ەرلەر باسەكەسىندە 73 كيلو سالماقتا كۇش سىناسقان الەكسەي چۋركين كۇمىس مەدالدى موينىنا ءىلدى. قوسسايىستىڭ قورىتىندىسى بويىنشا ول 329 (146+183) كيلولىق زىلتەمىردى تىك كوتەردى. ونىڭ باستى قارسىلاسى ريزكي دجۋنيانسيا ەدى. يندونەزيا سپورتشىسىنىڭ وسى جارىسقا كەرەمەت بابىندا كەلگەنى بىردەن اڭعارىلدى. جاتتىعۋدىڭ ەكى ءتۇرى بويىنشا دا ءمىنسىز ونەر كورسەتكەن ريزكي چۋركيننەن 12 كيلو ارتىق سالماقتى ەڭسەرىپ, باس جۇلدەنى قانجىعاسىنا بايلادى. قولا مەدالدى امەريكالىق رايانا گەنري گريمسلاند يەلەندى.
قازاقستان قۇراماسىنىڭ قورجىنىنا ەكىنشى جۇلدەنى ايسامال سانسىزباەۆا سالدى. +87 كيلو سالماقتا ونەر كورسەتكەن قازاق قىزى 252 (112+140) كيلولىق ناتيجەمەن ءۇشىنشى ورىنعا تۇراقتادى. ول تەك وڭتۇستىك كورەيانىڭ قوس اۋىر اتلەتى – پاك حەجەن (120+161) مەن كيم حەننەن (108+145) قالىپ قويدى. وكىنىشكە قاراي, وزگە وتانداستارىمىزدىڭ ەشبىرى جەڭىس تۇعىرىنا كوتەرىلە العان جوق.
ايەلدەر اراسىنداعى جارىستىڭ جالپىكوماندالىق ەسەبىندە مەكسيكا قۇراماسىنىڭ مەرەيى ۇستەم بولدى. ولار 1 التىن, 2 كۇمىس جانە 1 قولانى ولجالادى. ەكىنشى ورىندا – ءۇندىستاننىڭ ورەندەرى. ولار ءتۇرلى ءتۇستى مەدالداردىڭ ارقايسىسىن ءبىر-بىردەن يەلەندى. قورجىنىندا 1 التىن مەن 1 كۇمىسى بار تۇركيا مەن وڭتۇستىك كورەيا ءۇشىنشى جانە ءتورتىنشى ورىنداردى ءوزارا ءبولىستى. ەرلەر سايىسىندا ارمەنيانىڭ (2+2+1) الدىنا ەشكىم تۇسە المادى. ەكىنشى ورىندا – ۋكراينا (2+0+1). تۇركيا (1+2+1) ءۇشىنشى ساتىعا جايعاسسا, وزبەكستاننىڭ (1+1+0) زىلتەمىرشىلەرى ءتورتىنشى ورىنعا تابان تىرەدى.
