ادام وي-ساناسىنىڭ وزگەرۋى وڭاي ەمەس. بۇل تاعدىرلى كەزەڭنىڭ جاۋاپكەرشىلىگى, اشىعىن ايتايىق, بۇعان دەيىنگى جىلدار مەن ۋاقىتقا قاراعاندا ەش سالىستىرۋعا كەلمەيتىن دەڭگەيگە كوتەرىلە باستادى. اشىقتىق پەن تۋراشىلدىقتى ساياساتتا, ەكونوميكالىق ماسەلەدە جانە الەۋمەتتىك, قۇقىقتىق سالادا تۇبەگەيلى وڭ وزگەرىستەر سيپاتىندا ايتۋ ساناعا ءسىڭدى, ءۇمىتتى وياتىپ قانا قويعان جوق, بۇقارانىڭ جۇمىلىپ, ۇيىسۋىنا سىلكىنىس اكەلدى. ۇلتتىق وزەكتى ماسەلەلەرگە قىزمەت ەتەتىن قوعامدىق ۇيىمداردىڭ جۇمىسىن جاساندىلىق اتاۋلىدان ارىلىپ, ناقتى ايتۋعا تۋرا كەلەدى. داڭعازا ماداق, ورىندى-ورىنسىز جىلتىراققا ىڭعاي تانىتا بەرۋگە اۋەستىك داعدىدان اۋلاق بولۋعا شاقىرامىز. مۇنداي كورىنىستەر ەندى ەشكىمگە ابىروي اپەرمەيدى, وسى جاعدايدى مىقتاپ ەسكەرۋىمىز كەرەك.
مەملەكەت باسشىسىنىڭ قولعا الىپ وتىرعان ساياسي رەفورمالارى مەن باستامالارى حالىقتىڭ كوڭىلىنەن شىعىپ جاتقانى انىق. قاراپايىم حالىق بۇل ءىرى وزگەرىستەردى ىرگەلى ەل بولۋدىڭ جاڭا كەزەڭى دەپ ءتۇسىنىپ, قوعامدى تازارتۋ ارقىلى دامىتۋ قادامدارىن قۋاتتاۋ ۇستىندە. ءاربىر وتباسى مەن ۇجىم مۇشەلەرىنىڭ ادىلەتتىلىك قاعيداسىن جان-جاقتى قولداۋى جانە ءاربىر وتانداستارىمىز ءوزى ءومىر ءسۇرىپ وتىرعان ەركىن ەلدىڭ ازاماتى رەتىندە ءۇن قاتۋى ەرەكشە ماڭىزدى. بۇل قاجەت دەسە, كەشەگى زامانداردا تارىداي شاشىلعان تاريحىمىزدى تۇگەندەۋگە قانشالىقتى كۇش سالىپ كەلسەك, ەندى قازاق جۇرتىنىڭ كەلەشەگى, عالامدىق جاعدايدىڭ سىن-قاتەرىنە قارسى تۇرا ءبىلۋ ءۇشىن قارمانۋدىڭ ناعىز قاhارماندىق تانىتار, مەملەكەتتىك نەگىزدەر مەن ساياسي جۇيەنى تۇبەگەيلى تۇزەيتىن كۇن تۋعانى انىق.
ءبىز پرەزيدەنتتىڭ كونستيتۋتسياعا ەنگىزىلەتىن وزگەرىستەر مەن تولىقتىرۋلاردى رەفەرەندۋمعا ۇسىنىپ, حالىقتىڭ ەركىن تاڭداۋىنا بەرۋىن وسى تۇرعىدان قولدايمىز. بۇل كوپتىڭ تىلەگىمەن قۇپ الىنىپ, قابىلداناتىن اتا زاڭىمىزدىڭ قازىرگى قولدانىستاعى نۇسقاسىنىڭ 33 بابىنا وزگەرىس ەنگىزىلەتىنى جانە ولار قانداي وزەكتى, ءتۇيىندى ماسەلەلەر ەكەندىگىن ەسەپكە الساق, ەلىمىزدىڭ ساياسي جۇيەسىندە تۇبەگەيلى بەتبۇرىس بولاتىنىن انىق اڭعارتادى.
