«كادر دايارلاۋ بويىنشا ەڭ باستى ماسەلە – بەرىلگەن ءبىلىمنىڭ نارىق تالابىنا سايكەس بولۋى. ونىڭ باستى شارتى - اكادەميالىق دەربەستىك. نارىق تالاپتارى تەز وزگەرىپ وتىرادى, سوندىقتان جۇيە ەسكىرىپ, ءبىلىم بەرۋ باعدارلامالارى سايكەس كەلمەي جاتادى. جاڭا ماماندىق اشۋ ءۇشىن 1-2 جىل كەتەدى. ەندى ۋنيۆەرسيتەتتەرگە اكادەميالىق دەربەستىك بەرىلىپ, ولار ءبىلىم بەرۋ باعدارلامالارىن كاسىبي ستاندارتتارعا سايكەس ازىرلەيدى. ياعني, ەندى مەملەكەت ەمەس, وقۋ ورنى جۇمىس بەرۋشىلەرمەن بىرلەسە وتىرىپ, وقۋ باعدارلامالارىن رەتتەۋگە مۇمكىندىك الدى», دەدى ءبىلىم ءمينيسترى ۇكىمەت وتىرىسىندا.
ونىڭ ايتۋىنشا, ەندىگى ماسەلە – نارىققا قانداي داعدىلار قاجەتتىگىن انىقتايتىن كاسىبي ستاندارتتاردىڭ جوقتىعى.
كوللەدجدەرگە دە اكادەميالىق دەربەستىك بەرىلىپ جاتىر. بۇعان دەيىن ستۋدەنتتەر 2-4 جىلعا دەيىن ۇزاق وقيتىن, جۇمىس بەرۋشىنىڭ تالاپتارى ەسكەرىلمەي, مەكتەپتە وقىعان پاندەر قايتالانىپ, ناتيجەسىندە ءبىر عانا بىلىكتىلىك يگەرىلەتىن. ەندى كوللەدجدەر وقىتۋ باعدارلاماسىن دەربەس ازىرلەپ, وقۋ مەرزىمدەرىن وزدەرى ايقىنداي الادى, ال تۇلەكتەر ءۇش بىلىكتىلىكتى بىردەي يگەرە الادى.
«ەسكىرگەن ماماندىقتار جويىلىپ, جاڭا ماماندىقتار اشىلىپ جاتىر. مىسالى 50-گە جۋىق ەسكى ماماندىق بويىنشا وقىتۋ توقتاتىلىپ, تيىسىنشە 60-قا جۋىق بۇرىن-سوڭدى وقىتىلماعان ماماندىقتار اشىلعان. ساپانى قامتاماسىز ەتۋدىڭ تاعى ءبىر شارتى – ءبىلىم بەرۋ باعدارلامالارىن جاڭارتۋ. دايىن بولعان كاسىبي ستاندارتتار بويىنشا ۋنيۆەرسيتەتتەردە 4 مىڭنان استام باعدارلاما جاڭارتىلدى. بۇرىن بولماعان جاساندى ينتەللەكت, IT-مەديتسينا, تسيفرلىق زاڭگەر سياقتى 269 جاڭا باعدارلاما ەنگىزىلدى. بۇلار «جاڭا بولاشاق ماماندىقتار اتلاسىنا» سايكەس اشىلىپ وتىر», دەدى اسحات ايماعامبەتوۆ.
