بۇل ءسوز جالپى مەملەكەتتىك تۇرعىدا كەڭ كولەمدە ايتىلعانىمەن ونىڭ مازمۇن-مىندەتىن ءاربىر اكىم ءوزى باسقارىپ وتىرعان اۋماق تۇرعىسىنان سالماقتاپ قاراعانى ءجون. ويتكەنى ءبىز, ءاربىر قازاقستان ازاماتى جولداۋدا اتاپ كورسەتىلگەندەي وزگەرىس جولىن وزىمىزدەن باستاۋعا ءتيىسپىز. جاڭا قازاقستان قۇرۋعا ءىس-ارەكەت, كەمەل وي, پارىقتى سوزىمىزبەن ۇلەس قوسۋىمىز كەرەك.
اۋدان مەن اۋىل اكىمدەرى جولداۋ تالاپتارىن ورىنداۋ ماقساتىندا بۇرىنعى تاپتاۋرىن بولعان ءىس-ارەكەتتەرىن وزگەرتىپ, تۇرعىلىقتى حالىقتىڭ ۇنىنە قۇلاق اسۋى قاجەت. اۋماقتاعى وزەكتى ماسەلەلەرگە بايلانىستى وي-پىكىرىن بۇكپەسىز ايتا وتىرىپ, ءىستىڭ وڭ شەشىلۋىنە ۇلەس قوساتىن ادامداردى تىڭداي بىلگەن ءجون. ول ءۇشىن ءاربىر كەزدەسۋ بارىسىندا جۇرتشىلىقتى اشىق اڭگىمەگە تولىق قاتىستىرا ءبىلۋ كەرەك.
جولداۋمەن قاتار پرەزيدەنت «اكىمدەردىڭ حالىقپەن كەزدەسۋلەرىن وتكىزۋ تۋرالى» ارنايى قابىلداعان جارلىعىندا دا بۇرىنعىداي ءاتۇستى, ساناۋلى ءبىر عانا ۇيرەنشىكتى توپپەن ەمەس, جەرگىلىكتى حالىقتىڭ باسىم كوپشىلىگىن قاتىستىرا وتىرىپ, ولاردىڭ اۋىل مەن ەل بولاشاعىن كەمەلدەندىرۋ جونىندەگى اشىق پىكىرلەرىن تىڭداپ, ونىڭ جۇزەگە اسىرىلۋىن قامتاماسىز ەتۋدى تاپسىردى. الايدا جولداۋ مەن جارلىقتىڭ ورىندالۋىنا ەرەكشە قۇلشىنىس, ىسكەرلىك تانىتىپ جۇرگەن اكىمدەر ءالى دە از. بۇل سىندى المالى اۋىلدىق وكرۋگىنىڭ اكىمىنە قاراتا دا ايتۋعا بولادى. ويتكەنى اۋىلدىق وكرۋگتە وتكىزىلەتىن جيىندارعا شىندىقتى اشىپ ايتاتىندار كوپ شاقىرىلا بەرمەيدى. ارينە, اكىم ءۇشىن جينالىستاردا ءبارىن ماقۇل كورەتىن, وزىنە قولايلى جانداردىڭ بولعانى ماڭىزدى. بىراق بۇل ەسكىلىكتەن ارىلاتىن ۋاقىت كەلدى.
جولداۋدا ايتىلعان ماسەلەلەر ورىندالۋىمەن قۇندى. سوندىقتان دا «اكىم بول, حالقىڭا جاقىن بول» دەگەن اتالى ءسوز بەن پرەزيدەنت قويىپ وتىرعان تالاپ-مىندەتتەردىڭ قۇنىن كەتىرمەي, ءاربىر اكىم حالىقپەن مەيلىنشە بىرگە بولىپ, سولاردىڭ ارىز-تىلەگىنەن قورىتىندى شىعارىپ وتىرۋ ماڭىزدى.
جۇلدىز تۇزەلبەكوۆا,
ل.وتەشوۆ اتىنداعى مەكتەپتىڭ پەداگوگ-ۇيىمداستىرۋشىسى
تۇركىستان وبلىسى,
بايدىبەك اۋدانى
