وسى جارىس قارساڭىندا IJF ماماندارىنىڭ قاتىسۋىمەن تورەشىلەرگە ارنالعان حالىقارالىق سەمينار وتكەنىن دە ايتا كەتكەن ابزال. وعان حالىقارالىق دزيۋدو فەدەراتسياسىنىڭ (IJF) سپورت ديرەكتورى دانيەل لاسكاۋ, داڭقتى بالۋان, وليمپيادانىڭ كۇمىس جۇلدەگەرى ارمەن باگداساروۆ, IJF تورەشىلەر كوميسسياسىنىڭ حاتشىسى حيۋرليا پاسكۋالە جانە قازاقستان دزيۋدو فەدەراتسياسى پرەزيدەنتىنىڭ مىندەتىن اتقارۋشى اسحات جىتكەەۆ جەتەكشىلىك ەتتى. اتالعان شاراعا قازاقستان, وزبەكستان, قىرعىزستان, جاپونيا, گونكونگ, كۋۆەيت, يران, ساۋد ارابياسى, گەرمانيا, اقش, يتاليا, ازەربايجان, تۇرىكمەنستان, موڭعوليا جانە تايپەيدەن 70 تورەشى قاتىستى.
جارىستىڭ وزىنە كەلەر بولساق, بۇل جارىستا وزبەكستاندىق بالۋاندار وزدەرىنىڭ مىقتىلىعىن تۇبەگەيلى مويىنداتتى. اسىرەسە, جاستار اراسىندا ساراپقا سالىنعان باس جۇلدەنىڭ جەتۋىن دە سولار يەمدەندى. ەڭ وكىنىشتىسى, فينالدا وزبەك پەن قازاق بالۋاندارى بەس مارتە كەزدەستى. سول باسەكەلەردىڭ بارلىعىندا دا كورشىلەرىمىز جەڭىسكە جەتتى. اتاپ ايتساق, قوجياقپار توشەۆ (73 كيلو) بەكنۇر تاڭىربەرگەندى تىزە بۇكتىردى. مەيىرلان ماكسيم (81 كيلو) شاحزود ءشارىپوۆتى «ۆازاري» ادىسىمەن ۇتىپ جاتىپ, ءوزى «يپپونعا» ءتۇسىپ قالدى. تولقىنبەك تۇرديەۆ (90 كيلو) پەن مۇحاممەدالى ماۆليدوۆ اراسىنداعى تارتىستىڭ تاعدىرىن «شيدو» شەشتى. ءۇش ەسكەرتۋ العان جەرلەسىمىز باسەكەنى مەرزىمىنەن بۇرىن اياقتادى. مۇحاممادقادىر مانسۇروۆقا (100 كيلو) دامير احەتتى جەڭۋ ءۇشىن نەبارى 22 سەكۋند جەتكىلىكتى بولدى. يسلومبەك راۆشانقۇلوۆ (+100 كيلو) پەن قايراتبەك ءسابيتتىڭ دە ايقاسى ۇزاققا سوزىلمادى. باسەكەنىڭ باستالعانىنا ءبىر مينۋتتان ءسال اسقاندا يسلامبەك ءسابيتتىڭ اياعىن كوكتەن كەلتىردى.
بۇگىنگى تاڭدا جاستار بۋىنى اراسىندا باق سىناپ جۇرگەن جىگىتتەرىمىزدىڭ بارلىعى دا ەرتەڭگى كۇنى ەرەسەكتەر دۋىنا قوسىلىپ, اسا ءىرى حالىقارالىق جارىستاردا ەل نامىسىن قورعايدى. وكىنىشكە قاراي, الماتىداعى جارىس ولاردىڭ ءالى دە «شيكى» ەكەندىكتەرىن بايقاتتى. ءوز ەلىمىزدە, ءوز جەرىمىزدە, ءوز جانكۇيەرلەرىمىزدىڭ كوز الدىندا تەگىستەي ۇتىلساق, شەت مەملەكەتتەردە وتەتىن ءدۇبىرلى دودالاردا دارالانا المايتىنىمىز ايدان انىق. ءتىپتى كۇرەستىڭ بۇل تۇرىنەن كۇرەسىندە قالىپ قويۋىمىز دا ابدەن مۇمكىن. قازىرگى قارقىن, بۇگىنگى ەكپىنمەن ۇزاققا بارا المايمىز. سوندىقتان دا بۇل جاعداي رەسپۋبليكالىق فەدەراتسيانىڭ تىزگىنىن ۇستاعان ازاماتتار مەن ەلىمىزدىڭ بىلىكتى باپكەرلەرىنە وي سالۋعا ءتيىس. ولار وسى ساتسىزدىكتەن ساباق الىپ, كەمشىلىكتى تۇزەپ, ولقىلىقتىڭ ورنىن تولتىرۋ ءۇشىن دەرەۋ ىسكە كىرىسۋلەرى كەرەك.
