ماجارستاننىڭ سىرتقى ەكونوميكالىق بايلانىستار جانە سىرتقى ىستەر ءمينيسترى پەتەر سيارتو قازاقستانعا جۇمىس ساپارى بارىسىندا قر پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردىمەن بىرگە باق وكىلدەرىنىڭ الدىنا شىعىپ, سۇراقتارعا جاۋاپ بەردى.
«بىزدەگى قاجەتتىلىكتىڭ 65%-ىن رەسەي مۇنايى جاۋىپ وتىر. بۇل ءبىز وسىلاي ويلاستىرعاندىقتان جاسالعان نارسە ەمەس. ماجارستاندى ەنەرگيامەن قامتاماسىز ەتۋدىڭ جالعىز فيزيكالىق جولى وسى بولىپ تۇر. ياعني, مۇناي قۇبىرىن سالۋ وتە قىمبات ءارى وتە كوپ ۋاقىتتى قاجەت ەتەدى. وسىنىڭ ءبارىن ەسكەرگەندىكتەن قاجەتتى مۇنايدىڭ 65 پايىزىن «درۋجبا» مۇناي قۇبىرى ارقىلى الىپ وتىرمىز. بۇل - كۇن سايىن 20 مىڭ توننا مۇناي دەگەن ءسوز», دەدى پەتەر سيارتو.
سونداي-اق ول مۇناي يمپورتىندا قازاقستاننىڭ ۇلەسى ارتقانىن اتاپ ءوتتى.
«كەيىنگى كەزدە قازاقستاننان مۇناي ساتىپ الۋ كولەمىن دە كوبەيتتىك. قازىرگى تاڭدا ءبىز تۇتىناتىن مۇنايدىڭ 16%-ى قازاقستاننان كەلەدى. بۇل كولەم دە رەسەي ارقىلى بىرىكتىرىلگەن مۇناي قۇبىرىمەن جەتەدى. بۇل ماسەلە تۇبەگەيلى ۇلتتىق مۇددەمىزگە ساي قارالىپ جاتقانىن اتاپ وتكىم كەلەدى. بۇل تۋرالى باتىستىڭ نەمەسە شىعىستىڭ نە ويلايتىنى ماڭىزدى ەمەس. ءبىز ءۇشىن جالعىز ماسەلە ماڭىزدى, ول – ماجارستاندى ەنەرگيامەن قامتاماسىز ەتۋ. بۇل ىسكە قاتەر تونبەۋى كەرەك. ەشكىم ماجار حالقىنىڭ ۋكرايناداعى شيەلەنىس ءۇشىن قالتاسىنان قۇن تولەگەنىن تالاپ ەتە المايدى», دەدى ماجارستان وكىلى.
