دەنىڭىز ساۋ بولسىن!

كۇن سايىن قوعامدا اتقارىلىپ جاتقان جۇمىستار جونىندە بۇقارالىق اقپارات قۇرالدارى ارقىلى تانىسىپ, ءبىلىپ جاتامىز. دەنساۋلىق ساقتاۋ سالاسى دا بۇدان تىس قالمايدى. اتاپ ايتقاندا, مەديتسينادا كوپ وزگەرىستەر بولدى. الداعى ىستەلەتىنى دە قىرۋار. حالىققا كورسەتىلەتىن كومەكتىڭ قاۋىپسىزدىگى مەن قولجەتىمدىلىگىنە, ساپانىڭ جاقسارۋىنا كۇش-جىگەر جۇمىلدىرىلۋدا.

 

بۇل رەتتە دەنساۋلىق ساقتاۋ مينيسترلىگى مەن ءتيىستى ورگاندار «سالاماتتى قازاقستان» باعدارلاماسىن ىسكە اسىرۋ ءۇشىن ايانباي ەڭبەك ەتۋدە. ال دارىگەرلىك كومەكتىڭ ساپاسىن جاقسارتۋ, باسەكەگە قابىلەتتى دەنساۋلىق ساقتاۋدى قالىپتاستىرۋ ءۇشىن مەديتسينالىق ۇيىمداردى سىرتقى كەشەندى باعالاۋ (اككرەديتتەۋ) جالعاسا بەرمەك. باعدارلامادا مەديتسينالىق ۇيىمداردى اككرەديتتەۋ ۇلتتىق ستاندارتتار نەگىزىندە, ال كەيىننەن حالىقارالىق ستاندارتتار نەگىزىندە جۇزەگە اسىرىلاتىن بولادى دەپ ناقتىلانعان. ەندى, وسى ماسەلەگە توقتالىپ وتەيىك. اككرەديتتەۋ دەگەنىمىز نە؟ ودان ەمدەلۋشىلەرگە كەلەر پايدا قانداي؟ «اككرەديتتەۋ» ءسوزى – لاتىن تىلىنەن اۋدارعاندا «سەنىم بىلدىرەمىن» دەگەن ماعىنانى بىلدىرەدى. ول مەديتسينالىق عىلىم مەن تەحنولوگيانىڭ قازىرگى زامانعى دامۋى نەگىزىندە بەلگىلەنگەن ستاندارتتارعا سايكەستىگىن باعالاۋ ءۇشىن قولدانىلادى. اككرەديتتەۋ – ەرىكتىلىك, تاۋەلسىزدىك, ادىلدىك, جاريالىلىق جانە ايقىندىق قاعيداتتارىنا نەگىزدەلگەن, ءارى باسەكەگە قابىلەتتى دەنساۋلىق ساقتاۋدى قالىپتاستىرۋ, مەديتسينالىق كومەكتىڭ ساپاسىن جاقسارتۋ ءۇشىن جۇرگىزىلەدى. سوندىقتان اككرەديتتەۋدەن وتۋگە نيەتتەنگەن مەديتسينالىق ۇيىمدار جان-جاقتى باعالاۋدان ءوتۋى ءتيىس. ول كەزدە جالپى باسقارۋ, دارىلىك قاۋىپسىزدىك, ءورت قاۋىپسىزدىگى, ناۋقاستىڭ قاۋىپسىزدىگى, قارجىنى باسقارۋ, ەڭبەك شارالارىنىڭ جۇرگىزىلۋ بارىسى, ىشكى اۋديت, رەسۋرستاردى باسقارۋ, ەڭبەك گيگيەناسى جانە ت.ب. پارامەترلەرگە ءجىتى نازار اۋدارىلادى. بۇل مەديتسينالىق قىزمەت ساپاسىن ارتتىرۋعا, تەحنيكالاردى زامان تالابىنا سايكەستەندىرۋگە, مەديتسينا سالاسىن جەتىلدىرۋگە سەپتىگىن تيگىزەدى. وسىنداي باعالاۋدان وتكەننەن كەيىن عانا اۋرۋحانا قويىلاتىن تالاپتارعا سايكەس كەلە مە, جوق پا دەپ نىق ايتۋعا بولادى. سايىپ كەلگەندە, ارينە سىرتقى كەشەندى باعالاۋدان وتكەن مەديتسينالىق ۇيىمدارعا ءوز دەنساۋلىعىمىزدى سەنىپ تاپسىرۋىمىزعا بولادى. دۇنيەجۇزىلىك تاجىريبەدە اككرەديتتەۋ ستاندارتتارى بويىنشا باعالاۋدان وتكەن جانە «ISQua دەنساۋلىق ساقتاۋداعى ساپا بويىنشا حالىقارالىق قاۋىمداستىقپەن» تانىلعان مەديتسينالىق مەكەمەلەرگە حالىق ەرەكشە سەنىم ارتادى. سوندىقتان, ەگەر ءسىز مەديتسينالىق كومەك الۋ ءۇشىن قاي ەمحاناعا باراتىنىڭىزدى بىلمەسەڭىز, ساپا ستاندارتتارىنا ساي كەلەتىن كلينيكاعا جۇگىنگەنىڭىز ءجون. ول ءتىزىمدى ءسىز دەنساۋلىق ساقتاۋ مينيسترلىگى مەن رەسپۋبليكالىق دەنساۋلىق ساقتاۋدى دامىتۋ ورتالىعىنىڭ رەسمي سايتىنان الا الاسىز. ياعني, اككرەديتتەلگەن كلينيكالاردا ەمدەلۋشىلەردىڭ قۇقىقتارى ساقتالادى, مەديتسينالىق كومەك ءتيىستى دەڭگەيدە كورسەتىلەدى دەپ ناقتى ايتۋعا بولادى. دەنىڭىز ساۋ بولسىن! راسۋل قاسىمبەكوۆ, «رەسپۋبليكالىق دەنساۋلىق ساقتاۋدى دامىتۋ ورتالىعى» رمك اككرەديتتەۋ ورتالىعىنىڭ باس مامانى.