اسكەري الپينيستەر بۇل جولعى جەتىستىكتەرىن قر قارۋلى كۇشتەرىنىڭ 30 جىلدىعى مەن جەڭىستىڭ 77 جىلدىعىنا ارناپ وتىر.
«قارۋلى كۇشتەردىڭ 30 جىلدىعىنا ءبىزدىڭ ەرەن ەڭبەگىمىز!» ۇرانىمەن وتكەن شىڭدى باعىندىرۋ شاراسىنا 18272 اسكەري ءبولىمى كومانديرىنىڭ جاۋىنگەرلىك جانە ارنايى (تاۋ) دايىندىق جونىندەگى ورىنباسارى, پودپولكوۆنيك امانجول راحمەتوۆ باسشىلىق جاسادى», - دەپ حابارلايدى قورعانىس مينيسترلىگىنىڭ ءباسپاسوز قىزمەتى.
ون ادامنان تۇراتىن توپتىڭ قۇرامىندا قازاقستاننىڭ تانىمال الپينيستەرى, قارۋلى كۇشتەردىڭ اسكەري قىزمەتشىلەرى - مايور ماقسۇت جۇماەۆ, كاپيتان ۆاسيلي پيۆتسوۆ, سەرجانت الەكساندر سوفرىگيندەر بار.
كاسىبي شەبەرلىگىن تاعى ءبىر رەت دالەلدەگەن الپينيستەر كومانداسى شىڭنىڭ ەڭ بيىك نۇكتەسىنە قازاقستاننىڭ تۋىن تىكتى.
ايتا كەتەيىك, تەڭىز دەڭگەيىنەن 4120 مەتر بيىكتىككە دەيىن جەتەتىن «باتىر-پانفيلوۆشىلار» شىڭى ىلە الاتاۋىنىڭ كىشى الماتى شاتقالىندا ورنالاسقان.
