قوعام دايىن دەيتىنىم, رەفەرەندۋم وتكىزۋ تۋرالى باستامانىڭ ءوزى بۇقارانىڭ ءوز ىشىنەن شىعىپ وتىر. پرەزيدەنت حالىقتىڭ ۇنىنە قۇلاق اسىپ, ءتيىستى قادامدى جاسادى. رەفەرەندۋم – دەموكراتيالىق قوعامنىڭ ءبىر بەلگىسى, كورىنىسى. دەمەك قوعامنىڭ مۇنداي وزگەرىستەرگە قاراي اياق باسۋى جاقسىلىقتىڭ نىشانى.
رەفەرەندۋمعا دەيىن ءبىر اي ۋاقىت بار. وسى ارالىقتى ءتيىمدى پايدالانۋ كەرەك. ياعني بۇقارانى مەيلىنشە حابارلاندىرىپ, كونستيتۋتسياعا ەنگىزىلەتىن وزگەرىستەردى ناسيحاتتاپ, ءتۇسىندىرۋ قاجەت. الداعى ءبىر اي ەلىمىز ءۇشىن ماڭىزدى. ويتكەنى الداعى وزگەرىستەرگە قاتىستى جەر-جەردە ساراپشىلاردىڭ قاتىسۋىمەن تالقىلاۋلار وتەدى. وسىنىڭ نەگىزىندە كونستيتۋتسياعا ەنگىزىلەتىن وزگەرىستەر ەكشەلەدى. جاس تا, جاسامىس تا مۇنداي تالقىلاۋلاردان قالىس قالماۋى كەرەك. سەبەبى ەلدىڭ بولاشاعىنا ۇركەردەي عانا توپ ەمەس, ءسىز بەن ءبىز دە, ءبارىمىز جاۋاپتىمىز.
ۇسىنىلىپ وتىرعان وزگەرىستەردىڭ بارلىعى دەرلىك ورىندى. ماسەلەن, ءماجىلىستىڭ, ءماسليحاتتاردىڭ كۇشەيۋى, دەپۋتاتتاردىڭ ماجوريتارلىق جۇيەمەن سايلانۋى پارتيادا جوق بەلسەندىلەردىڭ اتقا مىنۋىنە تاپتىرماس مۇمكىندىك. سول سەكىلدى اۋىل, اۋدان اكىمدەرىن سايلاۋ دا باسقاشا سيپات الماق. اۋىل اكىمدەرىن سايلاۋ جەمىستى قادام بولعانىن دالەلدەدى. ەندىگى كەزەك اۋدان اكىمدەرىنە كەلىپ وتىر. الداعى ءبىر-ەكى جىلدا اۋدان اكىمدەرىن تاڭداۋ دا سايلاۋشىلاردىڭ قۇزىرەتىنە بەرىلمەك. ودان كەيىن وبلىس اكىمدەرىن سايلاۋ باستالادى. مۇنىڭ ءبارى ازاماتتىق قوعامدى العا باستىراتىن, دەموكراتيانى جاڭا دەڭگەيگە كوتەرەتىن وڭ وزگەرىستەر. ونىڭ ناتيجەسىن بىردەن بايقاماۋىمىز مۇمكىن. بىراق قوعام ونىڭ يگىلىگىن بىرتىندەپ سەزە باستايدى.
ءماجىلىس دەپۋتاتتارىنىڭ 30 پايىزى دا ماجوريتارلىق جۇيەمەن سايلاناتىن بولدى. بۇل پارتيالار اراسىنداعى باسەكەلەستىكتى ارتتىرادى. باسەكەلەستىك بولعان جەردە ساپا دا, ناتيجە دە بولادى. ەڭ باستىسى, قوعام بەلسەندىلەرى ءوزىن-ءوزى ۇسىنىپ, ويعا العان يدەيالارىن جۇزەگە اسىرۋعا مۇمكىندىك الادى.
باۋىرجان سەرىكباەۆ,
ساياساتتانۋشى
