قىتايدا ىندەت جۇقتىرۋدىڭ 4 696 جاڭا جاعدايى تىركەلدى. سونىڭ ىشىندە شانحايدا – 4 269, بەيجىڭدە – 70, حەنان پروۆينتسياسىندا 79 ادامنان ۆيرۋس انىقتالدى. وسىعان وراي ازيا وليمپيادالىق كەڭەسى قىركۇيەكتە حانچجوۋدا وتەتىن ازيا ويىندارىن كەيىنگە شەگەردى.
ىندەتتىڭ ءورشۋى اسىرەسە, شانحاي وڭىرىنە ايتارلىقتاي اسەر ەتتى. سوڭعى ءبىر اپتاعا سوزىلعان كارانتين سالدارىنان 25 ملن تۇرعىندى ازىق-ت ۇلىكپەن قامتۋ قيىن بولىپ تۇر. قالا بيلىگى ايتىلىپ جاتقان سىن مەن نارازىلىققا قارسى شارا قولدانا الماي وتىر.
قحر توراعاسى سي تسزينپين قىتايدىڭ ەڭ جوعارى شەشىم قابىلدايتىن ورگانى بولىپ تابىلاتىن جەتى مۇشەدەن تۇراتىن ساياسي بيۋرونىڭ تۇراقتى كوميتەتىنىڭ الدىندا سويلەگەن سوزىندە شانحايداعى ىندەتكە قاتىستى پىكىر ءبىلدىردى. ول شەنەۋنىكتەردى كوروناۆيرۋسپەن كۇرەسۋدە تاباندىلىق تانىتۋعا شاقىردى. ء«بىز ۋحاندى قورعاۋدا ىندەتپەن كۇرەسىپ, جەڭىسكە جەتتىك. قازىر ءبىز شانحايدى قورعاۋ ءۇشىن كۇرەسىپ جاتىرمىز, ونى دا جەڭە الامىز», دەدى سي تسزينپين.
دەنساۋلىق ساقتاۋ ساراپشىلارى قىتايدا ۆاكتسينالاۋ مەن رەۆاكتسينالاۋ دەڭگەيى تىم تومەن ەكەنىن ايتىپ وتىر. سونىمەن قاتار ەلدىڭ ءتۇرلى ايماقتارىندا دەنساۋلىق ساقتاۋ رەسۋرستارىنىڭ بىركەلكى ەمەس ەكەنىن العا تارتادى. مۇنى قىتاي بيلىگى دە راستاپ وتىر. سوندىقتان شەكارانى ايقارا اشۋعا ءازىر رۇقسات بەرىلمەيدى. ەكونوميستەر قاتاڭ شەكتەۋلەر جالعاسا بەرسە, ەلدىڭ ەكونوميكالىق جاعدايى ناشارلايتىنىن ايتادى.
كانادالىق يممۋنولوگ دجون بەلل BBC Radio 4 ارناسىنا الەم قالىپتى جاعدايعا كوپ ۇزاماي ورالادى دەگەن پىكىر ءبىلدىردى. ونىڭ سەنىمدى جاۋاپ بەرۋى بەكەر ەمەس. ويتكەنى وكسفورد ۋنيۆەرسيتەتىنىڭ پروفەسسورى AstraZeneca كومپانياسىمەن بىرلەسىپ, كوروناۆيرۋسقا قارسى ۆاكتسينا ازىرلەگەن توپتىڭ مۇشەسى.
«ۆاكتسينالاردىڭ اسەرى وتە كۇشتى. ونى سالدىرتقان ادامدارعا قاۋىپ جوق. قازىر كوروناۆيرۋستان قايتىس بولىپ جاتقان ادامدار وتكەن شىلدەدەن بەرى ەكپە الماعان. بۇل قايعىلى جاعداي», دەيدى ول.
ونىڭ ايتۋىنشا, قارتتار مەن يممۋنيتەتى تومەن ادامدارعا تونگەن قاۋىپ ءالى دە سەيىلگەن جوق. سوندىقتان 65 جاستان اسقان ادامدار جانە يممۋندىق جۇيەسى ناشار ادامدار تاعى دا ەكپە سالدىرعانى ءجون دەپ ەسەپتەيدى.
