«بۇگىن قالالىق جاستار ءىسى جونىندەگى كەڭەستىڭ كەڭەيتىلگەن وتىرىسى ءوتتى. كەزدەسۋ باعدارلاماسىندا جاڭا قازاقستاندى قۇرۋداعى رەسپۋبليكالىق رەفەرەندۋمنىڭ ءتارتىبى مەن مىندەتتەرى بولدى. ءبىزدىڭ ماقساتىمىز – جاستارعا الداعى رەفەرەندۋمنىڭ ماڭىزى تۋرالى اقپارات جەتكىزۋ», دەدى جاستار ساياساتى ماسەلەلەرى باسقارماسىنىڭ باسشىسى قايرات قامباروۆ.
كەزدەسۋ اياسىندا جالپى رەسپۋبليكالىق رەفەرەندۋم وتكىزۋدىڭ ءتارتىبى مەن مىندەتتەرى, كونستيتۋتسيالىق رەفورمانىڭ باعىتتارى, جاڭا قازاقستاندى قۇرۋداعى رەفەرەندۋمنىڭ ماڭىزى, ەلوردادا مەملەكەتتىك جاستار ساياساتى سالاسىندا اتقارىلعان جۇمىستار, ەلوردالىق جاستاردى جۇمىسپەن قامتۋ ماسەلەلەرى تۋرالى ماڭىزدى تاقىرىپتار قارالدى.
«بىزدە الداعى رەفەرەندۋم بويىنشا ءتۇسىندىرۋ كەزدەسۋى ءوتتى. سايلاۋشىلاردىڭ جانە داۋىس بەرەتىن ادامداردىڭ نەگىزگى اۋديتورياسى جاستار بولعاندىقتان, وعان ەرەكشە نازار اۋدارامىز. ءوزىم جاستار وكىلى رەتىندە وسى رەفەرەندۋمنىڭ ماڭىزدىلىعىن تۇسىنەمىن. ونىڭ ۇستىنە جاڭا قازاقستاندا وسىنىڭ ءبارىن ىسكە اسىراتىن جاستار قاجەت. سول سياقتى اشىق تالقىلاۋ, پىكىرتالاس ءوتتى. ءوزىم جاستارعا جاقسى اقپارات بەرە الدىم دەپ ۇمىتتەنەمىن. ءبىزدىڭ جاستار بەلسەندى قاتىسادى دەپ ويلايمىن, ويتكەنى ولار قازىردىڭ وزىندە ساياسي ءپىسىپ جەتىلدى. سوندىقتان رەفەرەندۋم كەزىندە بەلسەندىلىك كورسەتەدى دەپ ۇمىتتەنەمىن», دەپ اتاپ ءوتتى Qazaqstan team رەسپۋبليكالىق جاستار بىرلەستىگىنىڭ جەتەكشىسى ولجاس سۇلەيمەنوۆ.
جارتى ايدان سوڭ جالپىحالىقتىق رەسپۋبليكالىق رەفەرەندۋم وتەتىنى بەلگىلى. سالماعى اۋىر ساياسي ناۋقانعا ەل تۇرعىندارىنىڭ تۇگەلدەي قاتىسۋى ماڭىزدى. سەبەبى ءاربىر ازاماتتىڭ داۋىسى مەملەكەتتىڭ كەلەشەگىنە تىكەلەي اسەر ەتەتىنى انىق. قازىرگى تاڭدا رەسپۋبليكانىڭ تۇكپىر-تۇكپىرىندە ءتۇسىندىرۋ جۇمىستارى جۇيەلى تۇردە جۇرگىزىلۋدە. ازاماتتاردى اقپاراتتاندىرۋ ولاردى رەفەرەندۋم تۋرالى جان-جاقتى مالىمەتپەن قامتاماسىز ەتۋ جالعاسىپ جاتىر. ەلدىڭ ەرتەڭىنە بەيجاي قارامايتىن جاناشىر جاندار جالپىحالىقتىق رەفەرەندۋمعا قاتىسىپ, ءوز داۋىسىن بەرىپ, جاڭا قازاقستاننىڭ قۇرىلۋىنا ۇلەسىن قوسارى ءسوزسىز.
