ومىردە شىنايى احۋالدى شىنايى كۇيدە قابىلداۋ كەرەك. ويتكەنى قازاقستاننىڭ گەوگرافيالىق تۇرعىدا ورنالاسۋى, كورشىلەرىمىزبەن قارىم-قاتىناس ەلدىڭ دامۋىنا ءوز اسەرىن تيگىزەدى. كورشىلىك قارىم-قاتىناسىمىز رەسەي, قىتاي, تۇرىكمەنستان, قىرعىزستان, وزبەكستان سەكىلدى ەلدەرمەن تىعىز بايلانىستى. سوندىقتان كورشىمەن تاتۋ بولۋ قاي جاعىنان دا ماڭىزدى. وسى ورايدا, پرەزيدەنتىمىزدىڭ رەسەيگە بارعانىن, كورشىلەس ەلدەرمەن تاتۋ بولۋعا ۇمتىلۋىن وتە دۇرىس قادام دەپ باعالاۋعا بولادى.
مەملەكەت باسشىسى قاسىم-جومارت توقاەۆ ديپلومات ادام. كەشەگى جيىن بارىسىندا دا تۇسىرىلگەن فوتولاردى قاراپ وتىرىپ, پرەزيدەنتىمىزدىڭ تاپ-تۇيناقتاي, ءوز ءىسىن ادال اتقارىپ, مەملەكەتتىڭ مۇددەسىن قورعاعانىن انىق اڭعارامىز.
ۇقشۇ بىتىمگەرلىك كۇشتەرى قازاقستاننىڭ شاقىرۋى بويىنشا قاڭتار وقيعاسى كەزىندە كەلىپ, ءوز ميسسياسىن اياقتاعاننان كەيىن ءوز ەلدەرىنە ورالدى. ولاردىڭ ەڭبەگىن مەملەكەت باسشىسى قاسىم-جومارت توقاەۆ جوعارى باعالادى.
كەيبىر سىنشىلار ۇقشۇ-دان شىعۋ كەرەك دەگەن اڭگىمە ايتىپ ءجۇر. مەنىڭشە بۇل ماسەلەنى پرەزيدەنت حالىقپەن اقىلداسا وتىرىپ شەشىم قابىلدايتىنى ءسوزسىز. بىراق ەڭ باستى مۇددە – الەمدەگى «توعىزىنشى تەرريتوريانىڭ» اۋماقتىق تۇتاستىعىن, ەلدەگى تۇراقتىلىق پەن بەيبىتشىلىكتى ساقتاۋ ساياساتىن جالعاستىرا بەرۋ كەرەك.
قازاقستاننىڭ كوپۆەكتورلى پوزيتسياسىن ۇمىتپاعان ءجون. سول ۆەكتوردان اينىماي, دۇنيە ءجۇزى مەملەكەتتەرىمەن ءتۇزۋ قارىم-قاتىناستى ساقتاۋ باستى ماقسات. ال ول بۇگىنگى ساياسي ارەنادا وڭاي جۇمىس ەمەس. پرەزيدەنتىمىزدىڭ تۇركياعا ساپارى دا قازاقستاننىڭ حالىقارالىق ساياساتتاعى ۇستانىمىن ايقىنداۋعا ءوز ىقپالىن تيگىزەتىنى ءسوزسىز. ر.ەردوعاننىڭ ء«بىز باۋىرلارىمىزدى ارقاشان دا قورعايمىز» دەگەن ءسوزى دە وزگەلەرگە وي سالارى انىق.
سامات نۇرتازا,
ساياساتتانۋشى
