بيىلعى جاس پەدياترلاردىڭ كونفەرەنتسياسى ەلىمىزگە بەلگىلى بالالار حيرۋرگى, التىن قولدى دارىگەر, پەدياتريا جانە بالالار حيرۋرگياسى عىلىمي ورتالىعىنىڭ حيرۋرگيا ءبولىمىنىڭ مەڭگەرۋشىسى, مەديتسينا عىلىمدارىنىڭ دوكتورى, اقش-تىڭ تسينتسينناتي كلينيكاسىنىڭ قۇرمەتتى پروفەسسورى, ەۋروپا جاراتىلىستانۋ عىلىمدارى اكادەمياسىنىڭ اكادەميگى نۇرلان احپاروۆتى ەسكە الۋ قۇرمەتىنە ارنالدى. وكىنىشكە قاراي, دارىگەردىڭ 2021 جىلدىڭ قازان ايىندا مەزگىلسىز قايتىس بولۋى مەديتسينا قاۋىمداستىعى ءۇشىن ورنى تولماس قازا بولدى.
كونفەرەنتسياعا تمد, قازاقستان جانە شەتەلدەردەن 100-دەن اسا جاس پەدياتر مەن بالالار حيرۋرگ-دارىگەرى قاتىستى. باسقوسۋ وفلاين جانە ونلاين تۇرىندە ءوتتى.
پەدياتريا جانە بالالار حيرۋرگياسى عىلىمي ورتالىعىنىڭ باسشىسى ريزا بورانباەۆا نۇرلان نۇركين ۇلىنىڭ حيرۋرگيا ءبولىمىنىڭ العاشقى ۇجىمىن ءوزى قۇرىپ, ورتالىقتا بالالار حيرۋرگياسى سالاسىن دامىتۋعا زور ۇلەس قوسقانىن اتاپ ءوتتى. «ول 10 مىڭنان اسا وپەراتسيا جاساپ, مىڭداعان بالانىڭ ءومىرىن الىپ قالدى, ەڭ اۋىر, كۇردەلى وپەراتسيالاردى جاسادى. دارىگەردى ەلىمىزدىڭ ءار ايماعىنان ارنايى ىزدەپ كەلەتىن. ول بالالاردى ەمدەۋمەن قاتار, ءبىلىم مەن عىلىمعا ەرەكشە نازار اۋداردى. عىلىم رەيتينگىسى بويىنشا حيرۋرگيا ءبولىمى ۇزاق جىلداردان بەرى تەك ءبىرىنشى ورىندا تۇردى. جاڭا عىلىمي تىڭ يدەيالاردىڭ گەنەراتورى, جاڭاشىلدىققا ۇمتىلعان جارقىن دا دارىندى تۇلعا بولدى. بىرنەشە بۋىن بىلىكتى حيرۋرگتەردى, مىقتى مامانداردى تاربيەلەپ شىعاردى. ونىڭ كوپشىلىگى بۇگىندە جوعارى باسشىلىق لاۋازىمدا قىزمەت ىستەيدى. ورتالىقتا ن.احپاروۆ مەكتەبىنىڭ نەگىزى قالانعان», دەپ اتاپ ءوتتى.
