قازاق ونەرىن ەۋروپاعا تانىتتى

جاقىندا اتىراۋداعى د.نۇرپەيىسوۆا اتىنداعى اكادەميالىق قازاق حالىق اسپاپتارى وركەسترى شەتەلدىك گاسترولدەن ورالدى. اتىراۋلىق وركەستردى گاسترولدىك ساپارعا باستاپ بارعان وبلىس اكىمىنىڭ ورىنباسارى شىڭعىس مۇقاننىڭ ايتۋىنشا, قازاق ونەرىن شەتەل جۇرتشىلىعىنا كەڭىنەن تانىتۋ. اكادەميالىق وركەستر قۇرامىنداعى حالىق اسپاپتارىن شەبەر مەڭگەرگەن ونەرپازدار ناۋرىزدىڭ سوڭعى ون كۇندىگىندە اۋەلگى گاسترولدىك ساپارمەن تۇركيانىڭ مانيسا قالاسىندا ونەر كورسەتكەن. ودان سوڭ ىستامبۇل قالاسىنداعى 5000 ورىندىق «توتكاپى» مادەنيەت ورتالىعىندا دا قازاقتىڭ ءان-كۇيىن قالىقتاتتى. وركەستردىڭ بۇدان كەيىنگى گاسترولدىق ساپارى ەۋروپا ەلدەرىندە, ناقتىلاي ايتقاندا, گەرمانيانىڭ بەرلين جانە اۆستريانىڭ ۆەنا قالاسىندا ءساتتى جالعاسىپتى. كوركەمدىك جەتەكشى جانە باس ديريجەر وراق جاۋىروۆ «ەۋروپا ەلدەرىندە ۇلى كۇيشى-سازگەر قۇرمانعازى مەن دينانىڭ, تۇركەش پەن تاتتىمبەتتىڭ كۇمبىرلەگەن كۇيلەرىنە, ىقىلاستىڭ قوبىز سارىنىنا دۇبىرلەتە قول سوعىلدى. ءبىز سونىمەن بىرگە, ە.قۇسايىنوۆ, ا.سايجان, ا.جايىموۆ شىعارمالارىمەن شەكتەلمەي, شەتەلدىك كومپوزيتورلاردىڭ دا تۋىندىلارىن ورىندادىق», دەيدى. كۇي اناسى دينانىڭ ەسىمىن اسقاقتاتىپ جۇرگەن اكادەميالىق وركەستر قۇرامىنداعى امانجان باسىعاريەۆ, مارجان تورەحانوۆا, گاريبجان مۇقانعاليەۆ, اقمارال نوعاي­باەا, قايرات كاكيموۆ سىندى ونەر يەلەرى تىڭدارماندارىن قازاق ءان-كۇيلەرىمەن سۋسىنداتىپتى. جولداسبەك شوپەعۇل, «ەگەمەن قازاقستان». اتىراۋ وبلىسى.