وڭىردەگى جالاقى بەرەشەگى وڭ شەشىلدى

جىل باسىندا اتىراۋ وبلىسىنداعى «اسد» جشس-ءنىڭ جۇزگە جۋىق جۇمىسشىسى بىرنەشە ايلاپ جالاقىلارىن الماعانىنا نارازىلىق بىلدىرگەن ەدى. ويتكەنى, وڭىردەگى ءىرى جوبالاردىڭ بىرىنە مەردىگەرلىككە تارتىلعان اتالعان سەرىكتەستىك جۇمىسشىلارىنا جالاقى تولەۋ ۋادەسىن ورىنداماعان. ءتىپتى, جالاقى قارىزىن قايتارۋدى دا مۇلدەم ويلاماعان سەرىكتەستىك باسشىسى كەڭسەسىنە باس سۇعۋدى دا قويعان. قۇقىق قورعاۋ ورگاندارى انىقتاعانداي, بۇل سەرىكتەستىك جۇمىسشىلاردىڭ جالاقىسىنا قوسا, ەڭبەك دەمالىسى ءۇشىن بەرىلەتىن قارجىنى دا, جۇمىستان قىسقارعانىنا بايلانىستى وتەماقىنى دا بەرمەي كەلگەن. سونداي-اق, زەينەتاقى قورىنا اۋدارىلماعان قارىزدارى جيناقتالىپ قالعان. وبلىستىق پروكۋراتۋرانىڭ رەسمي وكىلى اسلان نۇرعاليەۆتىڭ حابارلاۋىنشا, پروكۋرورلار «اسد» جشس جۇمىسشىلارىنىڭ جالاقىسىن ءوندىرۋدى ءوز باقىلاۋىنا العان. سونىڭ ناتيجەسىندە اتالعان سەرىكتەستىك جۇمىسشىلارى كوپتەن زارىعا كۇتكەن جالاقىسىنا قول جەتكىزدى. سونىمەن بىرگە, بانكروت دەپ تانىلعان «اتىراۋ-بالىق» اق-تىڭ 534 قىزمەتكەرىنىڭ 46,3 ميلليون تەڭگە جالاقىسى دا تولەندى. وسىلايشا, جىل باسىنان بەرگى ءۇش ايدا پروكۋرورلار قابىلداعان شارالاردىڭ ناتيجەسىندە 86 ميلليون تەڭگەدەن اساتىن مەرزىمى ءوتىپ كەتكەن جالاقى قارىزى وتەلىپ, 962 جۇمىسشىنىڭ ەڭبەك قۇقىعى قورعالدى. مۇنداي پروكۋرورلىق ىقپال ەتۋ شارالارى ناتيجەسىندە وڭىردەگى جالاقى بەرەشەگى تولىعىمەن وڭ شەشىمىن تاپتى. جولداسبەك شوپەعۇل, «ەگەمەن قازاقستان». اتىراۋ وبلىسى.