ۇزاق مەرزىمدى ارنايى جەدەل-تەرگەۋ ءىس-شارالارىنىڭ ناتيجەسىندە 39 جاستاعى ازامات ۇستالعان.
«كينولوگيالىق قىزمەت ورتالىعىنىڭ يتتەرىن پايدالانا وتىرىپ ءتىنتۋ بارىسىندا «ميرنىي» گاراج كووپەراتيۆىنەن پوليەتيلەن قاپ تابىلدى. ونىڭ ىشىندە «گاشيش» ەسىرتكى زاتى بولعان. ساتۋعا دايىندالعان زاتتىڭ سالماعى - 25 كەلى», دەدى نۇر-سۇلتان قالاسى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى, پوليتسيا پولكوۆنيگى ەرلان اكباروۆ.
تاركىلەنگەن ەسىرتكىنى تۇتىنۋ كولەمى 5000 ءبىر رەتتىك دوزانى قۇرايدى. قۇنى «قارا نارىقتا» 30 ميلليون تەڭگەگە جەتەدى. اتالعان فاكتى بويىنشا قر قك 297-بابى 3-بولىگى بويىنشا سوتقا دەيىنگى تەرگەۋ امالدارى جۇرگىزىلۋدە.
«كۇدىكتى ءوز كىناسىن مويىندادى. ەلوردا اۋماعىندا ەسىرتكى جەتكىزۋگە جانە وتكىزۋگە قاتىسى بولۋى مۇمكىن باسقا دا ادامدار انىقتالۋدا», دەپ تولىقتىرىلعان دەپارتامەنتتىڭ ءباسپاسوز قىزمەتى تاراتقان حابارلامادا.
ايانا توعانبەك
