دانەكەر

ازاماتتىق  قوعام – ۇلكەن كۇشكە  اينالىپ  كەلەدى. ۇكىمەتتىك  ەمەس ۇيىمدار اتقارۋشى  بيلىكتىڭ بارماعان, مۇمكىن  ۇلگەرمەگەن ماسەلەلەرىن كوتەرەدى, ءىستىڭ شەشىمىن  تابۋىنا جاعداي جاسايدى.  ءسويتىپ, اتقارۋشى  بيلىك پەن جۇرتشىلىق  اراسىنداعى  دانەكەرگە  اينالادى. جاقىندا پرەزيدەنت اكىمشىلىگى, مادە­نيەت مينيسترلىگى جانە قوستاناي وبلىستىق اكىمدىگى بىرىگىپ وتكىزگەن سەميناردا وسى ماسەلە قارالدى. وعان استانا جانە الماتى قالالارىنىڭ جانە وبلىستاردىڭ ىشكى ساياسات باسقارمالارىنىڭ جەتەكشىلەرى قاتىستى. سەمينار وتكىزىلىپ وتىرعان قوس­تاناي وبلىسى وڭىرىندەگى اتقارىلعان ىستەر سەمينارعا قاتىسۋشىلاردىڭ قىزىعۋ­ش­ىلىعىن تۋ­عىزدى. ۇكىمەتتىك ەمەس ۇيىم­داردىڭ باسى-قاسىندا جۇرگەن ەنتۋزياستار بۇل كۇندە قايىرىمدىلىق جوبالاردى تەك ۇتىپ العان گرانت قارجىسىنا عانا اتقارمايدى, وعان كاسىپكەرلىكتەن تۇسكەن تابىستى دا سالادى. وبلىستىڭ الەۋمەتتىك دامۋىندا ماڭىزدى سەكتورعا اينالىپ وتىرعان ۇكىمەتتىك ەمەس ۇيىمدار پروبلەمالىق ماسەلەلەردى شەشۋگە كەلگەندە مەملەكەتتىك ورگانداردىڭ تولىققاندى ارىپتەسىنە اينالىپ ۇلگەردى. سەمينارعا قاتىسۋشىلارعا قوستاناي وبلىسىندا جۇمىس ىستەپ جاتقان بىرنەشە ۇكىمەتتىك ەمەس ۇيىمدار جۇمىسى تانىستىرىلدى. مىسالى, «ارىلۋ» («پرەودولەنيە») ور­تالىعى مۇشەلەرىنىڭ باسىم كوپشىلىگى اربا­دا وتىرعان جاندار. ونىڭ زالدارى زاما­­ناۋي ەلەكتروندى اپپاراتۋرالارمەن, ترەنا­جەرلارمەن جابدىقتالعان. مۇمكىندىگى شەك­تەۋلى جاندار وسىعان كەلىپ جاتتىعادى. ولار­عا مۇنى ەشكىم دە جاساپ بەرگەن جوق, وزدەرى قول جەتكىزدى. ورتالىق مۇشەلەرى «جىلا­ماعان بالاعا ەمشەك جوق» دەگەن قازاقى قاعيدانىڭ دۇرىستىعىن الدەقاشان تۇسىنگەن. سوندىقتان, ولار اكىمدىكتەن دۇكەن­دەرگە دەيىن, جالپى, اربادا وتىرعان ادام­داردىڭ باراتىن ورىندارىنىڭ بارلى­عىن دا ەلىمىزدىڭ زاڭدارىنا سايكەس قولايلى پاندۋستاردىڭ بولۋ كەرەكتىگىن زەرتتەيدى, تەك­سە­رەدى, ءتيىستى ورىندارعا ايتىپ, جاساتادى. ال «حاتيكو» قالپىنا كەلتىرۋ ورتالى­عىنا بارىپ, مۇگەدەكتەر دەمالادى, ەمدەلەدى. ول ورماننىڭ ىشىندە, تابيعات اياسىندا ورنالاسقان. ماڭدايشاسىنا «جاپون حالقىنان ەسكەرتكىش» دەپ جازىلعان. ماتتاقام جاپوندار گرانتپەن بەرگەن قارجىسىنىڭ ءوز ماقساتىنا جۇمسالۋىن جانە تەز ورىندالۋىن ءجىتى قاداعالاپتى. ۇكىمەتتىك ەمەس ۇيىم مۇشەلەرى ورماننىڭ ىشىنە لەزدىڭ اراسىندا ەرەكشە ءۇيدى سالىپ, وندا مۇمكىندىگى شەكتەۋلى جانداردىڭ ەمدەلۋى مەن دەمالۋىنا جاعدايدى جاساپ قويدى. ءتورت قابىرعانى باققان عارىپ جانداردىڭ كوپشىلىگىنە ورمانداعى مۇنداي دەمالىس ۇيىنە بارۋ تۇگىلى ۇيدەن شىعۋدىڭ ءوزى مۇڭ ەمەس پە؟ ۇكىمەتتىك ەمەس ۇيىمداردىڭ بەلسەندى قىز­مەتىن جەرگىلىكتى بيلىك تە ەسكەرمەي وتىر­عان جوق. وسىدان ءبىر-ەكى جىل بۇر­ىن ولاردىڭ پايدالانۋىنا قوستاناي قالاسىنداعى ءساندى تاريحي عيماراتتىڭ ءبىرىن بەردى. وندا قازىر «گرين» ازاماتتىق باستامالاردى دامىتۋ ورتالىعى ورنالاسقان. بۇل قامقورلىقتىڭ قارىم­تاسىن ۇكىمەتتىك ەمەس ۇيىمدار قايتار­ماي وتىرعان جوق. «گرين» ورتالىعى وسى از ۋاقىت ىشىندە ۇكىمەتتىك ەمەس ۇيىمدار ءمۇ­شە­لەرىنە ءۇش مىڭداي اقىل-كەڭەستەر بەر­دى, وتىزدىڭ سىرتىندا سەمينارلار مەن ترەنينگتەر, ەكى رەت الەۋمەتتىك باستامالار مەن جوبالار جارمەڭكەسىن وتكىزدى. سونىمەن قاتار, مەملەكەتتىك سۇرانىستاردى ورىنداپ, ونداعان ميلليون تەڭگەنىڭ گرانتتارىن جۇزەگە اسىردى. سەمينارعا قاتىسۋشىلار ۇكىمەتتىك ەمەس ۇيىمدار مەن جەرگىلىكتى بيلىك ىقپالداسا جۇمىس ىستەسە شەشىمىن تاپپايتىن ماسەلە بولمايتىنىن ءتۇسىندى. ءنازيرا جارىمبەتوۆا, «ەگەمەن قازاقستان». قوستاناي.