ەلدى مەكەندەگى الماتى كوشەسىنىڭ تۇرعىنى ايگۇل سۇلتانوۆا وقيعا جەكسەنبى كۇنى ساعات كەشكى سەگىزدەر شاماسىندا باستالعانىن ايتادى. جاۋىن-شاشىننىڭ سالدارىنان ءۇيىنىڭ اۋلاسىن سۋ باسىپ, باسپاناسىنا كىرگەن. ءۇش ۇل, ەكى قىزدىڭ اناسى اۋىلدىڭ اكىمى مەن تۇرعىنداردىڭ كومەگىمەن تەز ارادا قاۋىپسىز ايماققا جەتكەن.
وبلىستىق تجد باستىعىنىڭ ورىنباسارى ەرىك سارىباەۆتىڭ ايتۋىنا قاراعاندا, سۋ باسقان اۋماقتاردان 50 ادام ەۆاكۋاتسيالانىپ, تۋىستارىنىڭ ۇيلەرىن ۋاقىتشا پانالاعان. زاڭعار ەلدى مەكەنىندە – 7, قاراباۋدا – 15, تۇعىرتاستا – 1, قىزىلسەڭگىردە – 12, شاناق اۋىلىندا 20 ۇيگە سۋ كىرگەن. نوسەر جاۋىننىڭ قاتتىلىعى سونشا, ەكى جۇزدەن اسا مال شىعىنى انىقتالدى. بۇل باعىتتاعى جۇمىس جالعاسۋدا. قازىعۇرت اۋدانى اكىمدىگىنىڭ ءباسپاسوز قىزمەتى حابارلاعانداي, قاقپاق ەلدى مەكەنىندە – 200, ال ساراپحانا اۋىلىندا 25 باس مال قىرىلعان. تۇرعىن ۇيلەردى سۋ باسۋىنا جول بەرمەۋ ماقساتىندا توتەنشە جاعداي, اۋداندىق ءورت ءسوندىرۋ بولىمدەرى مەن بەكەتتەرىنىڭ, جەرگىلىكتى اۋىل اكىمدىكتەرى قىزمەتكەرلەرىنىڭ ۇيىمداستىرۋىمەن سۋ سورعىشتار ارقىلى كوشەلەر مەن ءۇيدىڭ اۋلالارىنا تولعان سۋدى شىعارۋ جۇمىستارى ءتۇنى بويى جۇرگىزىلدى. بۇل ىسكە توتەنشە جاعدايلار دەپارتامەنتىنىڭ 56 قىزمەتكەرى, 9 بىرلىك تەحنيكا, 11 موتوپومپا جانە جەرگىلىكتى اتقارۋشى ورگانداردىڭ 19 قىزمەتكەرى, 6 بىرلىك تەحنيكا, 2 موتوپومپا جۇمىلدىرىلعان. سونىمەن قاتار كوشەلەردى, ۇيلەردىڭ اۋلالارىن سۋ باسۋ فاكتىسىنە بايلانىستى اۋدان اكىمدىگىنىڭ جەدەل جەلىسى ىسكە قوسىلىپ, تۇرعىندار تاراپىنان حابارلامالار تۇسكەن جاعدايدا شۇعىل ءىس-شارالار اتقارىلدى.
بۇگىندە قازىعۇرت اۋدانىندا سۋ باسقان ەلدى مەكەندەردە جاعداي تۇراقتى, جەرگىلىكتى تۇرعىندارعا ءوڭىردىڭ ەرىكتى جاستار توبى جاردەمدەسۋدە. سۋ باسقان بارلىق اۋىلداعى قورا-جايلار جاۋىن سۋىنان, لاي-باتپاقتاردان تازارتىلۋدا. بۇل اۋىلدارداعى سۋ باسقان 41 ءۇيدىڭ اۋلاسىن تازارتۋ جۇمىستارىنا اكىمدىك قىزمەتكەرلەرى دە كومەك قولىن سوزۋدا. سونىمەن قاتار توتەنشە جاعدايلار قىزمەتكەرلەرى جاۋىن سۋىن ارنايى تەحنيكا كومەگىمەن شىعارۋدا. «ادام شىعىنى جوق, جاعداي تولىق باقىلاۋعا الىنعان. مال شىعىنى ەسەپتەلۋدە. جالپى, قاۋىپ-قاتەر سەيىلدى. ەۆاكۋاتسيالانعان 50 تۇرعىن ءوز ۇيلەرىنە قايتارىلدى. جۇمىس جالعاسىپ جاتىر», دەدى وبلىستىق توتەنشە جاعدايلار دەپارتامەنتىنىڭ باستىعى نۇرعالي ءجۇنىسوۆ.
وبلىس اكىمى ومىرزاق شوكەەۆتىڭ تاپسىرماسىمەن قازىعۇرت جانە سارىاعاش اۋداندارىنداعى جاۋىن-شاشىن سالدارىن جويۋ بويىنشا ارنايى كوميسسيا قۇرىلدى.
«شىعىندار وبەكتيۆتى ەسەپتەلۋگە ءتيىس. مال شىعىنى بويىنشا اۋىل شارۋاشىلىعى باسقارماسى ءتيىستى شەشىم قابىلداپ, زاڭ شەڭبەرىندە ءوز مىندەتتەرىن ورىنداسىن. بۇل – جەرگىلىكتى, اۋداندىق دەڭگەيدە شەشىلەتىن ماسەلە. ءبىزدىڭ ءجىتى نازارىمىزدا تۇر», دەدى ومىرزاق شوكەەۆ.
