جەتى ساتىعا جوعارىلادى
كۇنى كەشە عانا ىستانبۇلدا وتكەن ءتۋرنيردىڭ جارتىلاي فينالىنا دەيىن جەتكەن يۋليا پۋتينتسەۆا وسى تابىسىنىڭ ارقاسىندا الەمدىك رەيتينگتە بىردەن جەتى ساتىعا جوعارىلاپ, قازىرگى كەزدە ول 44-ورىندى يەلەنۋدە.
قازاقستاندىق تەننيسشىلەر اراسىنان WTA رەيتينگىندەگى ەڭ ۇزدىك كورسەتكىش ءالى دە ەلەنا رىباكيناعا تيەسىلى. ەلىمىزدىڭ ءبىرىنشى راكەتكاسى بۇل كۇندەرى 18-ورىندى ەنشىلەۋدە. سوڭعى كەزدەرى الا-قۇلا ونەر كورسەتىپ جۇرگەن زارينا دياستىڭ جاعدايى جاقسى ەمەس. جەرلەسىمىز ءتورت ساتىعا تومەن قۇلديلاپ, 116-ورىندى قاناعات تۇتۋدا. ايەلدەر اراسىندا پولشانىڭ 20 جاستاعى جۇلدىزى يگا سۆيونتەككە تەڭ كەلەر ەشكىم جوق. ەكىنشى ورىندا – يسپانيالىق پاۋلا بادوسا. ءۇشىنشى ساتىعا چەحيالىق باربورا كرەيچيكوۆا جايعاستى. ءتورتىنشى جانە بەسىنشى ورىنداردى بەلورۋسسيالىق ارينا سوبولەنكو مەن گرەكيالىق ماريا ساككاري يەلەنۋدە.
ەرلەر اراسىندا نوۆاك دجوكوۆيچ پەن دانيل مەدۆەدەۆ يىق تىرەسىپ كەلەدى. ازىرگە سەربيانىڭ سايىپقىرانى وزسا, رەسەيلىك ويىنشى ەكىنشى ورىندى ولجالاۋدا. ۇزدىك بەستىكتىڭ قاتارىندا گەرمانيالىق الەكساندر زۆەرەۆ, يسپانيالىق رافاەل نادال جانە گرەكيالىق ستەفانوس تسيتسيپاس سىندى ساڭلاقتار بار. ەلىمىزدىڭ ءبىرىنشى راكەتكاسى الەكساندر بۋبليك اتر رەيتينگىندە 32-ورىندى يەمدەنۋدە. ميحايل كۋكۋشكين 164-ساتىعا تۇراقتادى. ال دميتري پوپكو 169 جانە تيموفەي سكاتوۆ 194-ورىندارعا تابان تىرەدى.
بەلگيادا باعىمىز جانبادى
بەلگيادا وتكەن «لەج-باستون-لەج» ءداستۇرلى جارىسى جەرگىلىكتى ۆەلوشاباندوزداردىڭ ايقىن جەڭىسىمەن اياقتالدى.
Quick-Step Alpha Vinyl Team كلۋبى ساپىندا ونەر كورسەتىپ جۇرگەن 22 جاستاعى رەمكو ەۆەنەپۋل 257,2 شاقىرىمدىق قاشىقتىقتى 6 ساعات 12 مينۋت 38 سەكۋندتا ءجۇرىپ ءوتىپ باس جۇلدەنى ولجالادى. ەكىنشى ورىندى كۆينتەن حەرمانس (Intermarché - Wanty - Gobert Matériaux) يەلەنسە, ءۇشىنشى ساتىعا ۆاۋت ۆان ارت (Jumbo-Visma) جايعاستى. بۇل سپورتشىلاردىڭ بارلىعى دا ءتۇرلى حالىقارالىق دودالاردا بەلگيانىڭ ۇلتتىق قۇراماسىنىڭ نامىسىن ابىرويمەن قورعاپ ءجۇر. وكىنىشكە قاراي, «استانا» كلۋبى مۇشەلەرىنىڭ بىردە-بىرەۋى كوڭىل كونشىتەرلىكتەي ناتيجەگە قول جەتكىزە المادى.
ەستەرىڭىزگە سالا كەتەيىك, كەزىندە وسى دودادا الەكساندر ۆينوكۋروۆ (2005, 2010 جىلدارى) ەكى رەت توپ جارسا, ماكسيم يگلينسكي (2012) ءبىر مارتە دارا شىققان ەدى.
دوپ دوداسى باستالادى
بۇگىن ەستونيانىڭ وتەپيا قالاسىندا فۋتبولدان جاسوسپىرىمدەر اراسىندا حالىقارالىق ءتۋرنيردىڭ جالاۋى جەلبىرەيدى. اتالعان دوپ دوداسىندا كوماندامىزدىڭ اعا جاتتىقتىرۋشىسى الەكساندر كۋزنەتسوۆ مىنا شاكىرتتەرىنە سەنىم ارتىپ وتىر:
قاقپاشىلار – ءاليحان جاناي («استانا»), ابىلقايىر الياقبار («قايسار»), اناتولي سىچەۆ («قايرات»). قورعاۋشىلار – ەلجان مولداحمەت, ءاليحان يسرايلوۆ («قايرات»), دانيار ەرلان, ءامىر مانسۇروۆ, تيمۋر قۇربانوۆ («جاس قىران»), رۋستام جانحاەۆ, ەرلان تۇتقاباەۆ («شاحتەر»), بەيبارىس ءابدىلحاي («تاراز»). جارتىلاي قورعاۋشىلار – احمەتالي قالتانوۆ («استانا»), ەلدار ماقسۇتوۆ, ەراسىل يۋسۋپوۆ (ركس), الان اداحاەۆ, ادىلەت مىڭباي, سۇلتان شىمىرحان («اكادەميا وڭتۇستىك»), دانيار ءنادىر («تۋزلاسپور», تۇركيا), حامزا مۇحامەتالي, يليا ۆەرەمەەۆ («جاس قىران»), ادىلەت ومەي, ديماش سەرىك ۇلى («تاراز»), ايان بايداۋلەتوۆ («اقتوبە»), تەمىرلان اعىمانوۆ («اقسۋ»). شابۋىلشىلار – ارۋپ ساۋتوۆ («قايرات»), ۆيكتور لاكەەۆ («جاس قىران»), نۇرسۇلتان ابدوللا («كاسپي»), ءىلياس ءابىل («اقسۋ»), ديار قادىرقۇلوۆ («الانياسپور, تۇركيا»).
العاشقى كەزدەسۋىن جەرلەستەرىمىز بۇگىن جاڭا كالەدونيامەن وتكىزەدى.
