ۋنيۆەرسيتەتتىڭ تاراتقان اقپاراتىنا سۇيەنسەك, بيىلعى 18 ناۋرىزدا Ualikhanov University ۆىمپەلىن حالىقارالىق عارىش ستانساسىنا «سويۋز مس-21» كەمەسى جەتكىزگەن, ال 30 ناۋرىزدا «سويۋز مس-19» عارىش كەمەسىنىڭ رەسەيلىك-امەريكالىق حالىقارالىق ەكيپاجىمەن تۇسىرىلەتىن اپپاراتىندا كەرى جەرگە جەتكىزىلدى. اتالعان ميسسيا ءبىلىم جانە عىلىم مينيسترلىگى تاراپىنان قولداۋ تاۋىپ, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنە قاراستى اەروعارىش كوميتەتىنىڭ كومەگىمەن جۇزەگە اسىرىلدى.
Ualikhanov University وكىلى اياۋلىم قۇلجانوۆا عارىشكەرلەر مەن استروناۆتاردىڭ قولتاڭباسى بار ۆىمپەلگە حالىقارالىق عارىش ستانساسىنىڭ ارنايى ءمورى قويىلعانىن, بۇل ۆىمپەلدىڭ عارىشتا بولعانىن راستايتىنىن جەتكىزدى. «اتالعان ءمور حالىقارالىق عارىش ستانساسىنىڭ بورتىندا تۇرادى جانە ەشقاشان جەر بەتىندە بولمايدى. بۇل جويىلادى, بىراق ونىڭ ءمورى وبەكتىنىڭ عارىشقا بارعانىنا دالەل بولىپ قالادى», دەيدى.
ال وسى جوو-داعى ستۋدەنتتىك پارلامەنتتىڭ توراعاسى الماز تەمىروۆتىڭ ايتۋىنشا, قازاقستان ۋنيۆەرسيتەتتەرى اراسىندا Ualikhanov University جالاۋى العاش رەت عارىشتا بولدى. بۇعان دەيىن بىرقاتار شەتەلدىك ۋنيۆەرسيتەت, سونىڭ ىشىندە ماسساچۋسەتس تەحنولوگيالىق ينستيتۋتى, ماسكەۋ مەملەكەتتىك ۋنيۆەرسيتەتى وزدەرىنىڭ ۆىمپەلدەرىن عارىشقا جىبەردى. «ۆىمپەل Ualikhanov University باس ەكسپوزيتسياسىنىڭ ستەندتەرىندە قويىلادى. بۇل ۋنيۆەرسيتەتتىڭ جوعارى بەدەلىن جانە ونىڭ اقمولا وبلىسى مەن جالپى قازاقستاننىڭ ەكونوميكاسى, حالىق شارۋاشىلىعى ءۇشىن بىلىكتى كادرلار دايارلاۋداعى ماڭىزدىلىعىن بەينەلەيدى», دەدى ول.
ايتا كەتەيىك, ش.ءۋاليحانوۆ اتىنداعى ۋنيۆەرسيتەت كوكشەتاۋ پەداگوگيكالىق ينستيتۋتى بولىپ 1962 جىلى قۇرىلعان. ۋنيۆەرسيتەت جەتەكشىسى ايماقتىق جوعارى وقۋ ورىندارىنىڭ ءبىرى سانالادى. جوو باكالاۆرياتتىڭ 55 ءبىلىم بەرۋ باعدارلاماسى, ماگيستراتۋرانىڭ 36 باعدارلاماسى, دوكتورانتۋرانىڭ 9 باعدارلاماسى بويىنشا ماماندار دايارلايدى. 2021 جىلى جوو-نىڭ تاۋەلسىز اككرەديتتەۋ جانە رەيتينگ اگەنتتىگى جاساعان رەيتينگىندە Ualikhanov University قازاقستاننىڭ ۇزدىك 10 جوو-نىڭ قاتارىنا ەنگەن.
