وتىرىس بارىسىندا سەناتورلار كونستيتۋتسياعا ەنگىزىلگەن وزگەرىستەر ەلىمىزدە جۇرگىزىلىپ جاتقان ساياسي رەفورمالار اياسىندا جۇزەگە اسىرىلىپ جاتقانىن اتاپ ءوتتى. اقىلبەك كۇرىشباەۆ جينالعانداردىڭ نازارىن كونستيتۋتسياعا ەنگىزىلگەن وزگەرىستەر اياسىندا جەر ماسەلەسى تۇبەگەيلى وزگەرتىلەتىنىنە اۋداردى. جەر حالىقتىڭ مەنشىگىنە اينالادى.
«بۇل وزگەرىستەر جاڭا قازاقستاندى قۇرۋدىڭ نەگىزى بولادى. سوندىقتان جاستاردىڭ مۇنى ءتۇسىنىپ, رەفەرەندۋم ناۋقانىنا قاتىسۋى وتە ماڭىزدى. بىزدە اقىلدى, ونەرلى وقۋشىلار كوپ ەكەنىن بىلەمىن. سوندىقتان مەن ەلىمىزدىڭ بولاشاعىنا تولىق سەنىمدىمىن», دەدى دەپۋتات.
سەناتور ءلاززات سۇلەيمەن بۇل شەشىمدەر مەن وزگەرتۋلەر ارقىلى مەملەكەت باسشىسى «سۋپەرپرەزيدەنتتىك» باسقارۋ جۇيەسىنەن كۇشتى پارلامەنتى بار پرەزيدەنتتىك باسقارۋ جۇيەسىنە كوشۋ تۋرالى شەشىم قابىلداعانىن ايتتى. ءوز كەزەگىندە دەپۋتات ەدىل مامىتبەكوۆ كونستيتۋتسياعا وزگەرىستەر مەن تولىقتىرۋلاردىڭ جالپىحالىقتىق رەفەرەندۋمدا ەنگىزىلۋى تاريحي وقيعا ەكەنىن باسا ايتىپ, بۇل ۇدەرىسكە بارشا قازاقستاندىقتاردىڭ قاتىسۋىنىڭ ماڭىزدىلىعىن اتاپ ءوتتى.
سونىمەن قاتار, كەزدەسۋ بارىسىندا ستۋدەنتتەر سەناتورلارعا مەملەكەتتىك ءتىلدى دامىتۋ, جەردى پايدالانۋ سەكىلدى وزدەرىن قىزىقتىرعان سۇراقتاردى قويدى.
