سپورت • 22 مامىر، 2022

«رولان گارروس» باستالدى

23 رەت كورسەتىلدى

فرانتسيانىڭ استاناسى پاريجدە «رولان گارروس» ءتۋرنيرى باستالدى. جۇلدە قورى 43،6 ملن ەۋرونى قۇرايتىن «ۇلكەن دۋلىعا» ساناتىنداعى جارىستا بيىل دا اتاعى الىسقا جايىلعان تەننيسشىلەردىڭ باسىم بولىگى ونەر كورسەتۋدە. سولاردىڭ قاتارىندا قازاقستاننىڭ دا وكىلدەرى بار. ايگىلى ويىنشىلار اراسىنان تەك فرانتسيالىق گاەل مونفيس پەن رەسەيلىك اناستاسيا پاۆليۋچەنكوۆا عانا ءتۇرلى سەبەپتەرگە بايلانىستى پاريجگە كەلۋدەن باس تارتتى.

131 جىلدىق تاريحى بار «رولان گارروستا» تابىستى ونەر كورسەتۋ قاي تەننيسشىگە بولسىن ۇلكەن ابىروي جانە زور مارتەبە. بۇل رەتتە رە­كوردتىق كورسەتكىش رافاەل نا­دال­عا تيەسىلى ەكەنىن ايتا كەتكەن ابزال. «گرۋنت كورولى» اتانعان 35 جاستاعى يسپانيانىڭ ساڭلاعى 2005-2020 جىلدار ارالىعىندا 13 مارتە تەڭدەسسىز دەپ تانىلدى. حح عاسىردىڭ باسىندا داڭقى دۇركىرەگەن فرانتسيانىڭ ماقتانىشى ماكس دەكيۋجي سەگىز دۇركىن جەڭىمپاز اتاندى. شۆەتسيانىڭ بەتكەۇستارى بورن بورگ التى جارىستا الدىنا جان سالمادى. ونىڭ جۇلدىزى وتكەن عاسىردىڭ جەتپىسىنشى جانە سەكسەنىنشى جىلدارىنىڭ باسىندا جارقىراي جاندى. تاعى ءبىر فرانتسۋز تەننيسشىسى انري كوشە 1922-1932 جىلدار ارالىعىندا بەس تۋرنيردە توپ جاردى.

ايەلدەر اراسىندا كريس ەۆەرت­كە تەڭ كەلەر ەشكىم جوق. اقش-تىڭ فلوريدا شتاتىنىڭ تۋماسى باس جۇلدەنىڭ جەتەۋىن ولجالادى. ول 1974-1986 جىلدارى ەشكىمدى بەت قاراتپادى. فرانتسيالىق سيۋزان لەنگلەن مەن گەرمانيالىق شتەففي گراف التى دودادا دارا شىقتى. اۋستراليالىق مارگارەت كورتتىڭ بەس مارتە مەرەيى ۇستەم بولدى.  

بىلتىرعى جارىستىڭ باس جۇلدەسى سەربيالىق نوۆاك دجوكو­ۆيچ پەن چەحيالىق باربورا كرەي­چيكوۆاعا بۇيىردى. فينالدا دجوكوۆيچ گرەكيانىڭ وكىلى ستە­فانوس تسيتسيپاستى ۇتسا، كرەي­چيكوۆا رەسەيلىك اناستاسيا پاۆ­ليۋچەنكوۆانى جەڭدى. ەرلەر­دىڭ جۇپتىق سايىسىندا الەكساندر بۋبليك پەن اندرەي گولۋبەۆ كەرەمەت ونەر كورسەتتى. قارسى كەلگەندەردى قوعاداي جاپىرعان ولار اقتىق سىنعا دەيىن ال­قىنباي جەتتى. الايدا فينالدا جەرلەستەرىمىزدىڭ جولى بولمادى. قازاقستاندىق جۇپ فرانتسيانىڭ مىقتىلارى نيكوليا مايۋ مەن پەر يۋگ-ەبەرگكە 6:4، 6:7، 4:6 ەسەبىمەن ەسە جىبەردى. ايەل­دەر سايىسى چە­حيالىق بار­بورا كرەيچيكوۆا مەن كاتەرينا سي­نيا­كوۆانىڭ ايقىن جەڭىسىمەن اياقتالدى. ارالاس جۇپتار باسە­كەسىندە امەريكالىق دەزاير كراۆچيك پەن ۇلىبريتانيالىق دجو سولسبەريدىڭ باعى جاندى.