ءىس-شارا بارىسىندا كوپ جىل قىزمەتتەس بولعان ارىپتەستەرى مەن شاكىرتتەرى جىلى ەستەلىكتەرىمەن ءبولىستى. ارىپتەسى, اقتاۋ وبلىستىق كوپبەيىندى بالالار اۋرۋحاناسىنىڭ بالالار حيرۋرگياسى ءبولىمىنىڭ مەڭگەرۋشىسى سۇلتانبەك تۇماشەۆ ن.نۇركين ۇلى شىنىندا التىن قولدى دارىگەر, التىن ادام, كوڭىلى دارقان, پەيىلى تازا, ادامگەرشىلىگى مول, ناعىز زيالى بولعانىن ەسكە الدى. ء«وز ىسىنە دەگەن ۇقىپتىلىعى مەن ادالدىعىنىڭ ارقاسىندا ارىپتەستەرى اراسىندا اسا بەدەلدى, ابىرويلى بولدى. ول ءوز ءىسىنىڭ بىلگىرى, جۇمىسىنا قالتقىسىز بەرىلگەن, ۋاقىتپەن ساناسپايتىن ەدى. قاشان حابارلاسساڭ دا, كۇن-تۇنگە قاراماستان كومەك قولىن سوزۋعا ءازىر تۇراتىن ناعىز بالالار جاناشىرى بولاتىن. تۇنگى ۇشتە حابارلاسساڭ دا, تەلەفونىن كوتەرەتىن. كوپجىلدىق تاجىريبەسىن دە جاس ماماندارعا ۇيرەتۋدەن استە جالىقپاي ءوتتى. نۇرلان نۇركين ۇلى 2021 جىلى ءبىزدىڭ وتىنىشىمىزبەن اقتاۋعا كەلىپ شەبەرلىك ساباعىن وتكىزگەنى ەسىمىزدە ماڭگى قالادى. بىرگە ەكى بالاعا كۇردەلى وپەراتسيا جاسادىق. سول جىلى سوڭعى رەت كورەتىنىمدى كىم ويلاعان. ءبىز ءۇشىن اۋىر قازا بولدى, ءالى سەنە الار ەمەسپىز. كوزى ءتىرى بولعاندا ءالى قانشاما بالاعا كومەگى تيەر ەدى. اتتەڭ, بەينەتىنىڭ زەينەتىن كورەر شاعىندا ومىردەن وتكەنى وكىنىشتى-اق», دەيدى.
ء«بىز 30 جىلدان اسا بىرگە جۇمىس ىستەدىك. مەن عىلىم بويىنشا ديرەكتور ورىنباسارى قىزمەتىن اتقارعان جىلدارى ول كانديداتتىق جانە دوكتورلىق ديسسەرتاتسياسىن قورعادى. بۇكىل زەرتتەۋلەر مەن وپەراتسيالاردى ءوزى جاسادى. نۇرلان نۇركين ۇلىنىڭ ارقاسىندا حيرۋرگيا ءبولىمى بەدەلدى بولىمگە اينالدى. ول جاۋاپكەرشىلىگى مول, ءوز ىسىنە ادال, كوڭىلى دارقان, جۇرەگى تازا, كەڭپەيىل جان ەدى. تاربيەسى مەن مادەنيەتتىلىگىنىڭ ارقاسىندا دارىگەرلەردىڭ اعا بۋىنىنا دا, جاس بۋىنعا دا ەرەكشە قۇرمەتپەن, ىلتيپاتپەن قارايتىن. ءوزىنىڭ بار بىلگەنىن جاستارعا ۇيرەتۋدەن جالىقپايتىن. بۇگىندە ونىڭ شاكىرتتەرى بارلىق حيرۋرگيالىق ەم-دومدى مەڭگەرگەن. ول اكادەميك كامال ءسارۋار ۇلىنىڭ سۇيىكتى شاكىرتى ەدى, ماعان باۋىرىمداي بولدى, ۇنەمى قامقورلىعىن, قۇرمەتىن كورسەتىپ جۇرەتىن», دەپ ەسكە الادى پەدياتريا ورتالىعىنىڭ پروفەسسورى, ونكوگەماتولوگ دارىگەر كۇلان وماروۆا.
وسىمەن بەسىنشى جىل قاتارىنان وتكەن كونفەرەنتسيانىڭ باستى ماقساتى – جاس عالىمداردىڭ عىلىمي الەۋەتىن ارتتىرۋ, پەدياتريا جانە بالالار حيرۋرگياسى سالاسىنداعى وزەكتى ماسەلەلەردى كوتەرۋ, دامۋى مەن كەلەشەگىن سارالاۋ, پەدياتريا جانە بالالار حيرۋرگياسى سالاسىنداعى يننوۆاتسيالار بويىنشا جاس عالىمدار اراسىندا تىعىز حالىقارالىق قارىم-قاتىناس ورناتۋ, جاس مامانداردى عىلىممەن اينالىسۋعا شاقىرۋ.
