قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ وسكەلەڭ ۇرپاقتىڭ بولاشاعىن بۇگىننەن قامتاماسىز ەتۋ قاجەتتىگىن ايتا كەلە, جاڭا كىرگەن بارىس جىلىن «بالالار جىلى» دەپ جاريالادى. ۇرپاقتى ۇلتىنىڭ جالعاسى دەپ تانىعان بابالار اماناتى مەملەكەتتىڭ جارقىن بولاشاعىن ايقىنداۋعا ارنالعان بارلىق ماڭىزدى باعدارلامادان كورىنىس تابۋى وسى كورمە ىسپەتتى مازمۇنى تەرەڭ شارالاردان باستاۋ الادى.
بالالاردىڭ شىعارماشىلىق تۇلعاسىن قالىپتاستىرۋ جانە ەستەتيكالىق تاربيەسىن دامىتۋدى ماقسات ەتكەن كورمە ءتۇرلى تاقىرىپتى ورتاق يدەياعا توپتاستىرعان. الەمدى اق-قارا تۇسپەن ەمەس, قىزىلدى-جاسىلدى اشىق بوياۋ تۇسىمەن, باقىت پەن بەيبىتشىلىكتىڭ ۇيلەسىمىمەن قابىلدايتىن بالا تانىمىن ءدال ءارى جان-جاقتى زەردەلەگەن مەملەكەتتىك ورتالىق مۋزەي ديرەكتورىنىڭ ورىنباسارى بيبىگۇل داندىقاراقىزى: «جاس ۇرپاقتىڭ رۋحاني ۇيلەسىمدى تۇلعاسىن, وتانىمىزدىڭ كوركەمدىك الەۋەتىن دامىتۋ ءۇشىن بالالاردى ەرتە جاستان ونەرگە دەگەن سۇيىسپەنشىلىگىن ورىستەتىپ, تاربيەلەۋ قاجەت. ولاردىڭ سۇلۋلىققا دەگەن قۇشتارلىعى – ەرەسەك سۋرەتشىلەر ءۇشىن ۇلگى. قازىرگى ۋاقىتتا ەلىمىزدىڭ پەداگوگيكالىق قوعامداستىعى وسكەلەڭ ۇرپاقتى ۇلتتىق بەينەلەۋ ونەرىنىڭ قۇپيالارى مەن قىر-سىرىنا ۇيرەتۋ ءۇشىن تىنىمسىز ەڭبەك ەتۋدە, ونەر ارقىلى ولاردى قازىرگى زامانعى كوركەم باعىتتارمەن تانىستىرىپ, ەستەتيكالىق تاربيەنى, سۇلۋلىقتى بالا بويىنا ءسىڭىرۋ ءۇشىن ىزدەنىسىن ارتتىرىپ كەلەدى», دەدى.
كورمەگە ەلىمىزدىڭ تۇكپىر-تۇكپىرىنەن ىرىكتەلگەن 7 مەن 18 جاس ارالىعىنداعى دارىندى بالالاردىڭ شىعارماشىلىق جۇمىسى قويىلدى. ءارتۇرلى تەحنيكاداعى جانە اعاش, مەتالل, پلاستماسسا, ماتا, ءجۇن سەكىلدى ءتۇرلى ماتەريالداردان جاسالعان سۋرەت, گرافيكا, مۇسىندەر مەن ساندىك-قولدانبالى ونەر بۇيىمدارى بالا قيالىنىڭ تىم تەرەڭ جانە شەكسىز ەكەنىن كورسەتەدى. بۇل كورمەدە بالالاردىڭ ەستەتيكالىق سەزىمىن, كوركەمدىك تالعامىن وياتىپ, شىعارماشىلىق قيالىن دامىتۋ ءۇردىسى بەلگىلى جۇيەدە جيناقتالعان. شىعارماشىلىق جۇمىستار ارقىلى ءار ايماقتان كەلگەن بالالار قۇرداستارىنىڭ تۇرمىسى مەن ءومىر سالتىن, ۇلتتىق جانە مادەني ەرەكشەلىگىن تۇسىنۋگە ۇيرەنەدى. تالانت ەكەنىن تاي كۇنىنەن كورسەتىپ, بابى كەلىسسە, بىرەگەي شەبەر بولىپ شىعاتىنىن بۇگىن دالەلدەپ وتىرعان بالالارعا ارنالعان بۇل كورمە – باعا جەتپەس قولداۋ. ءالى جاس بولسا دا, كەلەشەگىنەن ءۇمىت كۇتتىرەتىن تالانتتى بالالاردىڭ تىرناقالدى تۋىندىلارىنىڭ ۇلتتىڭ رۋحانيات ورداسى بولىپ وتىرعان مەملەكەتتىك ورتالىق مۋزەي سەكىلدى ءىرى مادەنيەت ورتالىعىنا تۇڭعىش رەت كوپشىلىك نازارىنا ۇسىنىلۋى «بالالار جىلى» اياسىندا عانا مۇمكىن بولىپ وتىر.
مۋزەي باسشىلارى, ت.جۇرگەنوۆ اتىنداعى ۇلتتىق ونەر اكادەمياسىنىڭ پروفەسسورلارى, ۇلتتىق بەينەلەۋ ونەرىنىڭ ىرگەسىن كوتەرگەن كورنەكتى قىلقالام شەبەرى ءابىلحان قاستەەۆتىڭ قىزدارى گۇلداريا مەن گۇلنازيا كورمەگە قاتىسقان جاس دارىنداردىڭ شىعارماشىلىق ىزدەنىسىن جوعارى باعالاپ, ۇزدىك دەپ تانىلعاندارعا العىسحاتتار مەن ەنتسيكلوپەديالىق البوم-كىتاپتاردى سىيعا تارتتى.
الماتى
