«جەردىڭ جانە تابيعي رەسۋرستاردىڭ يەسى حالىق» دەگەن نورمانى كونستيتۋتسيادا ءبىرجولا بەكىتۋدىڭ ساياسي ءمانى زور بولماق جانە بولاشاقتا بۇل ماسەلەنى ءارتۇرلى تۇسىندىرۋگە جول بەرىلمەۋى كەرەك. وسىعان بايلانىستى, نەگىزگى زاڭنىڭ 6-بابىن مىناداي رەداكتسيادا بەرۋ ۇسىنىلادى:
«جەر جانە ونىڭ قويناۋى, سۋ, وسىمدىكتەر جانە جانۋارلار الەمى, باسقا دا تابيعي رەسۋرستار حالىققا تيەسىلى. مەملەكەت حالىق اتىنان مەنشىك يەلىگىن جۇرگىزۋگە قۇقىلى», دەگەن پرەزيدەنت ءسوزىن تولىق ماقۇلدايمىن. ويتكەنى جەر راسىندا دا حالىقتىڭ يگىلىگى ەكەنى راس.
«كونستيتۋتسيادا حالىقتىڭ جەر مەن تابيعي رەسۋرستاردىڭ مەنشىك يەسى ەكەندىگى تۋرالى نورمانىڭ تۇپكىلىكتى بەكىتىلۋى ۇلكەن ساياسي مانگە يە بولادى, بولاشاقتا كەز كەلگەن قاراما-قايشىلىقتاردى بولدىرمايدى» دەگەن پرەزيدەنت پىكىرىنىڭ ءمانى دە تىم تەرەڭدە جاتىر دەپ پايىمدايمىن.
نەگىزگى زاڭنىڭ وسى بابىنىڭ قازىرگى ەرەجەلەرىنىڭ تۇپكى ءمانى «جەر جانە ونىڭ قويناۋى, سۋ كوزدەرى, وسىمدىكتەر مەن جانۋارلار دۇنيەسى, باسقا دا تابيعي رەسۋرستار مەملەكەت مەنشىگىندە بولادى. جەر, سونداي-اق زاڭدا بەلگىلەنگەن نەگىزدەردە, شارتتار مەن شەكتەردە جەكە مەنشىكتە دە بولۋى مۇمكىن», دەگەن جولدارمەن ناقتىلانعانى ءجون.
كونستيتۋتسيانىڭ 6-بابىنىڭ رەداكتسياسىن وزگەرتە وتىرىپ, ءبىز ونى «مەملەكەتتىك بيلىكتىڭ بىردەن-ءبىر باستاۋى – حالىق» دەگەن تۇجىرىممەن تۇيىندەپ, بيلىك بۇكىل قازاقستان حالقىنا تيەسىلى دەپ ايتىلاتىن كونستيتۋتسيانىڭ 3-بابىنا سايكەس كەلتىرەمىز.
جەرگە قاتىستى بارلىق قاعيداتتى ماسەلەلەردى, مەملەكەتتىڭ شەكاراسى مەن اۋماقتىق تۇتاستىعى ماسەلەلەرىن قازاقستان حالقى رەفەرەندۋمدا شەشۋگە ءتيىس. بۇل ەرەجە مەنىڭ ويىمشا, كونستيتۋتسيانىڭ 6-بابىنا ەنگىزىلۋگە ءتيىس. قازىرگى جەر زاڭناماسىنا قازاقستان كونستيتۋتسياسىنىڭ 6-بابىنىڭ جاڭا ەرەجەلەرىنە سايكەس وزگەرىستەر مەن تولىقتىرۋلار ەنگىزگەن ءجون.
پرەزيدەنت جەرگە قاتىستى ماسەلەلەردى نىق شەگەلەپ ايتتى. وسى ورايدا ءبىز بايتاق دالامىزدىڭ شىنىندا دا حالىقتىڭ باعا جەتپەس بايلىعى ەكەنىن ۇمىتپاۋىمىز كەرەك.
مارات سارسەمباەۆ,
زاڭناما جانە قۇقىقتىق اقپارات ينستيتۋتىنىڭ باس عىلىمي قىزمەتكەرى, زاڭ عىلىمدارىنىڭ دوكتورى