نۇرلان نۇركين ۇلى مەديتسينا سالاسىندا 40 جىلدان استام ۋاقىت قىزمەت ەتسە, ونىڭ 28 جىلىن پەدياتريا جانە بالالار حيرۋرگياسى عىلىمي ورتالىعىنا ارناپ, 1994 جىلدان باستاپ بالالار حيرۋرگياسى ءبولىمىنىڭ مەڭگەرۋشىسى قىزمەتىن ابىرويمەن اتقاردى. وسى ارادا حيرۋرگيا ءبولىمى 1994 جىلى اكادەميك كامال ورمانتاەۆتىڭ جەتەكشىلىگىمەن اشىلعانىن, كامال ءسارۋار ۇلى نۇرلان نۇركين ۇلىن ءبولىم باسشىسى ەتىپ ءوزى تاعايىنداعانىن ەسكە الا كەتۋ كەرەك. ول ارىپتەستەرىنىڭ اراسىندا العاشقىلاردىڭ قاتارىندا جالپى حيرۋرگيا مەن بالالار كولوپروكتولوگياسى بويىنشا اقش-تا ارنايى كۋرستان ءوتىپ, رەسەي قالالارىندا «گارمونيك» ۋلترادىبىستىق سكالپەلدى مەڭگەرۋ مەن لاپوروسكوپيالىق حيرۋرگيادان ءدارىس الدى. امەريكادان كەيىن قولى جەڭىل حيرۋرگ قازاقستاندا تۇڭعىش رەت انورەكتالدى مالفورماتسيا اقاۋلارى بار ء(ىش قۋىسى مۇشەلەرىنىڭ قاتەرسىز جانە قاتەرلى ىسىكتەرى) بالالارعا ارنالعان جاڭا وپەراتسيا جاساۋ ءتۇرىن پەدياتريا ورتالىعىندا عانا ەمەس, ەلىمىزدىڭ بارلىق وبلىسىنا ەنگىزدى. رەسەيدە مۇنداي وپەراتسيا ءتۇرى ءبىر جارىم جىلدان كەيىن عانا ەنگىزىلگەن.
حالىقارالىق دەڭگەيدە وتكەن كونفەرەنتسيادا پەدياتريا جانە حيرۋرگيا سالاسىنىڭ بارلىق قىرىن, وزەكتى ماسەلەلەرىن قامتيتىن 100-دەن استام عىلىمي جوبا مەن بايانداما ۇسىنىلدى. عىلىمي جوبالاردى پەدياتريا جانە حيرۋرگيا سالاسىنىڭ بىلىكتى ماماندارىنان قۇرالعان قازىلار القاسى سارالادى. كونفەرەنتسيا سوڭىندا ۇسىنىلعان جۇمىستار «ۇزدىك بايانداما», «ۇزدىك ماقالا», «ۇزدىك پوستەرلىك بايانداما» اتالىمدارى بويىنشا انىقتالىپ, ارنايى ديپلومدارمەن ماراپاتتالدى. ال ۇزدىك باياندامالار مەن عىلىمي ماقالالار «پەدياتريا جانە بالالار حيرۋرگياسى» عىلىمي جۋرنالىندا جاريالانادى.
حالىقارالىق جيىن اياسىندا نۇرلان نۇركين ۇلىنىڭ قۇرمەتىنە ەسكەرتكىش تاقتا اشىلۋىن ارىپتەستەرى ونىڭ وتاندىق عىلىم مەن بىلىمگە, مەديتسينا سالاسىنا قوسقان زور ۇلەسىنە دەگەن ىزەتتىڭ جارقىن كورىنىسى دەپ قابىلدادى.
