برازيليانىڭ كاشياس-دۋ-سۋل قالاسىندا ءوتىپ جاتقان سۋردليمپيادا ويىندارىندا قازاقستاندىق جەڭىل اتلەت ولگا حيجنياكوۆا ءوز جانكۇيەرلەرىن تاعى ءبىر قۋانتتى. سەيسەنبى كۇنى عانا يادرو لاقتىرۋدان كۇمىس مەدالدى يەلەنگەن ول كەشە بالعا لاقتىرۋشىلاردىڭ باسەكەسىنە قاتىستى. بۇل جولى دا ولگا قالىڭ توپتىڭ اراسىندا قالىپ قويماي, ءۇشىنشى ورىنعا تابان تىرەدى. ءسويتىپ, جالعىز حيجنياكوۆانىڭ ءوزى برازيليا كوگىندە قازاقتىڭ كوك بايراعىن ەكى مارتە جەلبىرەتتى.
يراكتىڭ سۋلەيماني قالاسىندا ساداق اتۋدان ازيا كۋبوگىنىڭ كەزەڭدىك سايىسى ءوز مارەسىنە جاقىنداپ كەلەدى. كەشە كوماندالىق باسەكەدە ايەلدەر قۇراماسى (ۆيكتوريا ليان, ەلميرا رايسوۆا جانە ادەل جەكسەنباەۆا) كۇمىس مەدالدى يەلەنسە, ەرلەر (سەرگەي حريستيچ, بۋنيود مىرزامەتوۆ, ءشامىل ساگۋتدينوۆ) قولاعا قول سوزدى. ال ارالاس جۇپتار جارىسىندا (سەرگەي حريستيچ پەن ادەل جەكسەنباەۆا) جەرلەستەرىمىز كۇمىسپەن كۇپتەلدى.
