جاس ورىنداۋشىلاردىڭ رەسپۋبليكالىق ءححىىى «جاس قانات» بايقاۋىنىڭ باس جۇلدەسىن استانالىق ونەرپاز جەڭىپ الدى.
ءار ايماقتىڭ بايگەگە ۇكىلەپ قوسقان 14 ونەرپاز ورەنى ءوزارا باق سىناسا كەلىپ, ارالارىنان 6 قاتىسۋشى قارا ءۇزىپ العا وزدى. ولار – ورالدىق نۇرسۇلتان قاراباليەۆ, تالدىقورعاندىق رۋحيا بايدۇكەنوۆا, قىزىلوردالىق شوقان ءابدىحان, استانالىق ەلدار وماروۆ, سەمەيلىك ءاليا اۋكەنوۆا مەن استانالىق باتىرجان باعدات ەدى.
جىل سايىن وتەتىن ءداستۇرلى جاس انشىلەر بايقاۋى سالتىنا ساي اۋەلى قاتىسۋشىلاردىڭ ورىنداۋىندا «جاس قانات» بايقاۋىنىڭ ءانۇرانى شىرقالدى. قازىلار القاسى مەن جاسقاناتتىقتاردى تانىستىرۋ سالتاناتى ءوز الدىنا بولەك مەرەكە. ساحنا ءتۇرلى جارىقتارمەن قۇلپىرىپ, قۇراقتاي اسەم ۇندەر قۇلاق قۇرىشىن قاندىردى. بايقاۋعا قاتىسۋشىلار العاشقى اينالىمداعى اندەرىن شىرقادى. تورگە اۋەلى ورالدان كەلگەن نۇرسۇلتان قاراباليەۆ كوتەرىلدى. سوسىن جەتىسۋ وڭىرىنەن سايىسقا قاتىسىپ جاتقان رۋحيا بايدۇكەنوۆانىڭ اسەم داۋسى اۋەلەي جونەلدى. ودان كەيىن سىر ەلى – جىر ەلىنىڭ ءدۇلد ۇلى شوقان ءابدىحان داۋسى مارجانداي توگىلدى. ال ەلوردالىق ەلدار وماروۆ توبە كورسەتكەندە زالداعى جۇرت ءدۇر سىلكىندى. استانانىڭ نامىسىن جىرتىپ ساحناعا شىققان بالاۋسا ءانشىنىڭ ءۇنى وسى قوشەمەت پەن قۇرمەتكە ابدەن لايىق ەدى. فينالدىق باسەكەدە ءتورتىنشى بولىپ ونەر كورسەتكەن ول قايرات نۇرتاستىڭ «ەح, قارىنداس» ءانى مەن فرانتسۋز تىلىندە تاڭداۋلى ءبىر ءان ورىندادى. بۇدان كەيىن سەمەي جەرىنەن كەلگەن ءاليا ءاۋكەنوۆانىڭ اۋەلەگەن ۇنىنە زال ۇيىپ قۇلاق ءتۇردى. التىنشى بولىپ ساحناعا كوتەرىلۋ باتىرجان باعداتقا بۇيىردى.
ال ەكىنشى اينالىمدا قاتىسۋشىلار وزدەرى ازىرلەگەن 3-ءشى ءاندى ورىنداپ شىقتى. قازىلار القاسىنىڭ مۇشەلەرى بەلگىلى انشىلەر باقىت شاداەۆا مەن ەرلان كوكەەۆ ونەرى بالاۋسا قاناتتارىن باپتاعان ورەندەرگە ۇلكەن شەبەرلىك سىنىبى سىندى اسەر قالدىردى. وتكەن جىلى «جاس قانات» بايقاۋىنىڭ «التىن قاناتىن» يەلەنگەن, «شىعىس بازارى» حالىقارالىق بايقاۋىنىڭ باس جۇلدەگەرى, اقتوبەلىك ديماش قۇدايبەرگەن اقان سەرىنىڭ «قاراتورعاي» ءانىن زاماناۋي ۇلگىدە تاماشا شىرقادى.
بايقاۋ جەڭىمپازدارىن ماراپاتتاۋ ساتىندەگى ساحنالىق بوياۋ كوز تويماستاي عاجاپ. قاتىسۋشىلار ساحنا تورىنە شاقىرىلدى. ونەرگە كومەك قولىن سوزۋدى ازاماتتىق پارىزى ساناعان جانكۇيەر دەمەۋشىلەر سىي-سياپاتتارى مازداعان كوپ ءۇمىتتى قايتا تۇتاتۋدا. مۇرات قۇسايىنوۆ تاپسىرۋىنداعى «قولا قانات» تاعى ءبىر استانالىق جاس ءانشى باتىرجان باعداتقا تيسە, يۋري اراۆين قولىنداعى «كۇمىس قاناتتىڭ» ورالدىق نۇرسۇلتان قاراباليەۆتىڭ ەنشىسىنە بۇيىرۋى تەگىن ەمەس. ەلوردالىق ەلدار وماروۆ «التىن قاناتتى» بەلگىلى كومپوزيتور كەڭەس دۇيسەكەەۆتىڭ قولىنان الىپ تۇرىپ قاتتى تولقىدى. ادامنىڭ ءوز-ءوزىن ءبىر ءسات كوكتەگى جارىق جۇلدىزداي اسقاق سەزىنۋى قانداي كەرەمەت كۇي دەسەڭشى. جۇلدىزدار اسپاندا عانا ەمەس, ساحنادا دا سامالاداي جارقىراپ تۋادى ەكەن-اۋ؟ تالدىقورعاندىق رۋحيا بايدۇكەنوۆا, سەمەيلىك ءاليا اۋكەنوۆا مەن قىزىلوردالىق شوقان ءابدىحان بايقاۋدىڭ ديپلوماتتارى اتانىپ جاتىر. ءبىر كەشتە بىرنەشە ءمولدىر بۇلاقتىڭ كوزى اشىلدى. ونەردىڭ تۇنىق باستاۋى – «جاس قاناتتىڭ» تالماي سامعاي بەرۋىن تىلەدىك ءبىز دە.
ايدا احمەتجاروۆا.
–––––––––––––––––
سۋرەتتەردى تۇسىرگەن
ەرلان وماروۆ.
