قازاقستان • 18 مامىر، 2022

كاسىپورىن قىزمەتكەرلەرىمەن كەزدەستى

الماتى وبلىسىنىڭ قاپال-اراسان اۋىلىنداعى بارلىبەك سىرتتان ۇلى اتىنداعى مەكتەپتە ساياسي قايراتكەر، قازاقتىڭ العاشقى كونستيتۋتسيا جوباسىنىڭ اۆتورى، زاڭگەر، پۋبليتسيست، شىعىستانۋشى بارلىبەك سىرتتان ۇلىنىڭ ءمۇسىنى سالتاناتتى تۇردە اشىلدى.

Egemen Qazaqstan

«اق جول» پارتياسىنىڭ دەمەۋشىلىگىمەن بوي كوتەرگەن ءمۇسىننىڭ اشىلۋ سالتاناتىنا پارلامەنت ءماجىلىسىنىڭ دەپۋتاتى، «اق جول» قازاقستاننىڭ دەموكراتيالىق پارتياسى» قوعامدىق بىرلەستىگىنىڭ توراعاسى ازات پەرۋاشەۆ قاتىستى. سونداي-اق سالتاناتتى ءىس-شاراعا پارتيانىڭ الماتى وبلىسى جانە الماتى قالالىق فيليالدارىنىڭ باسشىلارى، اقسۋ اۋدانىنىڭ بەلگىلى قوعام قايراتكەرلەرى، ارداگەرلەرى مەن اۋىل ازاماتتارى قاتىستى. جيىن بارىسىندا ازات پەرۋاشەۆ جەرگىلىكتى حالىقپەن كەزدەسىپ، باسقوسۋ بارى-
سىندا كونستيتۋتسيالىق رەفورمانىڭ وزەكتىلىگىن تالقىلادى. جيىندا ءسوز العان اۋىل اقساقالدارى ەلىمىزدىڭ نەگىزگى زاڭىنا ەنگىزىلەتىن وزگەرىستەردىڭ ماڭىزدىلىعىن ايتىپ، كونستيتۋتسيالىق رەفورمانى تولىق قولدايتىندارىن جەتكىزدى.

كەيىننەن ا.پەرۋاشەۆ باستاعان «اق جول» پارتياسىنىڭ مۇشەلەرى «قاينار» جشس-ءنىڭ تالدىقورعانداعى قورعاسىن باتارەيالارى زاۋىتىندا بولدى. زاۋىت ەلەكتروتەحنيكا سالاسىندا دا، جەتىسۋ وڭىرىندە دە ەڭ تابىستى كاسىپورىنداردىڭ ءبىرى بولىپ سانالادى. زاۋىتتىڭ ينجەنەرلىك-تەحنيكالىق قىزمەتكەرلەرمەن اڭگىمەلەسكەن اقجولدىقتار ولاردىڭ كونستيتۋتسيالىق رەفورماعا دەگەن كوزقاراسىمەن تانىسىپ، ۇجىمنىڭ وتكەن جىلدارى پارتيانىڭ الدىنا قويعان كەيبىر ماسەلەلەرىنە توقتالدى. ارىپتەستەر ەكونوميكالىق جانە ساياسي جاعدايعا قاتىستى وي-پىكىرلەرىمەن ءبولىستى. سونداي-اق، جيىندا زاۋىتتا ۇزاق جىل بويى قاجىرلى ەڭبەك ەتكەن جۇمىسشىلارعا «ەڭبەگىم ەلىمە» اتتى توسبەلگى تابىستالدى.

جينالعان قاۋىم تالدىقورعانداعى قاڭتار وقيعاسىنا دا وتكىر باعا بەردى. ەلدەگى ساياسي جاڭعىرۋ اياسىندا كاسىپورىن قىزمەتكەرلەرى مەملەكەتتىك جۇيەگە تۇبەگەيلى وزگەرىستەر ەنگىزۋ قاجەتتىلىگىنە ەش كۇماندانبايدى. ولار كونستيتۋتسيانى رەفورمالاۋ وسىنداي وزگەرىستەرگە باعىتتالعان شەشۋشى قادام رەتىندە قابىلدايدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز