ەستەرىڭىزگە سالساق, بيىل گرانتقا ۇمىتكەرلەر ۇبت-نى ەكى رەت تاپسىرۋ مۇمكىندىگىنە يە. ال تالاپكەرلەر تەستىلەۋدىڭ ەكى كەزەڭىندە بەيىندى پاندەردىڭ ءبىر كومبيناتسياسىن عانا تاڭداي الادى. بيىل وبلىس بويىنشا 4 307 وقۋشى «تۇلەك» مارتەبەسىن يەمدەنگەن. وبلىستىق ءبىلىم بەرۋ باسقارماسى باسشىلىعىنىڭ حابارلاۋىنشا, مامىر جانە ماۋسىم ايلارىندا وتەتىن ۇبت-عا تىركەلۋ ءالى باستالماپتى. «ۇلتتىق تەستىلەۋ ورتالىعىنىڭ سايتىندا تىركەلۋ ىسكە قوسىلعاننان كەيىن تۇلەكتەر اتالعان ايلاردا تەستى تاپسىرۋ كۇنى مەن ۋاقىتىن وزدەرى تاڭدايدى», دەيدى باسقارماداعىلار.
جۋىقتا ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ الەۋمەتتىك جەلىدە ۇبت-نى تاپسىرۋ بارىسىندا بىرنەشە جاڭاشىلدىقتى جاريالادى. «كومپيۋتەردە كالكۋلياتور, مەندەلەەۆ جانە تۇزداردىڭ ەرىگىشتىك كەستەسى بولادى. سونىمەن قاتار ەرەكشە ءبىلىم بەرۋ قاجەتتىلىكتەرى بار بالالارعا قوسىمشا تەستىلەۋ ۋاقىتى, ياعني 40 مينۋت بەرىلىپ, ولارعا سۋرەتسىز, سىزبالارسىز جانە دياگراممالارسىز تەست نۇسقالارى جاسالعانىن اتاپ وتكەنىمىز ءجون. ال ۇبت-عا قاتىسۋشىلارعا تەستىلەۋ اياقتالعاننان كەيىن ەكراندا, جەكە كابينەتىندە «جەكە تاقىرىپتىق تالداۋ» قولجەتىمدى», دەيدى ر.ەمەلباەۆ.
بەلگىلى بولعانداي, «قازاقستان تاريحى» ءپانى بويىنشا تەست تاپسىرمالارىنىڭ سانى وزگەرىسسىز ساقتالىپ, كونتەكستىك تەست تاپسىرمالارى ەنگىزىلگەن. «قۇقىق» ءبىلىم بەرۋ سالاسى بويىنشا شەكتى بالل 75-كە وزگەرگەن. ال وزگە سالالار بويىنشا وزگەرىستەر جوق.
