پرەزيدەنت توتەنشە جاعداي كەزىندەگى شەكارا ءتارتىبى تۋرالى زاڭعا قول قويدى

توتەنشە جاعدايلاردىڭ الدىن الۋ مەن زارداپتارىن جويۋ كەزىندە قازاقستان مەن رەسەيدىڭ شۇعىل قىزمەتتەرى مەملەكەتتىك شەكارانى وڭايلاتىلعان تارتىپپەن كەسىپ وتەتىن بولادى. قر پرەزيدەنتى نۇرسۇلتان نازارباەۆ ءتيىستى زاڭعا قول قويدى. بۇل تۋرالى اقوردانىڭ ءباسپاسوز قىزمەتى حابارلادى. «مەملەكەت باسشىسى قازاقستان رەسپۋبليكاسىنىڭ «1994 جىلعى 28 ناۋرىزداعى قازاقستان رەسپۋبليكاسى ۇكiمەتi مەن رەسەي فەدەراتسياسى ۇكiمەتi اراسىنداعى ونەركاسىپتىك اۆاريالاردىڭ, اپاتتاردىڭ, دۇلەي ءزىلزالالاردىڭ الدىن الۋ جانە ولاردىڭ زارداپتارىن جويۋ سالاسىنداعى ىنتىماقتاستىق تۋرالى كەلىسىمگە اۆاريالىق-قۇتقارۋ قىزمەتتەرى مەن قۇرالىمدارىنىڭ مەملەكەتتىك شەكارانى كەسىپ ءوتۋىنىڭ وڭايلاتىلعان ءتارتىبى تۋرالى حاتتامانى راتيفيكاتسيالاۋ تۋرالى» زاڭىنا قول قويدى», - دەلىنگەن حابارلامادا. ەسكە سالا كەتەيىك, بۇعان دەيىن مەملەكەت باسشىسىنىڭ ازاماتتىق قورعانىس, وندىرىستىك جانە ءورت قاۋىپسىزدىگى, مەملەكەتتىك ماتەريالدىق رەزەرۆتى جاساقتاۋ, توتەنشە جاعدايلاردى ەسكەرتۋ جانە ونىڭ سالدارىن جويۋعا ارنالعان زاڭ جوبالارىن جەتىلدىرۋگە باعىتتالعان «ازاماتتىق قورعانىس تۋرالى» زاڭعا قول قويعانى حابارلانعان ەدى. ساكەن مايلىباي. دەرەككوز: اقوردا سايتى.