قوعام • 13 مامىر، 2022

ەلوردادا كۇن سايىن ەسىرتكى تەكتەس 1 مىڭنان استام ءدارى-دارمەك ساتىلادى

14 رەت كورسەتىلدى

كۇن سايىن ەلوردا ءدارىحانالارىندا ەسىرتكى تەكتەس 1 مىڭنان استام ءدارى-دارمەك ساتىلادى، دەپ حابارلايدى Egemen.kz.

ەلوردا ءدارىحانالارىنان ەسىرتكىگە تاۋەلدىلىكتى تۋدىراتىن پرەپاراتتاردىڭ كوبىسىن رەتسەپتىسىز الۋعا بولادى. سونىمەن قاتار ءدارى-دارمەكتى كىشكەنتاي بالاعا دەيىن ەركىن ساتىپ الادى ەكەن. اتالعان ماسەلەنى نۇر-سۇلتان قالاسى ءبىلىم باسقارماسىنىڭ باسشىسى قاسىمحان سەنعازيەۆ كوتەردى.

«بالالار مەن جاسوسپىرىمدەردى ناشاقورلىق پەن قۇمار ويىنداردان اۋلاق ەتۋ ءبىزدىڭ باسقارمانىڭ باستى جۇمىس باعىتتارىنىڭ ءبىرى. اتالعان پروبلەمامەن كۇرەسۋ ماقساتىندا الدىن الۋ شارالارى تۇراقتى تۇردە وتەدى. اتاپ ايتقاندا، «نۇر-سۇلتان – ەسىرتكىسىز قالا» اتتى 2022-2025 جىلدارعا ارنالعان كەشەندى جوسپار اياسىندا كامەلەت جاسىنا تولماعاندار اراسىندا ناشاقورلىققا قارسى اكتسيالار ۇيىمداستىرىلۋدا. سونىمەن قاتار قالا مەكتەپتەرى مەن كوللەدجدەردە اقپاراتتىق بۇرىشتار ىلىنگەن»، دەدى قاسىمحان سەنعازيەۆ قالالىق ءماسليحاتتىڭ وتىرىسىندا جاساعان بايانداماسىندا.

ءبىلىم باسقارماسى باسشىسىنىڭ ايتۋىنشا، اتالعان باعىتتاعى جۇمىسقا اتا-انالار دا تارتىلىپ جاتىر.

«ەسىرتكىنى تاراتۋ مەن قولدانۋعا قاتىستى پروبلەمانىڭ بارىن ايتا كەتۋ كەرەك. كۇن سايىن ەلوردا ءدارىحانالارىندا ەسكىرتكىگە ماس بولۋدى تۋدىراتىن 1 مىڭنان استام ءدارى-دارمەك ساتىلادى. پرەپاراتتاردىڭ كوبىسىن رەتسەپسىز الۋعا بولادى. ءتىپتى كىشكەنتاي بالا دا ءدارى-دارمەكتى ەركىن ساتىپ الا الادى. وسى ورايدا اتالعان ماسەلەگە ءجىتى كوڭىل ءبولۋ كەرەك. اتالعان پرەپاراتتاردى قابىلداۋ كەزىندە ەسىرتكىگە 100 پايىز تاۋەلدىلىك تۋىندايدى. ال ونىڭ سالدارىن كاسىبي كومەكسىز جويۋ مۇمكىن ەمەس»، دەيدى ول.

سونداي-اق سپيكەر ەسىرتكى قولداناتىن جاسوسپىرىمدەردى انىقتاۋ ماقساتىندا تۇراقتى مونيتورينگتىڭ جۇرگىزىلەتىنىن ايتتى.

«بۇگىندە ەلوردادا ەسىرتكى پسيحوتروپتىق زاتتارىن قولدانعان، كامەلەت جاسىنا تولماعان 5 تۇلعا تىركەلدى. ونىڭ ىشىندە بىرەۋى 14 جاستا، قالعانى 15 پەن 17 جاس ارالىعىنداعى جاسوسپىرىمدەر. ايتا كەتەيىك، بالالار مەن اتا-انالار «111» كولل ورتالىعى ارقىلى كومەككە جۇگىنە الادى»، دەدى ق. سەنعازيەۆ.

ايانا توعانبەك

 

سوڭعى جاڭالىقتار

ۇقساس جاڭالىقتار