بيىلعى فورۋم «COVID-19 پاندەمياسى جانە الەم: حالىقارالىق دامۋعا بىرلەسىپ ىقپال ەتۋ جانە ورتاق بولاشاق قۇرۋ» تاقىرىبىمەن ءوتىپ جاتىر.
قر پرەمەر-ءمينيسترى ءاليحان سمايىلوۆ ءىس-شارا قاتىسۋشىلارىنا بەينەبايلانىس ارقىلى ءسوز سويلەدى. ءوز سوزىندە ول قازىرگى ۋاقىتتا ۇكىمەت قازاقستاندىقتاردىڭ ءال-اۋقاتىن ارتتىرۋ مەن ساپالى دامۋدى قامتاماسىز ەتۋگە باعىتتالعان بىرقاتار ەكونوميكالىق رەفورمانى جۇزەگە اسىرىپ جاتقانىن اتاپ ءوتتى.
«بيىل ناۋرىز ايىندا مەملەكەت باسشىسى قاسىم-جومارت كەمەل ۇلى توقاەۆ جاڭا ساياسي رەفورمالاردىڭ اۋقىمدى باعدارلاماسىن ۇسىندى. ماڭىزدى ساياسي رەفورمالاردى جانە داعدارىسقا قارسى كەشەندى شارالاردى ىسكە اسىرۋ ءۇشىن جالپىۇلتتىق جوسپار بەكىتىلدى. بۇل شارالار مەملەكەتتىڭ الەۋمەتتىك مىندەتتەمەلەرىن ىسكە اسىرۋعا جانە ورنىقتى دامۋعا قولايلى جاعداي جاساۋعا مۇمكىندىك بەردى», دەدى ءا. سمايىلوۆ.
قر پرەمەر-ءمينيسترى فورۋم تاقىرىبى پاندەميادان كەيىنگى دامۋعا الەمدىك قوعامداستىقتىڭ الاڭداۋشىلىعىن تولىق كورسەتەتىنىن اتاپ ءوتتى. ءوز كەزەگىندە قازاقستان پاندەميادان تۋىنداعان داعدارىستى تەز ارادا ەڭسەرۋگە جانە تۇراقتى حالىقارالىق ەكونوميكالىق بايلانىستاردى قالپىنا كەلتىرۋگە مۇددەلى.
وسىعان بايلانىستى قر ۇكىمەتىنىڭ باسشىسى ددۇ-نىڭ COVID-19-عا قارسى جاھاندىق ۆاكتسينالاۋدى قامتاماسىز ەتۋ جونىندەگى ستراتەگياسىن ۇستانىپ, ۆاكتسينالار مەن ەمدەۋ قۇرالدارىن ءادىل ءبولۋ جونىندەگى ەرەجەلەر جيناعىن ازىرلەۋدى ۇسىندى.
سونىمەن قاتار ءاليحان سمايىلوۆ ء«بىر بەلدەۋ, ءبىر جول» باستاماسى اياسىندا ىقپالداستىقتىڭ جوعارى سەرپىنىن قولداۋدىڭ ماڭىزدىلىعىن اتاپ ءوتتى.
«قازاقستان «جىبەك جولىنىڭ ەكونوميكالىق بەلدەۋىنىڭ» نەگىزگى بۋىنى رەتىندە حالىقارالىق ترانزيتتىك تاسىمالداردى ۇزدىكسىز قامتاماسىز ەتۋدى كۇشەيتەدى. وسىعان بايلانىستى شەتەلدىك ارىپتەستەرگە تاسىمالداۋ قاۋىپسىزدىگىنىڭ جوعارى تالاپتارىنا جاۋاپ بەرەتىن جانە جۇكتەردى ترانسكونتينەنتالدىق تاسىمالداۋعا دەگەن سۇرانىستى تولىق كولەمدە قامتاماسىز ەتۋگە قابىلەتتى ترانسكاسپي حالىقارالىق كولىك باعدارىن بەلسەندى تۇردە پايدالانۋدى ۇسىنامىز», دەدى قر ۇكىمەتىنىڭ باسشىسى.
شاراعا ونلاين-فورماتتا يزرايل, فيليپپين, موڭعوليا, نەپال مەملەكەتتەرىنىڭ باسشىلارى, سونداي-اق لاوس پرەمەر-ءمينيسترى مەن بىرقاتار حالىقارالىق ۇيىم باسشىسى قاتىستى.
