ول اتاسىنىڭ زيراتىن تابۋدى ارمانداعان ەكەن. مىنە, ارمانى دا ورىندالدى. وسىلايشا, پەرزەنتتىك پارىزىن وتەپ, ارقاسىنان اۋىر جۇك ءتۇستى. پروفەسسور ورلوۆششيناعا قىزى لاۋرامەن بىرگە كەلىپتى. مەيمانداردى ۆوكزالدان بۇكىلرەسەيلىك «ۆولونتەرى پوبەدى» قوزعالىسىنىڭ ورلوۆتاعى بولىمشەسىنىڭ جەتەكشىسى كيريلل يشكوۆ پەن وبلىستىق اكىمشىلىكتىڭ وكىلى اننا رۋبتسوۆا كۇتىپ الدى.
– سىزدەردى ورلوۆششينا جەرىندە كورگەنىمىزگە قۋانىشتىمىز! – دەدى كيريلل يشكوۆ تازا قازاق تىلىندە. سىزدەردىڭ بۇل ساپارلارىڭىز ءبىزدىڭ ءوڭىر ءۇشىن ۇلكەن مارتەبە. بابا رۋحىنا تاعزىم ەتۋ ءۇشىن ۇزاق قاشىقتىقتى ءجۇرىپ ءوتۋدىڭ ءوزى نەگە تۇرادى؟! ءوز كەزەگىندە قوزىباي مەن لاۋرا جىلى قارسى العان كيريلل مەن انناعا العىس ايتىپ, قازاقستان نىشاندارى بەينەلەنگەن كونفەت ورامىن سىيعا تارتتى.
الماتى قالاسىندا بۇل اۋلەتتى كوبى جاقسى بىلەدى. قوزىباي اناربەك – پەداگوگيكا عىلىمدارىنىڭ دوكتورى, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ پروفەسسورى, حالىقارالىق پەداگوگيكالىق ءبىلىم بەرۋ عىلىمدارى اكادەمياسىنىڭ اكادەميگى. ونىڭ زايىبى باقىتگۇل – ەڭبەگى سىڭگەن اكۋشەر-گينەكولوگ. ءۇش قىزى بار. ولار الەمگە ايگىلى جوعارى وقۋ ورىندارىن بىتىرگەن. ۇلكەنى لاۋرا اتاسىنىڭ رۋحىنا تاعزىم ەتكەن سوڭ ماسكەۋگە – ماسكەۋ مەملەكەتتىك پەداگوگيكالىق ۋنيۆەرسيتەتىنە پەداگوگيكالىق پراكتيكادان وتۋگە اتتانباق.
– اتام نۇراحمەت تولىباەۆ اۋىلدىق كەڭەستىڭ حاتشىسى بولىپ جۇمىس ىستەدى. سوعىس باستالعاندا لاۋازىمىنا بايلانىستى اسكەر قاتارىنا شاقىرىلعان جوق. الايدا ەلگە قاۋىپ تونگەندە بۇلاي ءجۇرۋدى ءجون كورمەي, قاتارلاستارىمەن بىرگە مايدان شەبىنەن تابىلۋدى كوزدەدى. ءسويتىپ, 1942 جىلدىڭ 9 تامىزىندا ەرىكتى تۇردە سوعىسقا اتتاندى, – دەيدى قوزىباي اناربەك.
نۇراحمەت تولىباەۆ 1943 جىلدىڭ 5 شىلدەسىندە ورلوۆ وبلىسىن جاۋدان قورعاۋ كەزىندە گلازۋنوۆ اۋدانىنىڭ الەكساندروۆكا دەرەۆنياسىنا جاقىن ماڭدا قازا تاپتى. ول نەبارى 37 جاستا ەدى. ونى باۋىرلاستار زيراتىنا جەرلەگەن. ونىڭ ەسىمى 1943 جىلدىڭ 5-6 شىلدەسىندەگى ۇرىستاردا قازا تاپقان 81-ءشى اتقىشتار ديۆيزياسى جاۋىنگەرلەرىنىڭ قۇرمەتىنە قويىلعان مەموريالدىق تاقتاعا ويىپ جازىلعان. باۋىرلاستار زيراتىندا ءبىر مىڭنان استام جاۋىنگەر جەرلەنگەن.
قوزىباي اناربەك ءدال وسى جەرگە كەلۋدى ارمانداپتى. اتاسى دامىل تاپقان باۋىرلاستار زيراتىن كورگەن ول كوزىنە جاس الدى. ارۋاقتاردىڭ رۋحىنا دۇعا باعىشتاپ, تاعزىم ەتتى. وسىدان ءبىر جىل بۇرىن اكەسىنىڭ قابىرىنەن سالىپ العان توپىراقتى باۋىرلاستار زيراتىنا شاشتى. بىرنەشە مينۋتتىق ۇنسىزدىكتەن كەيىن اتاسى جەرلەنگەن جەردىڭ ءبىر ۋىس توپىراعىن شۇبەرەككە ءتۇيىپ الدى. ونى وزىمەن بىرگە الا كەتپەك.
– بۇل ءاربىر ادامنىڭ قاسيەتتى بورىشى. مەنىڭ جانىم ەندى جاي تاپتى, – دەدى ول.
بۇدان سوڭ گلازۋنوۆ اۋدانى وچكين سەلولىق قونىسىنىڭ باسشىسى ولگا بوەۆا قوناقتاردى اۋداننىڭ وتكەننەن سىر شەرتەتىن تاريحي جانە كورنەكتى ورىندارىمەن تانىستىردى.
قوناقتار جىلى قارسى الىپ, قوناقجايلىلىق تانىتقان ورلوۆتىقتارعا العىس ايتۋمەن بولدى. قايتاردا «قازاقستانعا كەلىڭىزدەر!» دەگەن تىلەكتەرىن دە جەتكىزدى.
ەكاتەرينا ارتيۋحوۆا
