74 كيلو سالماق دارەجەسىندە باق سىناعان نۇرقوجا قايپانوۆ بۇعان دەيىن ازيا چەمپيوناتىن ەكى رەت ۇتقان. 2019 جىلى سيان جانە 2021 جىلى الماتىدا وتكەن جارىستاردا الدىنا جان سالمادى. ودان بولەك قانداسىمىزدىڭ قورجىنىندا الەم چەمپيوناتى مەن دۇنيەجۇزىلىك اسكەريلەر ويىندارىنىڭ كۇمىس مەدالى بار. بۇل جارىسقا قايپانوۆ جاقسى بابىندا كەلگەن ەكەن. باستاپقى بەلدەسۋىندە ول ريو وليمپياداسىنىڭ قولا جانە لاس-ۆەگاستاعى الەم چەمپيوناتىنىڭ كۇمىس جۇلدەگەرى, ازيا ويىندارى مەن قۇرلىق بىرىنشىلىگىندە سان مارتە اتوي سالعان وزبەكستاننىڭ وتە مىقتى بالۋانى يحتيەر ناۆرۋزوۆتى باس كوتەرتپەي ۇتتى. كەلەسى اينالىمدا الەم كۋبوگى مەن ازيا چەمپيوناتىندا ۇزدىكتەر ساناتىنان كورىنگەن قىرعىزستاننىڭ كوكجالى يسلامبەك وروزبەكوۆتى 15:8 ەسەبىمەن ەڭسەردى. فينالدا نۇرقوجا پارسى ەلىنىڭ وكىلى يۋنەس الياكبار ەماميچوگايمەن كۇش سىناستى. وكىنىشكە قاراي, شەشۋشى باسەكەدە نۇرقوجا كەڭىنەن كوسىلە المادى – 2:5.
86 كيلو سالماقتا سىنعا تۇسكەن ازامات داۋلەتبەكوۆ وسىدان بەس جىل بۇرىن نيۋ-دەليدە وتكەن سارى قۇرلىقتىڭ باستى دوداسىندا اقتىق سىنعا القىنباي جەتكەنىمەن, شەشۋشى تۇستا يراندىق اليرەزا كاريميگە ەسە جىبەرگەن ەدى. بۇل جولى سول ولقىلىقتىڭ ورنىن تولتىرۋعا تاماشا مۇمكىندىك تۋدى. ۇلانباتىردا داۋلەتبەكوۆ وزبەكستاندىق بوبىر يسلاموۆ پەن قىرعىزستاندىق سايقاباي يۋسۋپوۆتىڭ تاس-تالقانىن شىعاردى. ەكى بەلدەسۋ دە مەرزىمىنەن بۇرىن اياقتالدى. فينالدا ونى دەپاك پۋنيا كۇتىپ تۇردى. 22 جاستاعى ۇندىستاندىق سپورتشى باعىندىرعان بەلەستەر ءبىر توبە. وسىدان ءۇش جىل بۇرىن نۇر-سۇلتاندا جالاۋى جەلبىرەگەن الەم چەمپيوناتىندا ءدال وسى سپورتشى كۇمىس مەدالدى موينىندا جارقىراتقان ەدى. دەسەك تە, دەپاكقا قارسى وتە ساۋاتتى تاكتيكا قولدانعان ازامات موڭعوليادا ءوزىنىڭ مىقتىلىعىن مويىنداتتى. فينالدىق سايىستا 6:1 ەسەبىمەن باسىم تۇسكەن ازامات ازيا چەمپيونى اتاندى.
قۇرلىق بىرىنشىلىگىندە ءۇش رەت جۇلدەگەرلەر ساناتىنا قوسىلعان الىشەر ەرعاليدىڭ اسا اۋىر سالماققا اۋىسقانىنا اسا كوپ ۋاقىت بولا قويعان جوق. دەسەك تە, ونىڭ اياق الىسى جامان ەمەس. بۇل جارىستا تۇرىكمەنستاندىق شاتتىلىق نەمەلياەۆ (14:4) پەن كورەيالىق يوحەن چوندى (9:6) جەڭگەن الىشەر فينالدا ياادوللا موحاممادكازەم موحەبيگە جول بەردى.
61 كيلو سالماقتاعى اقبار قۇربانوۆ قولا مەدال ءۇشىن كەزدەسۋدە باحرەيننىڭ تۋى استىندا ونەر كورسەتىپ جۇرگەن داعىستاندىق اليبەگ اليبەگوۆتەن (5:4) باسىم ءتۇستى. 92 كيلو سالماقتا كۇرەسكەن ادىلەت داۋلىنباەۆ العاشقى اينالىمدا يراندىق قارسىلاسىنان ويسىراي ۇتىلسا دا, قولا مەدال ءۇشىن تالاسۋ مۇمكىندىگىن ساقتاپ قالدى. شەشۋشى تۇستا ول جاپونيالىق تاكۋما وتسۋمەن ايقاستى. بۇل ءبىر فينالعا بەرگىسىز ايقاس بولدى. بەلدەسۋ بارىسىندا قانداسىمىز توعىز ۇپاي ايىرماشىلىعىمەن ۇتىلىپ جاتتى. وتسۋ ەندى ءبىر ۇپايعا يەلىك ەتسە, ايقىن جەڭىسكە جەتەر ەدى. الايدا سىن ساعاتتا نامىسىنا قامشى باسقان ادىلەت قارسىلاسىن الىپ ۇرىپ, قوس جاۋىرىنىمەن جەرگە قادادى. تازا جەڭىس!
قازاقستاننىڭ ەركىن كۇرەس شەبەرلەرى ۇلانباتىرداعى ازيا چەمپيوناتىن 1 التىن, 3 كۇمىس جانە 4 قولا مەدالمەن قورىتىندىلادى. جەرلەستەرىمىز جالپىكوماندالىق ەسەپتە ءۇشىنشى ورىنعا تابان تىرەدى. ال كوش باسىندا – يران قۇراماسى. پارسى ەلىنىڭ پەحلەۆاندارى سەگىز جۇلدەگە (6 التىن+1 كۇمىس+1 قولا) قول جەتكىزدى. ەكىنشى ورىنداعى جاپونيانىڭ ەنشىسىندە التى مەدال (2+0+4) بار. ءۇندىستاننىڭ سايىپقىراندارى جەتى رەت (1+3+3) جەڭىس تۇعىرىنا كوتەرىلدى. سونداي-اق موڭعوليا (0+2+0), قىرعىزستان (0+1+4), وزبەكستان (0+0+3) جانە وڭتۇستىك كورەيانىڭ (0+0+1) وعلاندارى ۇلانباتىر كوگىندە ءوز ەلدەرىنىڭ تۋلارىن جەلبىرەتتى.
سونىمەن, كۇرەستىڭ ءۇش ءتۇرى بويىنشا قازاقستاننىڭ بالۋاندارى بيىلعى ازيا چەمپيوناتىندا 21 (5+8+8) جۇلدە ولجالادى. ءدال سونداي كورسەتكىشكە جاپونيا قۇراماسى دا (10+2+9) قول جەتكىزدى. بىراق التىن مەدالدى الدەقايدا كوپ جيعان كۇنشىعىس ەلىنىڭ وكىلدەرى جالپى ەسەپتە الدىمىزدى وراپ كەتتى. سونداي-اق جۇلدەلەردىڭ ساپاسى جاعىنان يراننىڭ دا (10+2+3) وتانداستارىمىزدان كوشى ىلگەرى. ال سارى قۇرلىقتىڭ وزگە مەملەكەتتەرى ءبىزدىڭ ارتىمىزدان سىعالاپ قالدى.
