الەم چەمپيوناتىندا بەس جۇلدە الۋ وتە جاقسى كورسەتكىش ەكەنى ەش داۋ تۋعىزبايدى. ادەتتە جەرلەستەرىمىز اتالعان جارىستا ەكى-ءۇش مەدالدى ەنشىلەۋمەن عانا شەكتەلۋدە. قازاقستاننىڭ ايەلدەر قۇراماسى ءوزىنىڭ ەڭ زور تابىسىنا وسىدان التى جىل بۇرىن استانادا قول جەتكىزدى. 2016 جىلى جالاۋى جەلبىرەگەن جارىستا 4 التىن مەن 2 قولا مەدالدى يەلەنىپ, جالپى كوماندالىق ەسەپتە كوش باستاعان ەدىك. مىنە, ەندى ىستانبۇلدا بەس بوكسشىمىز جەڭىس تۇعىرىنا كوتەرىلدى. دەسەك تە قازاق جانكۇيەرلەرىنىڭ بۇل كورسەتكىشكە «كوڭىلى تولدى» نەمەسە «بورىكتەرىن اسپانعا اتىپ قۋاندى» دەپ ايتا المايمىز. وسىلايشا وي قورىتۋىمىزدىڭ وزىندىك سەبەپتەرى دە بار.
بىرىنشىدەن, انادولى ەلىنە ساپار شەككەن 12 بىلعارى قولعاپ شەبەرىمىزدىڭ تەڭ جارتىسى تۇساۋكەسەر كەزدەسۋىندە ءسۇرىندى. وزگەلەردى ايتپاعاندا, نازىم قىزايباي (50 كيلو) مەن داريعا شاكىموۆانىڭ (66 كيلو) شابىسىنان جاڭىلعانىن تۇسىنە المادىق. العاشقىسى – الەمنىڭ ەكى دۇركىن چەمپيونى, سول جارىستىڭ قولا جۇلدەگەرى, ازيا بىرىنشىلىگىنىڭ جەڭىمپازى. ەكىنشىسى – ريو وليمپياداسىنىڭ قولا جۇلدەگەرى, ازيانىڭ ەكى دۇركىن چەمپيونى. ءيا, قىزايبايدىڭ قارسىلاسى مىقتى بولعانى راس. كولۋمبيالىق ينگريت ۆالەنسيانىڭ وسىدان التى جىل بۇرىن ريو-دە-جانەيرودا الاۋى تۇتانعان وليمپيا ويىندارىندا ءۇشىنشى ورىنعا تابان تىرەگەنى ەسىمىزدە. بىراق قانداسىمىز دا قارا جاياۋ ەمەس. ونىڭ دا اتاعى دارداي. جانە دە نازىم ودان باقانداي بەس جاس كىشى. سول 33 جاستاعى ارداگەر سپورتشىنى ەل ماقتانىشىنا اينالعان بوكسشىمىزدىڭ سان سوقتىرا الماعانى تاڭعالدىردى.
داڭقتى داريعا شاكىموۆانىڭ ەسىمى كوپشىلىككە بەيمالىم ناۆباحور حاميدوۆامەن كۇش سىناساتىنىن ەستىگەندە, ونىڭ «ەكى اياعىن ءبىر ەتىككە تىعاتىن شىعار» دەپ ويلادىق. بىراق وزبەك قىزى وسال بولماي شىقتى. ول الداپ-ارباپ ءجۇرىپ-اق, شاكىموۆانى شاڭ قاپتىرىپ كەتتى.
اتاعى الىسقا جايىلعان ءلاززات كۇنگەيباەۆا (81 كيلو) سۇرىنگەندە, ءتىپتى ايتارعا ءسوز تابا الماي قالدىق. اسا اۋىر سالماقتا ايقاسىپ جۇرگەن جەرلەسىمىز كەزىندە الەم جانە ازيا چەمپيونى, الەم چەمپيوناتىنىڭ ءفيناليسى, قۇرلىق بىرىنشىلىگىنىڭ ءتورت دۇركىن جۇلدەگەرى اتاندى. 34 جاستاعى بوكسشىمىز تۇركيالىق شەنۋر دەميرمەن شەبەرلىك بايقاستى. ول دا الەم جانە ەۋروپا چەمپيوناتتارىندا ەكى رەتتەن جەڭىس تۇعىرىنا كوتەرىلگەن ساقا سپورتشى. ەكەۋارا ايقاس وتە شيەلەنىستى ءوتتى. تورەشىلەردىڭ جەرگىلىكتى بوكسشىعا بۇيرەكتەرى بۇرعانى راس. بىراق كۇنگەيباەۆانىڭ 40 جاستاعى قارسىلاسىن قاپى قالدىراتىنداي ءجونى بار ەدى. سول سەكىلدى توكيو وليمپياداسىنا قاتىسقان نادەجدا ريابەتس (75 كيلو) جانە تالاي دۇرمەكتە ىسىلعان ريمما ۆولوسەنكو (60 كيلو) مەن جاس دارىن ايدا ابىكەەۆادان (63 كيلو) دا ەش قايىر بولمادى.
جارتىلاي فينالعا جولداما العان بەس بوكسشىمىزدىڭ تورتەۋى جەڭىلىستىڭ كەرمەك ءدامىن تاتقاندا دا كوڭىلىمىز قاتتى قۇلازىدى. اسىرەسە, ەكى بىردەي الەم چەمپيونى – دينا جولامان (54 كيلو) مەن ۆالەنتينا حالزوۆاعا (70 كيلو) ايرىقشا سەنىم ارتتىق. ەكەۋىنىڭ دە قارسىلاستارى اسا قارۋلى ەمەس ەدى. دينا رۋمىنيالىق لاكراميوارا پەريشوچتىڭ «جەتەگىندە» كەتتى. ۆالەنتينا موزامبيكتىك السيندا حەلەنا پانگۋانى جاپ-جاقسى ساباپ جاتىپ, قاپيادا نوكداۋنعا ءتۇسىپ قالدى. سول نوكداۋن باسەكەنىڭ تاعدىرىن شەشتى. سول سەكىلدى جاينا شەكەربەكوۆا (52 كيلو) مەن كارينا يبراگيموۆا (57 كيلو) دا كەڭىنەن كوسىلە العان جوق.
جارىس قورىتىندىسى بويىنشا تۇركيانىڭ – جەتى, قازاقستاننىڭ – بەس, تايلاند پەن ءۇندىستاننىڭ – ءۇش, وزبەكستان, برازيليا, يتاليا, يرلانديا, الجير, كانادا, موزامبيك, پولشانىڭ – ەكى, بولگاريا, ارگەنتينا, يسپانيا, كولۋمبيا, رۋمىنيا, تايپەي, كوسوۆو, اقش, پاناما, فرانتسيا, اۋستراليا, ليتۆا, ماروككو جانە نيدەرلاندتىڭ ءبىر بوكسشىسى جارتىلاي فينالدا كۇش سىناستى. اتالعان جارىستا جەڭىپ العان جۇلدەلەردىڭ سانى بويىنشا جەرلەستەرىمىز ەكىنشى ورىندى يەلەندى. ارينە, بۇل – جاقسى ناتيجە. الايدا ءبىزدى الاڭداتىپ وتىرعانى – التىننىڭ جوقتىعى. ياعني ساپانىڭ تومەندىگى.
