قوعام • 18 مامىر، 2022

ۇيىمشىلدىق – ىرگەلى ىستەر باستاۋى

33 رەت كورسەتىلدى

9 مامىر كۇنى ساۋلە اۋىلىندا جەڭىستىڭ 77 جىلدىعىنا وراي ايتارلىقتاي اۋقىمدى ءىس-شارا ۇيىمداستىرىلدى. بۇل يگىلىكتى ىسكە مەيرام قايرات، باقىتجان قۇتتىبەك، نۇرتىلەك قايىر، قانات قۇسايىن سياقتى جاڭاشىل اۋىل جاستارى ۇيىتقى بولسا، ەگىن شارۋاشىلىعىمەن اينالىساتىن Saule SNK جانە قيىرشىق تاس وندىرەتىن «قۇم» فيرمالارى دەمەۋشىلىك كومەك كورسەتتى.

ءوز قالتالارىنان اقشا شىعارىپ، ورتاق ىسكە ۇلەس قوسقان اۋىل ازاماتتارى دا كوپشىلىكتىڭ ريزاشىلىعىنا بولەنگەنىن ايتا كەتكەن ورىندى.

جالپى، ەگەمەن ەلىمىزدىڭ تاريحىندا 9 مامىردىڭ ورنى ەرەكشە ەكەنى بەلگىلى. سول سۇراپىل سوعىسقا شاعىن عانا اۋىلىمىزدان جۇزدەن استام ەر-ازامات اتتانسا، سول بوزداقتاردىڭ جارتىسىنان كوبى قان مايداندا ەرلىكپەن قازا تاپتى. قانشاما ۇل-قىز اكەسىز، اتا-انا بالاسىز زار جىلاپ قالدى. كوپتەگەن شاڭىراق وپىرىلىپ ورتاسىنا ءتۇستى. مۇنداي كۇندى ۇمىتۋعا بولا ما؟ ارينە، جوق!

«بۇل كۇن – ەرلىكپەن ەل قورعاعان اتالارىمىز بەن اكەلەرىمىزدىڭ، اجەلەرىمىز بەن انالارىمىزدىڭ رۋحىنا باس ءيىپ، تاعزىم ەتەتىن كۇن. بۇل كۇن – ءفاشيزمدى جەر جاستاندىرعان ەسىل ەرلەردىڭ ەرەن ەرلىگىن جادىمىزدا جاڭعىرتاتىن كۇن. ەلىنىڭ ازاتتىعى مەن ۇرپاقتىڭ جارقىن بولاشاعى ءۇشىن جانىن پيدا ەتكەن بوزداقتارىمىزدى ماڭگى ەستە ساقتاۋ – قاسيەتتى بورىشىمىز»، دەدى جينالعان جۇرتشىلىق الدىندا ءسوز سويلەپ، وسكەلەڭ ۇرپاقتى اتا بۋىننىڭ ەرلىك ىستەرىنەن ۇلگى الۋعا شاقىرعان زەينەتكەر ۇستاز قايىنجامال سۇلەيمەنوۆا.

ال مەرەكەلىك ءىس-شارا ات جارىسىنان باستالىپ، كوكپار، تەڭگە ءىلۋ، قازاق كۇرەسى سەكىلدى سالت-ءداستۇرىمىزدى ۇلىقتاعان ۇلتتىق ويىندارعا ۇلاستى. وعان كورشى اۋىلداردان دا شاباندوزدار مەن كوكپارشىلار جانە بالۋاندار كەلىپ قاتىسىپ، جارىس كورىگىن قىزدىرا ءتۇستى. سوڭىندا جەڭىمپازدار مەن جۇلدەگەرلەرگە اقشالاي سىيلىق تاپسىرىلدى. اۋىلدىڭ ەڭبەكتەگەن بالاسىنان ەڭكەيگەن كارىسىنە دەيىن قاتىسقان اۋقىمدى ءىس-شارا سوڭى جەرگىلىكتى ونەرپازداردىڭ كۇشىمەن قويىلعان كونتسەرتپەن قورىتىندىلاندى.

 

جامال سماعۇل،

ارداگەر ۇستاز،

ى.التىنسارين توسبەلگىسىنىڭ يەگەرى

اقمولا وبلىسى،

ءبىرجان سال اۋدانى

سوڭعى جاڭالىقتار

ەرلىككە تولى ەڭبەك

قازاقستان • كەشە

شيراز بۇلب ۇلى

ادەبيەت • كەشە

اتا جۇرتتا

ادەبيەت • كەشە

اباي وبلىسىنىڭ اتى وزدى

ايماقتار • كەشە

ۇقساس جاڭالىقتار