سەنات توراعاسى بىرىككەن اراب امىرلىكتەرىنىڭ قازاقستانداعى ەلشىلىگىندە بولعان كەزدە كوڭىل ايتۋ كىتابىنا جازبا قالدىردى.
ماۋلەن اشىمباەۆ شەيح حاليفا بەن زايد ءال ناحايان مۇسىلمان الەمىندەگى جارقىن كوشباسشىلاردىڭ ءبىرى جانە قازاقستاننىڭ تاتۋ دوسى بولعانىن اتاپ ءوتتى.
«ول ءبىزدىڭ ەلدەرىمىز اراسىنداعى ەكى جاقتى ارىپتەستىكتى دامىتۋعا زور ۇلەس قوستى. ءبىزدىڭ ەلىمىزدە جۇزەگە اسىرىلعان ماڭىزدى الەۋمەتتىك, ينفراقۇرىلىمدىق جانە ينۆەستيتسيالىق جوبالار ونىڭ ەسىمىمەن بايلانىستى», دەدى ول.
سەنات توراعاسى اتاپ وتكەندەي, 15 مامىردا مەملەكەت باسشىسى قاسىم-جومارت توقاەۆ ءابۋ دابيگە بارىپ, شەيح حاليفا بەن زايد ءال ناحاياننىڭ قايتىس بولۋىنا بايلانىستى جەكە كوڭىل ايتقان بولاتىن.
«شەيح حاليفا بەن زايد ءال ناحايان بىرىككەن اراب امىرلىكتەرىنىڭ ناعىز كوشباسشىسى رەتىندە مەملەكەتتىڭ ءوسىپ-وركەندەۋىنە اۋقىمدى ۇلەس قوستى. ول سونداي-اق قازاقستان مەن امىرلىكتەر اراسىنداعى قارىم-قاتىناستىڭ نەگىزىن قالاۋدا جانە ءوزارا دوستىق پەن ىنتىماقتاستىقتى نىعايتۋدا ۇلكەن ءرول اتقاردى. ونىڭ ەكىجاقتى بايلانىستى ارتتىرۋعا سىڭىرگەن ەسەلى ەڭبەگىن ءاردايىم زور قۇرمەتپەن ەسكە الامىز. سىزدەردىڭ قايعىلارىڭىزعا ورتاقتاسا وتىرىپ, جەكە ءوزىمنىڭ جانە سەنات دەپۋتاتتارىنىڭ اتىنان قايعىرىپ كوڭىل ايتامىن», دەپ اتاپ ءوتتى سەنات توراعاسى.
بىرىككەن اراب امىرلىكتەرىنىڭ پرەزيدەنتى جانە ابۋ-دابي بيلەۋشىسى, جوعارى مارتەبەلى شەيح حاليفا بەن زايد ءال ناحايان 2022 جىلدىڭ 13 مامىرىندا جۇمادا قايتىس بولعان ەدى. ول 2004 جىلدىڭ 3 قاراشاسىنان باستاپ ءباا پرەزيدەنتى جانە ابۋ-دابي بيلەۋشىسى بولدى.
