇزاققا سوزىلمادى. باسەكە باستالعان بەتتە جانىبەك قارسىلاسىن بىردەن قىسپاققا الدى. جويقىن سوققىلارىن ءدال دارىتىپ، وعان ەش باس كوتەرتكەن جوق. ءبىرىنشى راۋندتىڭ وزىندە نوكداۋن بەلگىلەندى. تورەشى ونعا دەيىن ساناعانشا ديگنۋم ەسىن جيىپ ۇلگەردى. بىراق قازاق بوكسشىسى قارقىنىن ەش باسەڭدەتپەدى. ۇنەمى شابۋىل وتىندە جۇرگەن ءالىمحان ۇلى ەكىنشى راۋندتىڭ سوڭعى مينۋتىندا بريتانيالىقتى كەرمە ارقانعا تىرەپ قويىپ، وڭدىرماي سابادى. ءۇش-ءتورت اۋىر سوققى ءدال تيگەننەن سوڭ دەننيدىڭ قورعانۋعا دا شاماسى كەلمەدى. سوڭىندا جانىبەك سول قولىمەن يەكتىڭ استىنان وڭدىرماي ۇردى. وسى اپپەركوتتان كەيىن قارسىلاسى ەسىنەن تانىپ، ەدەنگە وڭباي قۇلادى. نوكاۋت!

ءيا، بۇل كەشتە ءبارى قازاقشا بولدى. «دەننيدى ۇرىپ جىعامىن» دەگەن جانىبەك سوزىندە تۇردى. «بۇگىنگى كەشتە «قازاق ءستيلىنىڭ» قۇدىرەتىن كۇللى الەمگە پاش ەتەمىن» دەگەن قانداسىمىز جوسپارىن ويداعىداي جۇزەگە اسىرىپ، كوزدەگەن ماقساتىنا قول جەتكىزدى. «ۋاقىتشا» الەم چەمپيونى اتاعى ءۇشىن جەكپە-جەكتىڭ التى مينۋتقا جەتپەي اياقتالۋى جوعارىدا ايتىلعان ءسوزىمىزدىڭ ايقىن دالەلى. ول از دەسەڭىزدەر، وسى كەزدەسۋ قارساڭىندا دا، كەزدەسۋدەن كەيىن دە اعىلشىنشا قويىلعان ساۋالداردىڭ بارلىعىنا ءالىمحان ۇلى تەك ءوزىنىڭ انا تىلىندە عانا جاۋاپ بەردى. وسى جايتتىڭ ءوزى باتىلدىق پەن باتىرلىقتان بولەك، كەيىپكەرىمىزدىڭ بويىندا قازاقى رۋح پەن قازاقى نامىستىڭ دا باسىم ەكەنىن انىق اڭعارتتى.

وسىلايشا، 29 جاستاعى جانىبەك ءالىمحان ۇلى كاسىپقوي رينگتەگى ءوزىنىڭ 12-ءشى جەكپە-جەگىن وتكىزدى. سول باسەكەلەردىڭ بارلىعىندا جەڭىسكە جەتىپ، سەگىز قارسىلاسىن نوكاۋتقا جىبەردى. ەندى بارشا الاش جۇرتى قانداسىمىزدىڭ «تولىققاندى» الەم چەمپيونى اتاعى ءۇشىن تالاساتىن ءساتىن تاعاتسىزدانا كۇتەدى. ول كۇنگە دە از قالدى، اعايىن!

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز