وسىدان 5-6 جىل بۇرىن الاتاۋدان دا ءتۇتىن شىقپاي قالا ما دەپ الاڭ قىلدىق. حالىققا تاۋدىڭ ەتەگىندەگى تۋعان مەكەندى قيىپ كەتۋ وڭاي بولعان جوق. قار مەن بالشىقتان كوز اشپايتىن جول قاتىناسى امالسىزدان ءبىر شەشىم قابىلداۋعا ءماجبۇر ەتتى. سوڭعى شەشىم – كوشۋ ەدى. حالىق قوزعالدى. ۇيلەر بۇزىلدى. كەشەگى ۇزىن كوشەدەن كوشكەن جۇرتتىڭ ورنى عانا قالدى. تەك ءبىر عانا ۇيدەن ءتۇتىن شىعىپ تۇردى. ول – مالىك ساركەەۆتىڭ ءۇيى ەدى.
ەلتاي اۋىلدىق وكرۋگىنىڭ اكىمى راشيد بايىروۆپەن بىرگە الاتاۋعا اتتاندىق.
«ويلى-قىرلى جەرلەرمەن, ىتقىپ-ىتقىپ جۇگىرگەن» اق قويانداي اق «نيۆامەن» بورلى تاۋدىڭ باۋرايىنا دا جەتتىك. مالىك اعامىزدىڭ مال تۇگەندەپ كەلىپ, جيرەنىن شىدەرلەپ, وتقا جىبەرىپ جاتقان بەتى ەكەن. ول 2015 جىلى جەكە شارۋاشىلىق قۇرىپ, سونىڭ جۇمىسىن قولعا الىپتى. تابىسسىز دا ەمەس كورىنەدى. ەرىنبەگەنگە, كوزىن تاپقانعا قاي جەردە دە جۇمىس بار عوي. «قازىر جالعىز ەمەسپىن. الاتاۋعا 5 بىردەي شارۋاشىلىق ىرگە سالدى. ءتورت ت ۇلىك ءۇشىن قولايلى ءوڭىر عوي. ەل كوبەيەدى دەپ ويلايمىن», دەيدى «ستان» قوجالىعىنىڭ يەسى.
مالىك اعامىز بايقاعان ءبىر دۇنيە بار ەكەن. سەنبى مەن جەكسەنبى بولسا, الاتاۋعا كولىك اعىلاتىن كورىنەدى. «كەلگەندەر بەيىت باسىنا ايالدايدى. كەيىن ەسكى كوشەنى ارالاپ, ۇيلەرىنىڭ ورىندارىنا توقتايدى. ءبىر كەزدەرى وسى الاتاۋدان كوشكەن وتباسىلارى ەكەنى بىردەن بەلگىلى. ساعىنىش قوي!», دەيدى مالىك اعا.
ارعى جاقتاعى قىراتتا توتە جازۋمەن ناقىشتالعان كونە قۇلپىتاستار قارايادى. قارسى بەتتە بورلى تاۋ تۇر. ەتەگىندە سىلدىراپ بۇلاق اعىپ جاتىر. ءبىز سىلدىرادى دەيمىز, بالكىم ول ساعىنىشتىڭ ءانىن ايتىپ جاتقان شىعار...
باۋىرجان شيرمەدين ۇلى
باتىس قازاقستان وبلىسى,
سىرىم اۋدانى
