تايۆان ورشىگەن ۆيرۋسپەن قالاي كۇرەسىپ جاتىر؟

تايۆان پرەمەر-ءمينيسترى ەلدە كارانتين جاريالامايتىنىن ايتتى, ويتكەنى جۇق­تىرعانداردىڭ باسىم بولىگىندە دەرتتىڭ بەلگىلەرى جوق, جەڭىل سيمپتومدار بىرقاتار ناۋقاستا عانا بىلىنەدى.

تايۆاندا دەرتتىڭ ءورشۋى جىل باسىنان بايقالدى. ستاتيس­تيكالىق مالىمەتتەرگە سۇ­يەنسەك, قاڭتاردان باس­تاپ بارلىعى 18 436 ادام ۆيرۋس جۇقتىرىپ, ءتورت ادام قاي­تىس بول­عان. الايدا بۇل كورسەت­كىش­ت­ىڭ جالپى سانى 23 ملن حالىققا شاققاندا از بولىپ وتىر. تايۆان ۇكىمەتى ەلدەگى ۆاكتسينالاۋدىڭ كورسەتكىشى جوعارى ەكەنىن العا تارتىپ, ۆيرۋسپەن بىرتە-بىرتە ءومىر ءسۇرىپ, ەكونوميكالىق اينالىم­دى توق­تاتپاۋدى ءجون كورىپ وتىر. ولار وسىلايشا پاندەميامەن كۇرەسۋدىڭ «جاڭا تايۆان مو­دەلىن» جاساپ شىعارماقشى. ۆيرۋس­قا قارسى كۇرەستەگى مۇن­داي قا­دام­دارىنىڭ ءساتتى بولارىنا ەل ۇكىمەتى سەنىمدى, ويتكەنى تىر­كەلگەن ناۋقاستاردىڭ 99 پايىزدان استامى سيمپتومسىز نەمەسە دەرتتىڭ جەڭىل تۇرىنە شالدىققان. ء«بىز قازىرگى دەرتپەن بىرتە-بىرتە كۇرەسەمىز, شان­حاي سەكىلدى الدىمەن جە­ڭىل شارالار قابىلداپ, ارتىن­شا لوكداۋنعا كەتپەيمىز, پان­دە­مياعا قارسى قاتاڭ شارالار قابىلدامايمىز. دەگەنمەن ماس­كا كيۋدى جالعاستىرا بەرە­مىز», دەدى سۋ تسزەن-چان.

وسى اركەتتەرىنەن ەل ۇكىمەتى وسى ايدىڭ سوڭىنا دەيىن كۇن سايىن دەرت جۇقتىرعانداردىڭ سانى 10 مىڭعا جەتەدى دەپ بولجاپ وتىر جانە بىرنەشە اپتادان كەيىن ىندەت كۇرت ءورشۋى مۇمكىن دەپ ەسكەرتتى. بۇگىندە جەرگىلىكتى بيلىك كوروناۆيرۋسپەن كۇرەسۋگە قوسىمشا ۆاكتسينالار مەن ەكسپرەسس-تەستتەر سانىن كوبەيتىپ, دەرت جۇقتىرعاندار مەن ولارمەن بايلانىستا بولعان ادامداردىڭ وقشاۋلانۋ كۇندەرىن ازايتۋ ماسەلەسىن قاراستىرىپ جاتىر. ال ەلگە كەلگەن شەتەلدىكتەرگە كا­ران­تين ۋاقىتىن ەكى اپتادان 10 كۇنگە دەيىن قىسقارتتى, بۇل ۋا­قىت ودان ءارى دە قىسقارۋى مۇمكىن.

بۇگىندە تايۆان حالقىنىڭ 80 پايىزعا جۋىعى تولىق ۆاك­تسي­نالانعان جانە 60 پايىز­عا جۋىعى ەكپەنىڭ ءبىرىنشى كوم­پونەنتىن العان, ال ماسكا تاعۋ تالاپتارى ساقتالادى. پاندەميا باستالعالى بەرى ەلدە 47 100 ادام ينفەكتسيا جۇقتىرىپ, ىندەتتەن 856 ادام قايتىس بولعان.

الەمدى الاڭداتىپ وتىرعان شان­حايداعى جاعدايعا توقتا­لار بولساق, جەرگىلىكتى بيلىك «جۇما كۇنى قالادا كوۆيد جۇقتىرعان 12 ادام قايتىس بولدى» دەپ حابارلادى, بۇل ءبىر كۇن بۇرىنعى كورسەتكىشپەن سالىستىرعاندا 11 ادامعا كوپ. ال قىتايدىڭ قارجى ورتالىعى ءبىر كۇندە كوروناۆيرۋستىڭ 20 634 جاڭا جەرگىلىكتى سيمپ­تومسىز جاعدايىن تىركەدى, ءبىر كۇن بۇرىنعى مالىمەت بويىن­شا 15 698 ادامعا ەسەلەنگەن. سيمپتومدارى بار جاڭا جاع­داي­لاردىڭ جالپى سانى بەي­سەن­بىدەگى كورسەتكىشتەن 1,931-دەن 2,736-عا جەتتى. سەنبى كۇنى ەلدىڭ ۇلتتىق دەنساۋلىق ساقتاۋ باسقارماسى وتكەن جۇما كۇنى كوۆيد جۇقتىرعانداردىڭ سانى 24 411 جەتكەنىن حابارلادى, بۇل ءبىر كۇن بۇرىنعى كورسەتكىشپەن سالىستىرعاندا 18 598-گە ءوستى. 

P.S. جىلىنا 10 ملن ءتۋريستى قابىلدايتىن تايۆاننىڭ بۇل ارەكەتىنە الەم ساراپشىلارى الاڭداپ وتىر. دەرتتىڭ ءورشىپ, ءال بەرمەي كەتكەن كەزىندە شەكاراسىن بەكىتىپ, قاتاڭ كارانتين جاريالاعان شانحاي بيلىگىنە نارازى بولعاندار دا از ەمەس. 23 ملن حالقى بار تايۆان بيلىگىنىڭ قاتەرلى دەرتپەن كۇرەسۋ ساياساتىنىڭ دۇرىس نەمەسە بۇرىستىعى كەلەر كۇننىڭ ەنشىسىندە...