وقۋلىق جايى ويلانتادى

«نۇر وتان» پارتياسى جانىن­داعى «ميراس» قوعامدىق كەڭە­سى­نىڭ مەملەكەتتىك ءتىلدى وقىتۋ­دىڭ جاي-كۇيىنە, قازاق ءتىلىن­دەگى وقۋلىقتار مەن وقۋ-ءادىس­تەمە­لىك ماتەريالداردىڭ ساپاسىنا كەڭەيتىلگەن وتىرىس ارناۋى – حالىقتىق پارتيانىڭ ەل رۋحانيا­تىنىڭ وزەكتى ماسەلەلەرىنە ۇدايى كوڭىل ءبولۋىنىڭ ءبىر كورىنىسى. كەشە پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى ماۋلەن اشىمباەۆتىڭ جەتەكشىلىگىمەن وتكەن وتىرىستا باستى نازار وقۋلىقتاردىڭ جاي-كۇيىنە اۋدارىلدى. وتىرىسقا كەڭەس مۇشەلەرىمەن قاتار وسى ىسكە تىكەلەي قاتىستى مينيسترلىكتەر باسشىلارى, وقۋلىقتار دايىنداۋمەن,  شىعارۋمەن اينالىساتىن عالىمدار, باسپا ديرەكتورلارى شاقىرىلدى. ءبىلىم جانە عىلىم ءمينيسترى اسلان ءسارىنجىپوۆتىڭ بايانداماسىندا سالادا وسى باعىتتا اتقارىلىپ جاتقان جۇمىس اڭگىمەلەنىپ, شە­شۋىن كۇتكەن ماسەلەلەردىڭ ءتۇيى­نىن تابۋ جولدارى ءسوز ەتىلدى. مادە­نيەت ءمينيسترى ارىستانبەك مۇحا­مەدي ۇلىنىڭ سوزىندە دايىندالعان وقۋلىقتاردىڭ ساپالى جارىق كورۋىنىڭ ماسەلەلەرى قوزعالدى. قوعامدىق كەڭەس وسىدان ءبىراز ۋاقىت بۇرىنعى وتىرىسىندا قازاق تىلىندەگى وقۋلىقتاردى ساراپتاۋ جونىندە جۇمىس توبىن قۇرىپ, وعان قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى دينار نوكەتاەۆانى جە­تەك­شى ەتىپ بەلگىلەگەن ەدى. دي­نار جۇسىپالىقىزى پارتيا­لىق تاپسىرماعا بارىنشا جاۋاپ­تىلىقپەن قاراعانىن كورسەت­تى. ونىڭ بايانداماسىندا وقۋ ادە­بيەتتەرىنە ساراپتاما جۇرگىزۋ ءناتي­جەسى ناقتى ايتىلىپ, جەتىس­تىكتەر مەن كەمىستىكتەر تەرەڭ تالداندى. بۇل جۇمىسقا 51 وقىتۋشى تارتىلىپ, 173 وقۋ ادەبيەتىنە ساراپ­تاما جۇرگىزىلگەن ەكەن. ولاردىڭ 56-سى باستاۋىش سىنىپ وقۋلىقتارى, 78-ءى ورتا بۋىن وقۋلىقتارى, 39-ى جوعارى سىنىپ وقۋلىقتارى. تەكسەرۋ بارىسىندا كەيبىر وقۋلىقتاردىڭ تيپتىك وقۋ باعدارلاماسىنا سايكەسسىزدىگى, تاقىرىپتاردا اۋىتقۋلاردىڭ كەزدەسۋى, وقۋ باعدارلاماسىن تولىق قامتىماۋى سياقتى قاعيداتتى كەمشىلىكتەر انىقتالعان. ءبىلىم الۋشىلاردىڭ دايىندىق دەڭگەيى مەن جاس ەرەكشەلىكتەرىنىڭ ەسكەرىل­مەۋى, تۇسىنىكتەر مەن تەرمين­دەردى ەنگىزۋ ادىستەمەسىندەگى ولقى­لىق­تاردىڭ ورىن الۋى, وقۋشى­لاردىڭ شىعارماشىلىق بەلسەن­دىلىگىن جانە ينتەللەكتۋالدى الەۋە­تىن, لوگيكالىق ويلاۋىن دامى­تۋدى