جوبانىڭ ينۆەستورلارى رەتىندە PSA Group, Maersk, MSC سىندى الەمدىك كونتەينەرلىك وپەراتورلاردى تارتۋ كوزدەلىپ وتىر.
بۇگىنگە دەيىن ارنايى ەكونوميكالىق ايماقتا 18 جوبا جۇزەگە اسىرىلدى. سونداي-اق تاعى 25 جوبا ىسكە اسىرىلۋ كەزەڭىندە. جالپى العاندا ەكونوميكالىق ايماقتاعى قولعا الىنعان جۇمىستاردىڭ باسىم باعىتى مۇناي ءوندىرۋ مەن مۇناي-حيميا ونەركاسىبى, قۇرىلىس, پورت جانە تۋريستىك سالالاردى دامىتۋعا ارنالعان.
ارنايى ەكونوميكالىق ايماق قۇرىلعالى بەرى 1 720 تۇراقتى جۇمىس ورنى اشىلعان. 19 جىلدان بەرى اەا اۋماعىنداعى ىسكە اسىرىلعان جوبالارعا ينۆەستورلار تاراپىنان 260,7 ملرد تەڭگە سالىنعان. ال شەتەلدىك ينۆەستيتسيا كولەمى 168 ملرد تەڭگەنى قۇرايدى.
ايتا كەتەرلىگى, «اقتاۋ تەڭىز پورتى» اەا-دا جوبالاردى جۇزەگە اسىرۋعا تولىققاندى جاعداي جاسالعان. ايماققا قاجەتتى ينفراقۇرىلىم جۇرگىزىلىپ, سالىقتىق جانە كەدەندىك پرەفەرەنتسيالار ۇسىنىلعان. سونداي-اق جوبالاردى سۇيەمەلدەۋ مەن ولاردىڭ مونيتورينگى ىسكە اسىرىلادى.
سونىمەن قاتار ەكونوميكالىق ايماقتا بىرقاتار ماڭىزدى ستراتەگيالىق جوبا جۇزەگە اسىرىلادى. ولاردىڭ قاتارىندا ۇلكەن ديامەترلى بولات قۇبىرلارىن شىعاراتىن «Arcellor Mittal Tubular Products Aktau» اق, «پرەميۋم» ساناتىنداعى گاز گەرمەتيكالىق جالعاۋمەن قۇبىرلاردى كەسەتىن «Kazakhstan Pipe Threaders» جشس, اقتاۋ حالىقارالىق تەڭىز ساۋدا پورتىن سولتۇستىك باعىتتا كەڭەيتەتىن «اقتاۋ تەڭىز سولتۇستىك تەرمينالى» جشس سياقتى كاسىپورىندار مەن جوبالاردى اتاپ وتۋگە بولادى. سونداي-اق ايماقتاعى تۋريزم سالاسىن دامىتۋ ماقساتىندا Rixos Water World Aktau كوپفۋنكتسيونالدى قوناق ءۇي كەشەنى پايدالانۋعا بەرىلگەن.