جىگىتتەرگە قاراعاندا قىزدارىمىز ءتاۋىر كۇرەستى. ولار باس جۇلدەنىڭ تورتەۋىنە يەلىك ەتتى. ەكى فينال ءوز بالۋاندارىمىزدىڭ اراسىندا ءوتتى. 52 كيلو سالماقتا ارۋجان ەرەجەپوۆا بالنۇر ابدەشوۆامەن شەبەرلىك بايقاستى. بۇل تارتىس العاشقىسىنىڭ پايداسىنا شەشىلدى. 63 كيلو سالماقتا ەسميگۇل كۋيۋلوۆا مەن گۇلنۇر باحانوۆا بەلدەستى. بۇل باسەكەدە ەسميگۇلدىڭ باسىمدىعى ەش كۇمان تۋعىزعان جوق. ول 1 مينۋتتان ءسال اسقاندا قارسىلاسىن تازا جەڭدى.
70 كيلو سالماقتاعى روزا نىسانتايقىزى مەن شاحلو ەگامبەرگانوۆا اراسىنداعى كەزدەسۋدە وزبەك دزيۋدوشىسى قاتارىنان ءۇش ەسكەرتۋ الىپ, جارىس جولىنان شىعىپ قالدى. اسا اۋىر سالماقتاعى ايقاس ايدا تويشىبەكوۆانىڭ ايقىن جەڭىسىمەن اياقتالدى. ول تاشكەنتتىڭ ءتول تۋماسى فاتيما قۇرامبوەۆانى الىپ ۇرىپ, قوس جاۋىرىنىمەن جەرگە قادادى. بۇل باسەكە بار-جوعى 15 سەكۋندقا سوزىلدى. سونداي-اق وزبەكستاندىق فاتيماحون تۇرسىنبوەۆا (48 كيلو) مەن شىرىنجون يۋلداشەۆا (78 كيلو) جانە تۇرىكمەنستاندىق مايسا پارداەۆا (57 كيلو) جەڭىس تۇعىرىنىڭ ەڭ بيىك ساتىسىنا كوتەرىلدى.
جاسوسپىرىمدەر اراسىنداعى جارىستىڭ دا ناتيجەسىنە كوڭىلىمىز تولدى دەپ ايتا المايمىز. قىزداردىڭ سايىسىندا ءلازيزا حايداروۆا (40 كيلو), ءۇمىتحون بۋرحانجونوۆا (44 كيلو), سەۆينچ مۋرودوۆا (48 كيلو), سۋگديونا رافكاتوۆا (52 كيلو), اسەلحان ارالباەۆا (57 كيلو), ءلايلاحون يۋلداشەۆا (63 كيلو), تۋيگۇل حامەروەۆا (70 كيلو) جانە سەۆينيش تۇراقۇلوۆا (+70 كيلو) التىننان القا تاقتى. بۇل سپورتشىلاردىڭ بارلىعى دا – وزبەكستاننان. بىزگە دە, باسقالارعا دا بىردە-ءبىر باس جۇلدە بۇيىرمادى.
ۇلداردىڭ باسەكەسىندە جەرلەستەرىمىز ءۇش رەت دارا شىقتى. بۇل جولى بەكبولسىن جولىمبەك (55 كيلو), نۇرلىبەك ارعىنبەك (66 كيلو) جانە ەگور راكوۆ (81 كيلو) جەرگىلىكتى جانكۇيەرلەردى ءبىر جەلپىنتىپ تاستادى. اسىرەسە, ءبىز ەگوردىڭ تابىسىنا ەرەكشە شاتتاندىق. ويتكەنى راكوۆتاردىڭ وتباسىن قازاقستان جۇرتى جاقسى بىلەدى. وتاعاسى – سەرگەي كاپيتونوۆيچ كەزىندە كسرو حالىقتارى سپارتاكياداسى مەن كسرو چەمپيوناتىندا اتوي سالعان. كەيىننەن باپكەرلىككە بەت بۇردى. ۇلى – ماكسيم الەم جانە قۇرلىق چەمپيونى, الەم چەمپيوناتىنىڭ كۇمىس جۇلدەگەرى, ازيا ويىندارىنىڭ ءۇش دۇركىن جۇلدەگەرى. سەرگەيدىڭ تاعى ەكى پەرزەنتى جاتتىقتىرۋشىلىق قىزمەتتە. فينالدا ءۇيدىڭ كەنجەسى – ەگور راكوۆ ءوزىنىڭ كوماندالىق ارىپتەسى, قاراعاندى دزيۋدو مەكتەبىنىڭ تاعى ءبىر تۇلەگى اسقار ءبىرجانوۆتان باسىم ءتۇستى.
سونداي-اق بەكەت ماحمۇتوۆتى ەسكە الۋعا ارنالعان تۋرنيردە تۇرىكمەنستاندىق مەكان رامازانوۆ (50 كيلو), وزبەكستاندىق فاررۋح حامداموۆ (60 كيلو), ساماريددين مۇحسيميدديونوۆ (73 كيلو), فاررۋح ماداراتوۆ (90 كيلو) جانە قىرعىزستاندىق ەمىرحان جولداشقازيەۆ (+90 كيلو) جەڭىمپاز اتاندى.