بىلتىر الەكساندر بۋبليك پەن اندرەي گولۋبەۆتىڭ «رولان گار­روستىڭ» فينالىنا دەيىن جەت­كەنىن جوعارىدا ايتتىق. 2015 جىلى اۋستراليالىق كەيسي دەل­لاككۆامەن جۇپ قۇرعان يارو­سلاۆا شۆەدوۆا دا ءدال وسى مەجەدەن كورىنگەن ەدى. فينالدا ولار امەريكالىق بەتاني ماتتەك-ساندس پەن چەحيالىق لۋتسيا شا­فارجوۆاعا 6:3، 4:6، 2:6 ەسەبىمەن جول بەردى. مىنە، قازاقستاندىق تەننيسشىلەردىڭ فران­تسياداعى تۋرنيردە ەڭ تابىستى ونەر كورسەتكەن كەزدەرى وسى. 

«رولان گارروستىڭ» جەكەلەگەن سايىسىندا كۇنى بۇگىنگە بىردە-ءبىر جەرلەستەرىمىز شيرەك فينالدان اسا العان جوق. ياروسلاۆا شۆەدوۆا 2010 مەن 2012 جىلدارى جانە يۋليا پۋتينتسەۆا 2016 مەن 2018 جىلدارى تاڭداۋلى سەگىز ويىنشىنىڭ قاتارىنا قوسىلدى. بىلتىر ەلەنا رىباكينا دا ءدال سول مەجەگە جەتتى. اتالعان دودادا فرانتسيالىق ەلزا جاكەمو، جاپونيالىق نامبو حيبينو، رە­سەيلىك ەلەنا ۆەسنينا جانە داڭقى جەر جارعان اقش-تىڭ ويىنشىسى سەرەنا ءۋيليامستى سان سوقتىرعان جەرلەسىمىز جارتىلاي فينالدىڭ جولداماسى ساراپقا سالىنعان باسەكەدە رەسەيدىڭ بەتكەۇستارى اناستاسيا پاۆليۋچەنكوۆادان 7:6، 2:6، 6:7 ەسەبىمەن جەڭىلدى.

ەلەنا رىباكينا، يۋليا پۋ­تينتسەۆا جانە الەكساندر بۋب­ليك بيىلعى جارىسقا قاتىسۋ مۇم­كىندىگىنە بىردەن يە بولدى. سەبەبى ولاردىڭ بارلىعى دا دۇنيە­­جۇزىلىك رەيتينگتە «توپ-40» ويىنشىنىڭ قاتارىنا ەركىن ەنىپ وتىر. العاشقى اينالىمدا رىباكينا نيدەرلاندتىق ارانچا رۋسپەن شەبەرلىك بايقاسادى. تۇساۋ­كەسەر كەزدەسۋىن پۋتينتسەۆا رۋمىنيالىق يرينا باراعا قارسى وتكىزەدى. ال بۋبليك فرانتسيالىق ارتۋر ريندەركنەشپەن كۇش سىناسادى.

تاعى بىرنەشە وتانداسىمىز ىرىكتەۋ تۋرنيرىنە قاتىستى. وكى­نىشكە قاراي، تۇساۋكەسەر كەز­دەسۋلەرىندە زارينا دياس رەسەيلىك اناستاسيا گاسانوۆادان، دميتري پوپكو ارگەنتينالىق حۋان-يگ­ناسيو لوندەرودان ۇتىلدى. ولار­عا قاراعاندا تيموفەي سكا­توۆ ءتاۋىر وينادى. 21 جاستاعى تيموفەي العاشقى اينالىمدا امەريكالىق ميتچەلل كريۋگەردى 6:1، 6:0 ەسە­بىمەن ويسىراتا ۇتتى. ەكىنشى كە­زەڭدە ول ارگەنتينانىڭ جاس دارىنى سانتياگو فا رودريگەس تاۆەر­نومەن كۇش سىناستى. بۇل ويىن 7:5، 6:1 ەسەبىمەن وڭتۇستىك امە­ريكادان كەلگەن ويىنشىنىڭ پاي­داسىنا شەشىلدى. ءسويتىپ، «رولان گارروستىڭ» نەگىزگى بولى­گىندە قازاقستاننىڭ ءۇش تەننيسشىسى عانا ونەر كورسەتەدى.

سوڭعى جاڭالىقتار

دوللار باعامى ءوستى

قارجى • بۇگىن، 16:12

ۇقساس جاڭالىقتار