بۇل تۋرالى قر سىرتقى ىستەر ءمينيسترىنىڭ ورىنباسارى رومان ۆاسيلەنكونىڭ بۋداپەشتكە جۇمىس ساپارىنان ءمالىم بولدى.
ءباسپاسوز قىزمەتىنىڭ مالىمەتتەرىنە قاراعاندا, ساپاربارىسىندا قازاقستان مەن ماجارستان اراسىنداعى ستراتەگيالىق ارىپتەستىكتى ودان ءارى دامىتۋ پەرسپەكتيۆالارى, «جاڭا قازاقستاندى» قۇرۋ باعىتى جانە حالىقارالىق كۇن تارتىبىندەگى وزەكتى ماسەلەلەر تالقىلاندى.
ماجارستاننىڭ سىرتقى ساياسي ۆەدومستۆوسى مەملەكەتتىك حاتشىسىنىڭ ورىنباسارى اندراش باراني ر. ۆاسيلەنكومەن بىرگە ەكى مينيسترلىك اراسىنداعى ساياسي كونسۋلتاتسيالاردىڭ كەزەكتى راۋندىن وتكىزدى. تاراپتار ساياسي, ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق سالالارداعى ىنتىماقتاستىقتىڭ كەڭ اۋقىمدى ماسەلەلەرىن تالقىلادى.
سونىمەن بىرگە ەكىجاقتى ءىس-شارالاردىڭ كەستەسى, ونىڭ ىشىندە ماجارستاننىڭ سىرتقى ەكونوميكالىق بايلانىستار جانە سىرتقى ىستەر ءمينيسترى پەتەر سيارتونىڭ قازاقستانعا جۇمىس ساپارى جانە جوعارى دەڭگەيدەگى بايلانىستارى قارالدى.
ساۋدا-ەكونوميكالىق ىنتىماقتاستىققا ەرەكشە نازار اۋدارىلدى. 2021 جىلدىڭ قورىتىندىسى بويىنشا ەكى ەل اراسىنداعى ءوزارا ساۋدا كولەمى 138,7 ملن دوللاردى قۇراپ, 2020 جىلعى كورسەتكىشتەردەن 19% اسىپ كەتتى.
ماجارستاننان قازاقستان ەكونوميكاسىنا تىكەلەي ينۆەستيتسيالار كولەمى 2005 جىلدان باستاپ 270 ملن. دوللاردى قۇرادى. قازاقستاندا 30-عا جۋىق ماجار كومپانياسى جۇمىس ىستەيدى, ونىڭ ىشىندە «MOL», «Gedeon Richter», «Egis» جانە ت. ب. بار. كەلىسسوزدەر قورىتىندىسى بويىنشا ر. ۆاسيلەنكو جانە 2015-2019 جىلدارى ماجارستاننىڭ قازاقستانداعى ەلشىسى رەتىندە جۇمىس ىستەگەن ا. باراني ستراتەگيالىق ارىپتەستىكتى ودان ءارى نىعايتۋ باعىتىنا بەيىلدىلىگىن راستادى. ديپلوماتتار قازاقستان-ۆەنگريا قارىم-قاتىناستارى ىنتىماقتاستىقتىڭ بارلىق سپەكترى بويىنشا ودان ءارى دامي بەرەتىنىنە سەنىم ءبىلدىردى.
اۋىل شارۋاشىلىعىن, ەنەرگەتيكانى, قۇرىلىستى, اۆتوموبيل جانە حيميا يندۋسترياسىن, ءتۋريزمدى, يننوۆاتسيالار مەن فارماتسەۆتيكانى قوسا العاندا, ينۆەستيتسيالىق ىنتىماقتاستىقتىڭ پەرسپەكتيۆالى سالالارى ەرەكشە اتاپ ءوتىلدى. وسى كۇنى ر. ۆاسيلەنكو ەكى ەل اراسىنداعى ديپلوماتيالىق قارىم-قاتىناستاردىڭ ورناعانىنا 30 جىل تولۋىنا جانە «جاڭا قازاقستاندى» قۇرۋ جونىندەگى رەفورمالارعا ارنالعان «دوڭگەلەك ۇستەل» جۇمىسىنا قاتىستى. ءىس-شارا قاتىسۋشىلارىنا مينيسترلىكتەر مەن ۆەدومستۆولار قاتارىنان, سىرتقى ەكونوميكالىق بايلانىستار جانە سىرتقى ىستەر ينستيتۋتى, اكادەميالىق, ساراپتامالىق جانە ىسكەرلىك توپ وكىلدەرىنە قازاقستان مەن ماجارستان اراسىنداعى قارىم-قاتىناستاردىڭ نەگىزگى دامۋ كەزەڭدەرى, قازاقستانداعى قازىرگى جاعداي, ادام قۇقىقتارىن قورعاۋ جۇيەسىن نىعايتۋ جونىندەگى مەملەكەتتىڭ كەشەندى شارالارى, سونداي-اق اۋقىمدى ساياسي مەن الەۋمەتتىك-ەكونوميكالىق رەفورمالاردى ىسكە اسىرۋ تۋرالى اقپارات جەتكىزىلدى.
ماجار سپيكەرلەرى ارىپتەستىكتىڭ 30 جىلى ىشىندە قول جەتكىزىلگەن ەكىجاقتى قارىم-قاتىناستاردىڭ جوعارى دەڭگەيىن اتاپ ءوتتى, سونداي-اق ەلىمىزدەگى ساياسي رەفورمالاردىڭ جاڭا باعىتىنا قولداۋ ءبىلدىرىپ, «جاڭا قازاقستاندى» قۇرۋ جونىندەگى پرەزيدەنتتىك باعدارلامانىڭ ەرەكشە وزەكتىلىگى مەن ۋاقتىلىعىن اتاپ ءوتتى.
