بۇل قارجى جاڭا كەن بايىتۋ فابريكاسىنىڭ قۇرىلىسىنا جۇمسالعان. فابريكا نەگىزىنەن ءوندىرىس كەزىندە جيناقتالعان قالدىقتاردى وڭدەيدى. سونداي-اق بولاشاقتا وندىرىلگەن كەندى وڭدەۋگە ءتيىس.
ديار قاناشەۆتىڭ پىكىرىنە قاراعاندا, كومپانيا جاعدايدى رەتتەۋدىڭ ەكى ستسەناريىن ازىرلەپتى. وپتيميستىك ستسەناري بويىنشا, جوبا گەولوگيالىق بارلاۋ جۇرگىزىلىپ, قورلار ناقتىلانعاننان كەيىن 2024 جىلى پايدالانۋ فازاسىنا شىعارىلادى. پەسسيميستىك تۇرعىدان العاندا كومپانيا بەستوبە كەنىشى مەن بايىتۋ فابريكاسىن كونسەرۆاتسيالايدى, سودان كەيىن جويادى.
– ستسەناريدى تاڭداۋ ۇسىنىلىپ وتىرعان كەن ورنىن كارەرلىك ادىسپەن يگەرۋ جوباسىنا دەگەن قوعامنىڭ رەاكتسياسىنا بايلانىستى. وسى جىلدىڭ 18 ناۋرىزىندا كەن ورنىنىڭ كەنشىلەرى پرەزيدەنت قاسىم-جومارت توقاەۆتى كەنىشتەگى شاحتا ءوندىرىسىنىڭ جابىلۋىنا جول بەرمەۋگە شاقىرىپ, ۇندەۋ جاريالادى. ءوندىرىس توقتاسا, مىڭنان استام ادام جۇمىسسىز قالادى. ولاردىڭ قايدا باراتىنى دا بەلگىسىز, – دەيدى د.قاناشەۆ.
ەسكە سالا كەتەيىك, بىلتىر شىلدەدە كومپانيا جەرگىلىكتى تۇرعىنداردىڭ نارازىلىعىنا بايلانىستى بەستوبەدەگى فابريكانىڭ قىزمەتىن توقتاتۋعا ءماجبۇر بولدى. 2021 جىلى «التىنالماس» كاسىپورىندارى 11,9 توننا دورە قورىتپاسىن ءوندىردى. بيىلعا ارنالعان وندىرىستىك جوسپار ءتۇرلى فاكتورلارعا بايلانىستى وزگەرىپتى. سونىڭ وزىندە جىل سوڭىنا دەيىن 15 توننا ءونىم الۋ جوسپارلانىپ وتىر.
– بولجامدىق ستسەناريدەن اۋىتقىعان سەبەبىمىز, رەسەيگە قارسى سانكتسيالارعا بايلانىستى لوگيستيكالىق پروبلەمالار ورىن الۋى مۇمكىن. كومپونەنتتەر مەن ماتەريالداردى جەتكىزۋ جۇيەلەرى قۇلدىراۋدا. رەسەيدەگى ءبىز جۇمىس ىستەگەن جابدىقتاردى جەتكىزۋشىلەردىڭ وكىلدىكتەرى جابىلدى. Siemens, Schneider Electric, ABB سياقتى ەلەكتر جابدىقتارىن جەتكىزۋشىلەر بىزبەن ماسكەۋدىڭ ديستريبيۋتورلىق ورتالىقتارى ارقىلى جۇمىس ىستەدى. ءبىر تۇندە اتالعان كومپانيالاردىڭ ەندى ءبىزدىڭ ايماققا جۇمىس ىستەمەيتىنى تۋرالى حات الدىق. ءبارى كەنەتتەن بولدى. سوندىقتان ەشكىم ۆ جوسپارىن ويلاستىرماعان. قازىر لوگيستيكانىڭ ءارتۇرلى نۇسقالارىن, سونىڭ ىشىندە قىتاي ارقىلى تاسىمالداۋ جاعىن قاراستىرىپ جاتىرمىز, – دەيدى د.قاناشەۆ.
«التىنالماس» وتاندىق التىن وندىرۋشىلەردىڭ توپ-3 قاتارىنا كىرەدى. كومپانيانىڭ ءوندىرۋشى كاسىپورىندارى جامبىل, قاراعاندى جانە اقمولا وبلىستارىندا ورنالاسقان. سونداي-اق شىعىس قازاقستان وبلىسىندا بارلاۋ جوباسى بار. كومپانيانىڭ قارجىلىق ناتيجەلەرى تۋرالى ەڭ سوڭعى اقپاراتقا سۇيەنسەك, 2021 جىلدىڭ 9 ايىندا ءتۇسىم 21 پايىزعا – 118,9 ملرد تەڭگەگە دەيىن, تازا پايدا 102 پايىزعا – 87,2 ملرد تەڭگەگە دەيىن وسكەن.
بەستوبە جوباسى «قازاقالتىندى» ساتىپ العاننان كەيىن «التىنالماسقا» اۋىسقان بولاتىن. بۇل رەتتە ورتاق مامىلەگە كەلۋ ءۇشىن ءۇش جىل (2019-2021 جىلدار) ۋاقىت قاجەت بولعانى ەسىمىزدە. «قازاقالتىننىڭ» بۇرىنعى يەلەرى – ۆلاديمير كيم مەن ەدۋارد وگاي كومپانيانىڭ 100 پايىزدىق اكتسياسى ءۇشىن شامامەن 310 ملن دوللار الدى. 2022 جىلعى 1 ساۋىردەگى جاعداي بويىنشا, كومپانيانىڭ اكتسيونەرلەرى كەلەسىدەي ۇلەسكە يە: GOLDEN RESERVES B.V. – جاي اكتسيالاردىڭ 60 پايىزى, ۆلاديمير جۇمانباەۆ – 22 پايىز, ديار قاناشەۆ – 9,5 پايىز, يگور ۆەتيۋل – 5,5 پايىز.
