«پرەزيدەنت قاسىم-جومارت توقاەۆ حالىققا جولداۋىندا بۇقارالىق سپورت, دەنە شىنىقتىرۋ جانە بالالار باسىمدىققا يە ەكەنىن اتاپ ءوتتى. مەملەكەت باسشىسى بالالار مەن جاسوسپىرىمدەردىڭ سپورتتىق الەۋەتىن قولداۋدىڭ جاڭا ينستيتۋتىن ەنگىزۋدى تاپسىردى. وسىعان بايلانىستى پرەزيدەنت جولداۋىن قولداۋ ماقساتىندا بالالار, جاستار جانە مۇگەدەكتىكتىڭ بارلىق ءتۇرى بار ەرەسەكتەر قاتىسقان چەمپيونات ۇيىمداستىرىلدى. بۇل – مۇگەدەكتەر ارباسىنا تاڭىلعان, كورمەيتىن, ساڭىراۋ, مىلقاۋ, اقىل-ويى بۇزىلعان جانە اۋتيزم اۋرۋى بار بالالار. چەمپيوناتتىڭ باستى ماقساتى – ەلوردادا وسى سپورت ءتۇرىنىڭ تانىمالدىلىعىن ارتتىرۋ, سونداي-اق ەل چەمپيوناتىنا قاتىساتىن مىقتى سپورتشىلاردى انىقتاۋ», دەدى دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ.
اتالعان چەمپيونات نۇر-سۇلتان قالاسى اكىمدىگىنىڭ جانە قالالىق دەنە شىنىقتىرۋ جانە سپورت باسقارماسىنىڭ قولداۋىمەن ءوتتى.
«تۋرنيرگە مۇمكىندىگى شەكتەۋلى سپورتشىلار قاتىستى. بۇل پارا-كاراتە چەمپيوناتى مەملەكەتتىك رەفورما اياسىندا العاش رەت ۇيىمداستىرىلىپ وتىر. بارلىق بالا نۇر-سۇلتان قالاسىندا ARTSPORTEDU مەملەكەتتىك باعدارلاماسى اياسىندا №10, 37 جانە 91 مەكتەپتەردىڭ سەكتسيالارى مەن ۇيىرمەلەردە قارجىلاندىرۋ بويىنشا جاتتىعادى. سونداي-اق مۇمكىندىگى شەكتەۋلى سپورتشىلارعا ارنالعان جاسوسپىرىمدەر سپورت مەكتەبىندە دە ءبىلىم الىپ جاتىر. بۇرىن مۇنداي جارىستار تەك دەنساۋلىعى جاقسى بالالار اراسىندا وتكىزىلەتىن. قازىر مۇگەدەك بالالار اراسىندا دا ءجيى وتەدى. جارىسقا 60-قا جۋىق سپورتشى قاتىستى», دەدى پارا-كاراتە فەدەراتسياسىنىڭ پرەزيدەنتى مەيرامگۇل دۋكۋەۆا.
جارىستى قازاقستان رەسپۋبليكاسىنىڭ پارا-كاراتە فەدەراتسياسى, نۇر-سۇلتان قالاسىنىڭ WKF كاراتە-دو جانە ءداستۇرلى جاۋىنگەرلىك ونەر فەدەراتسياسى جانە №91 مەكتەپ-گيمنازياسى ۇيىمداستىردى. جەڭىمپازدار مەدالدارمەن, گراموتالارمەن جانە سىيلىقتارمەن ماراپاتتالدى.
