بيىل تاعىلىمدامادان وتۋگە قۇجاتتاردى قابىلداۋ 2022 جىلعى 5 قىركۇيەكتە باستالىپ, 14 قازانعا دەيىن جالعاسادى. كونكۋرستىق ىرىكتەۋ 2022 جىلعى 30 مامىر مەن 30 قاراشا ارالىعىندا وتەدى.
وسى جىلى ماگيستراتۋرا مەن رەزيدەنتۋراعا 385, دوكتورانتۋراعا 60 ستيپەنديا ءبولىندى.
«مەملەكەت باسشىسىنىڭ تاپسىرماسىمەن «بولاشاق» باعدارلاماسىن قايتا باعدارلاۋ پروتسەسى ىسكە قوسىلدى. ينجەنەرلىك-تەحنيكالىق كادرلاردى دايارلاۋعا باستى نازار اۋدارىلادى. وسىعان بايلانىستى «بولاشاق» باعدارلاماسى بويىنشا تەحنيكالىق جانە IT ماماندىقتارعا گرانتتار سانى 60 پايىزعا دەيىن ۇلعايتىلدى. بۇل «ينجەنەرلىك جۇيەلەر مەن جەلىلەر», «اۆياتسيا جانە اەروعارىشتىق تەحنيكا. اۋە قوزعالىسىن باسقارۋ», «ۇلكەن دەرەكتەردى تالداۋ», «جاڭا ماتەريالدار تەحنولوگياسى», «دەرەكتەر بازاسىن باسقارۋ», «اۆياتسيالىق تەحنيكا جانە تەحنولوگيالار», «ماشينا جاساۋ», «ونەركاسىپتىك اۆتوماتتاندىرۋ» جانە ت.ب.», دەدى قر بعم حالىقارالىق باعدارلامالار ورتالىعىنىڭ باسقارما توراعاسى ءانۋار جانعوزين.
بيىل «بولاشاق» باعدارلاماسى بويىنشا باسىم ماماندىقتار تىزىمىندە اكادەميالىق وقۋعا 92, تاعىلىمدامادان وتۋگە 158 ماماندىق قاراستىرىلعان. ەڭبەك نارىعىنىڭ ۇردىستەرىن تالداۋ نەگىزىندە وسى جىلى تىزىلىمگە يننوۆاتسيالار, جاڭا تەحنولوگيالار, مەديتسينا جانە ونەركاسىپتىك ينجەنەريا, جاراتىلىستانۋ عىلىمدارى سالاسىنداعى 40 جاڭا ماماندىق ەنگىزىلدى. سونىمەن قاتار ولاردىڭ 17-ءسى اتاۋلارىن كەڭەيتۋ ارقىلى بۇرىننان بار ماماندىقتارعا ەندى. جالپى, باسىم ماماندىقتار ءتىزىمى تەحنيكالىق ماماندىقتارمەن 30%-عا كەڭەيتىلدى.
«بولاشاق» حالىقارالىق ستيپەندياسىنا كونكۋرستىق ىرىكتەۋ 3 كەزەڭنەن تۇرادى: كەشەندى تەستىلەۋ, تاۋەلسىز ساراپشىلىق كوميسسيا مۇشەلەرىمەن جەكە اڭگىمەلەسۋ جانە شەتەلدە كادرلار دايارلاۋ جونىندەگى رەسپۋبليكالىق كوميسسيا وتىرىسىندا قۇجاتتاردى قاراۋ.
قۇجاتتار ءتىزىمى مەن باسقا دا قوسىمشا اقپاراتپەن كەلەسى سىلتەمە ارقىلى تانىسۋعا بولادى: https://bolashak.gov.kz/ru/pretendentu/kak-podat-dokumenty