مەملەكەتتىك باسقارۋدىڭ جاڭا مودەلىنە كوشۋى, اۋقىمدى وزگەرىستەردىڭ ماعىنالى, تاعدىرشەشتى تۇستارى وسىنداي ويعا جەتەلەيدى. ءالى كۇنگە دەيىن ۇلتتىق قۇندىلىقتاردى بايىتا ءتۇسۋ بارىسىندا «قازاققا قانداي يدەيا, قانداي مادەنيەت, قانداي ەكونوميكا كەرەك؟» دەگەن ومىرشەڭ ساۋالدارعا جاۋاپتى جانتالاسا ىزدەۋدى باستان وتكەرىپ كەلە جاتقانىمىز راس. بۇل كۇندەرى وي ەرىكتى, ءسوز ەرىكتى, بولاشاققا بولجام دا ەرىكتى بولۋعا ءتيىس. ال مۇنداي قوعامدىق وي-سانا سىلكىنىسى ەلدىك سەنىمنەن ءنار السا, ەلدىڭ العىسى مەن تەرەڭ تۇسىنىستىگى ودان ءارى كوركەيەدى.
سول ەلدىك زور سەنىم كۇن وتكەن سايىن جاقسىلىق تىلەۋمەن جانە تازا پەيىلمەن ارتا تۇسۋدە. بۇل قۇبىلىستاردى اينالامىزدان بايقاماۋ, نە سەزىنبەۋ مۇمكىن ەمەس. قازىرگى ەل باسشىلىعىنىڭ كوپ جىل بويى قوعامعا رەنىش تۋعىزعان ويسىزدىقتاردى تۇبىرىمەن جويىپ, كورەر كوزگە زاڭدى بەلدەن باسقان وزبىرلاردى قاتاڭ تارتىپكە شاقىرىپ جاتقانى, زاڭ ۇستەمدىگىن اشىق ورنىقتىرۋ ءىس-ارەكەتتەرى وڭ كوزقاراستاردى قالىپتاستىرۋدا. ونىڭ تەمىرقازىعى – شىندىق, ويلىلىق پەن دالدىك, بۇگىنگى كۇن مەن كەلەشەكتىڭ قامىن ساباقتاستىرا زەردەلەۋ, ءوزىڭدى-ءوزىڭ سىيلاۋ جانە وزگەگە سىيلاتا ءبىلۋ.
حالىقتان وتكەن اسىلىڭ جوق. ەندىگى جەردە ەلىمىزدىڭ ءار پەرزەنتى قالىڭ قاۋىمنىڭ جوعىن جوقتايتىن, ساياسي بيىككە كوتەرىلەتىن دەڭگەيگە جەتۋگە ءتيىس. ءار ازاماتتىڭ ۇلتتىق مۇددەنى باسشىلىققا الۋىن مىندەتتەۋدى جۇكتەۋ دە بەكەردەن-بەكەر كۇن تارتىبىنە قويىلىپ وتىرعان جوق.
بۇل رەفەرەندۋم ساياسي ءمانى جاعىنان بۇكىل قۇزىرەتتى ءبىر ادامعا قاراتىپ نەگىزدەيتىن جولدان تارتىنىپ, كەرىسىنشە مەملەكەتتى باسقارۋ ىسىنە ازاماتتىق قوعامدى تىكەلەي قاتىستىرىپ, ادىلەتتى قازاقستان قۇرۋعا باعىتتالعان. تۋعان ەل-جۇرتىمىزدىڭ ءومىر ءسۇرۋ ساپاسىن وركەنيەتتى, ناقتى ىسپەن جاقسارتۋدى مۇرات ەتەدى. سول يماندى دا يبالى حالقىمىز ىرىلىگىن تانىتىپ, كوشەلى, كورگەندى ەكەنىن پاش ەتۋگە جۇمىلادى. ءبىز وسى بەدەرلى ۋاقىتتا تەك اقيقاتقا جۇگىنۋگە جول اشتىق. بۇل – ادامداردىڭ كۇتكەن ءومىرىنىڭ باستى ولشەمى. ايتپەسە, جىلدار بويى الەۋمەتتىك ادىلدىككە قول جەتكىزە الماعان ءتۇرلى جاعدايلار قاتتى الاڭداتىپ, جۇرت نارازىلىعىن تۋدىرعان جوق پا ەدى؟!
ەلىمىز بويىنشا بيلىك پەن قوعام اراسىنداعى قارىم-قاتىناستاعى شىنايى وزگەرىستەردىڭ بۇقارالىق سيپاتقا يە بولا باستاۋىنىڭ تۇپكى ءمانى وسىندا جاتىر. سول سەبەپتى تاۋەلسىز مەملەكەتىمىزدىڭ جاڭا وركەندى, جاڭا تاريحي بەلەسىن باتىلدىقپەن قۇنتتاپ جاتقان ءىرى ساياسي باستامالاردىڭ جۇزەگە اسىپ, قۇتتى بولۋىن قالايمىز.
مەيرامبەك تولەپبەرگەن,
ءماجىلىس دەپۋتاتى
