1992 جىلعى 7 مامىرداعى پرەزيدەنتتىڭ №745 جارلىعىنا سايكەس قازاقستان رەسپۋبليكاسىنىڭ قارۋلى كۇشتەرى قۇرىلعان بولاتىن. وسى 30 جىل بەدەرىندە ءوز وتانىنىڭ شىنايى پاتريوتتارى مەن اسكەري ماماندار دايارلاۋدىڭ ۇلتتىق جۇيەسى قالىپتاسىپ, قازاقستاننىڭ قارۋلى كۇشتەرىنىڭ تاريحىندا ەسىمى التىن ارىپپەن جازىلاتىن ناعىز كاسىبيلەردىڭ ۇلكەن شوعىرىنىڭ ءوسىپ شىققانىن اتاپ وتكەن پرەزيدەنت ءارحيۆىنىڭ ديرەكتورى ءاليا مۇستافينا وتان قورعاۋشىلاردى ايتۋلى مەرەكەسىمەن قۇتتىقتادى. ءاليا قۇسايىنقىزى اتاۋلى كۇندى مەرەكەلەۋ اياسىنداعى ءىس-شارالار وتكەن اپتادا نۇر-سۇلتان قالاسىنداعى باسقوسۋدان باستاۋ الىپ, الماتى قالاسىنداعى پرەزيدەنت ارحيۆىندە جالعاسىن تاۋىپ وتىرعانىن جانە ايرىقشا ماڭىز بەرەتىن سەبەپكە يە ەكەنىن ايتتى.
پرەزيدەنت ءارحيۆى مەن قك اسكەري-تاريحي مۋزەيى بىرلەسىپ دايىنداپ جارىققا شىعارعان «قازاقستان رەسپۋبليكاسىنىڭ قارۋلى كۇشتەرى. 1991-2001: قۇجاتتار مەن ماتەريالدار جيناعى» كىتابىنىڭ تۇساۋكەسەرى – مەرەكەگە لايىقتى تارتۋ.
قازاقستان ارمياسىنىڭ تاريحىن باياندايتىن قۇجاتتىق جيناقتىڭ جارىققا شىعۋىنا قولداۋ كورسەتكەنى ءۇشىن ارحيۆ ديرەكتورى قورعانىس مينيسترلىگىنىڭ باسشىلىعىنا العىسىن ءبىلدىردى. ارحيۆ ديرەكتورىنىڭ مالىمدەمەسى بويىنشا جاڭا باسىلىپ شىققان جيناقتا قازاقستان رەسپۋبليكاسى پرەزيدەنتىنىڭ, قازاقستان رەسپۋبليكاسى ۇكىمەتىنىڭ, قازاقستان رەسپۋبليكاسى قورعانىس مينيسترلىگىنىڭ نورماتيۆتىك-قۇقىقتىق اكتىلەرى, قارۋلى كۇشتەردىڭ جوعارى كوماندالىق قۇرامىنىڭ رەسمي حات الماسۋلارىنىڭ تۇپنۇسقالارى ۇسىنىلعان ارحيۆتىك قۇجاتتاردىڭ 120 دەرەگى العاش رەت جارىق كورىپ, قارۋلى كۇشتەردىڭ قۇرىلۋى مەن قالىپتاسۋى جانە رەفورمالانۋى قالاي جۇرگىزىلگەنىن كورسەتەتىن قۇندى ماعلۇماتتار كورەرمەنگە جول تارتتى.
مەملەكەت باسشىسى ق.توقاەۆتىڭ «جاڭا قازاقستان: جاڭارۋ مەن جاڭعىرۋ جولى» جولداۋىندا بەلگىلەنگەن باسىم باعىتتار قاتارىندا «ەل ىشىندە بولىپ جاتقان ىرگەلى قوعامدىق وزگەرىستەر مەن شيەلەنىسە تۇسكەن گەوساياسي تارتىس كەزىندە ايرىقشا ماڭىزى بار ءومىردىڭ بارلىق سالاسىندا جۇيەلى وزگەرتۋلەر جاسالادى» دەپ ارنايى توقتالۋىنىڭ ءبىر سەبەبى, قارۋلى كۇشتەردى جاڭعىرتۋعا دا قاتىسى بار ەدى. بۇگىنگى تاڭدا قازاقستاننىڭ قارۋلى كۇشتەرى 1992 جىلدان باستاپ جاۋىنگەرلىك رۋح پەن ءداستۇردىڭ تاريحي ساباقتاستىعىن ساقتاپ ءارى 30 جىلدا تولىق قالىپتاسىپ, سەرپىندى دامىپ, ءوز الەۋەتىن ارتتىرىپ كەلەدى.
وسى تۇرعىدا كەڭىرەك توقتالعان اسكەري-تاريحي مۋزەيدىڭ باسشىسى, كىتاپ اۆتورلارىنىڭ جەتەكشىسى, پولكوۆنيك نۇرتازا اسيلوۆ بۇرىن جاريالانباعان قۇندى قۇجاتتار جارىق كورگەن جەمىستى جوبا – جيناق كىتاپتىڭ ماڭىزدىلىعى مەن ەرەكشەلىگى تۋرالى بايانداپ بەردى. كىتاپتىڭ بولاشاق وفيتسەرلەردى دايارلاۋ جولىنداعى بارلىق اسكەري قۇرىلىمدار مەن جوعارعى اسكەري وقۋ ورىندارىنا قولجەتىمدى بولاتىنىنا ۋادە بەرىپ, كىتاپتىڭ قاناتقاقتى نۇسقاسىن قاتىسۋشى وفيتسەرلەر قۇرامىنا تابىستادى. مەملەكەتىمىزدىڭ اسكەري تاريحىن بولاشاق بۋىنعا تانىستىرۋ ماقساتىندا ۇيىمداستىرىلىپ جاتقان بۇل جوبا الداعى ۋاقىتتا دا جالعاسىن تاۋىپ, قازاقستان قارۋلى كۇشتەرىنىڭ قۋاتى مەن كەلبەتىن جىل ارالىقتارىنا ءبولىپ شىعارۋ جوسپارلانىپ وتىرعانىن جەتكىزدى.
مەرەيتويعا وراي وتكەن ماڭىزدى باسقوسۋدىڭ قۇرمەتتى قوناعى – اعا وفيتسەر, ايگىلى ي.پانفيلوۆتىڭ نەمەرەسى الۋا بايقاداموۆا كۋرسانتتارعا: «سىزدەر, بولاشاق وفيتسەرلەر, مىندەت, ابىروي, ەرلىك دەگەن ۇعىمداردىڭ ءمانىن سانامەن ەكشەپ, جادىلارىڭدا توقىپ, تاريحتان تاعىلىمدى تاربيە الۋعا تيىسسىڭدەر» دەپ, جاستاردى وتانعا ادال بولۋعا شاقىردى.
ءىس-شاراعا قارۋلى كۇشتەردىڭ ارداگەرلەرى, قارۋلى كۇشتەردىڭ اسكەري-تاريحي مۋزەيىنىڭ وكىلدەرى, راديوەلەكترونيكا جانە بايلانىس اسكەري-ينجەنەرلىك ينستيتۋتى مەن قۇرلىق اسكەرلەرى اسكەري ينستيتۋتىنىڭ وقىتۋشىلارى جانە كۋرسانتتارى, ارحيۆ مەكەمەلەرىنىڭ باسشىلارى قاتىستى.
الماتى