قامتاماسىز ەتەتىن ماتەريال­دار­دىڭ جەتىلدىرىلمەۋى سياقتى جاي­لار ناقتى مىسالدارمەن دايەكتەلدى. ۇلت رۋحانياتىنداعى تۇعىرلى تۇلعالاردىڭ ءبىرى مىرزاتاي جول­داس­بەكوۆتىڭ سوزىمەن ايتقاندا, «ءتىل تاعدىرى ءۇشىن تورعايداي شىرىلداپ سويلەگەن» قوعام قايراتكەرى بەكبولات تىلەۋحاننىڭ بايانداماسى ەموتسيالىق جاعىنان قۋاتتى, ماعىنالىق جاعىنان سالماقتى شىقتى. پارلامەنت ءماجىلىسىنىڭ دەپۋتاتى الدان سمايىلدىڭ بايانداماسى قاتپارى قالىڭ ماسەلەنى تەرەڭ قوزعاۋىمەن ەرەكشەلەندى. «ءتىلداۋا» قوعامدىق قورىنىڭ قۇ­رىل­تايشىسى, ادىسكەر مۇعالىم تولەۋ ايماعانبەتوۆانىڭ, ءما­جىلىس دەپۋتاتى, پرەزيدەنت جانىن­داعى ادام قۇقىقتارى ءجونىن­دەگى كوميسسيانىڭ توراعاسى قۋا­نىش سۇلتانوۆتىڭ, «حابار» اگەنت­تىگى اكتسيونەرلىك قوعامىنىڭ پرو­ديۋسەرى مەرۋەرت قۇماروۆانىڭ, قازاق ۇلتتىق پەداگوگيكالىق ۋني­ۆەر­سيتەتىنىڭ پروفەسسورى, دەڭ­گەيلىك وقۋ ادەبيەتتەرىنىڭ اۆتورى فاۋزيا ورازباەۆانىڭ, قازاق ۇلتتىق پەداگوگيكالىق ۋنيۆەر­سيتەتىنىڭ وقىتۋدىڭ مازمۇنى مەن ادىستەمەسى ينستيتۋ­تىنىڭ ديرەكتورى الما ابىلقاسىموۆانىڭ, ش.ايمانوۆ اتىنداعى «قازاق­فيلم» اكتسيونەرلىك قوعامىنىڭ پرە­زيدەنتى ەرمەك امانشاەۆتىڭ, «وقۋلىق» رەسپۋبليكالىق عىلىمي-پراكتيكالىق ورتالىعىنىڭ ديرەكتورى بەيبىتكۇل كارىموۆانىڭ, بايلانىس جانە اقپارات اگەنت­تىگى توراعاسىنىڭ ورىنباسارى التاي ابيبۋللاەۆتىڭ, قازاق­ستان رەسپۋبليكاسى ورتالىق مەملەكەتتىك مۇراجايىنىڭ ديرەكتورى نۇرسان ءالىمبايدىڭ سوزدەرىندە بارشانى تولعاندىرار تاقىرىپ ءار قىرىنان, بەلسەن­دى­لىكپەن, جاۋاپكەرشىلىكپەن, بىلىك­تىلىكپەن تالداندى. وتىرىستى قورىتقان سوزىندە «ميراس» قوعامدىق كەڭەسىنىڭ توراعاسى ماۋلەن اشىمباەۆ ورتاعا سالىنعان پىكىر-ۇسىنىستاردىڭ ءبارى جيناقتالىپ,  ءتيىستى مينيسترلىككە جولداناتىنىن, بەلگىلى ءبىر ۋا­قىت­تان كەيىن بۇل باعىتتا اتقارىلعان جۇمىس جونىندە ناقتى اقپارات تالاپ ەتىلەتىنىن ايتتى. «ميراستىڭ» شامامەن ماۋسىم ايىندا وتەتىن كەلەسى وتىرى­سىندا مادەني ساياساتتىڭ ۇزاق مەر­زىمدى تۇجىرىمداماسىنىڭ جوباسىن تالقىلاۋ كوزدەلىپ وتىر. مۇن­­داي تۇجىرىمدامانى ازىرلەۋ قاجەت­تىگىن ەل پرەزيدەنتى نۇرسۇل­تان نا­زار­باەۆ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىندا كور­سەتكەن بولاتىن. سۇلەيمەن مامەت, «ەگەمەن قازاقستان».